Josue 23:5-12

⁵Egkehimu he egkeangken niw zed is menge tanè dan, sumalà te impesarig keniyu te Nengazen he Megbevayè niw. Su edsegseǥen sikandan te Nengazen.

⁶“Mebpekelig-en kew, ne peniguduwi niw he metuman niw is langun he ingkesurat diyà te Libru te Kesuǥuan ni Moises. Kenè niw repasa is minsan hengkey he vahin kayi.

⁷Kenè kew pekidsevaha te menge etew ziyà te menge nasyun he kemulu zuma niw, kenè niw sempita is ngazan te menge ed-ezapen dan wey kenè kew penangdù pinaaǥi te kegemita te ngazan kayi. Kenè kew zaan med-azap wey mebpenilbi kandan.

⁸Pezumazuma kew te Nengazen he Megbevayè niw, iring te nehuna he mibeelan niw.

⁹“Midsegseg te Nengazen is menge etew ziyà te zezekelà wey mekeǥeǥehem he menge nasyun hein midsurung niw sikandan, ne taman en guntaan ne wazè pa minsan sevaha he nekezaag keniyu.

¹⁰Is minsan hentei keniyu ebpekesegseg te 1,000 he menge etew, su is Nengazen iyan ebpekidtebek para keniyu, sumalà te insaad din.

¹¹Umbe, sigureduwa niw he mahal niw is Nengazen he Megbevayè niw.

¹²“Iyan, emun ed-iniyuǥan niw sikandin, wey ebpekidsevaha kew te menge etew kayi te menge nasyun he kemulu pa menge zuma niw, wey ebpekid-esawa kew kandan,