JOSUA 23:5-12

⁵Wofuŋ Anutu‐ŋeŋiczi bânierâ guriŋ‐jopahuc jopa jâpec ejareocmu. Eme Wofuŋ Anutu‐ŋeŋic e mupaŋke‐ŋarewec irec sâcko mâreŋ‐jeŋic roniŋmu.

⁶Erâ Mosere sâcmutâc papia qizecko wiac sasawa qâreŋkekicne fokac i aimuŋ jaha soŋaŋkehuc efârenʒepieŋ, moc mi ʒepieŋ.

⁷Ehuc ŋic gurune gurune irec ʒanʒaŋnezi ŋondeŋ‐ŋeŋicko ʒuhuckerâ juŋgopieŋ jaŋehec sisifuc mi enʒepieŋ. Â nemufâc‐jeŋic jaŋere ʒâŋe mu bâuac, me jaŋere ʒâŋeo mumupaŋ dâŋ mumu me kiŋaŋ qaqajare, me dieŋzi herâ dadape‐jare i wâc moc mi ejâmbâŋkenʒepieŋ.

⁸Ŋoŋe juwefuŋgopieŋ iŋucnea Wofuŋ Anutu‐ŋeŋictao qohota sanaŋkerâ junʒepieŋ.

⁹Wofuŋ e ŋoŋe ʒira juniŋte ŋic gurune gurune tâpiri ɋicwânʒâŋ‐jeŋichec jopa jâpec ejare‐fârewec. Irec juwefuhapie ŋic moczi sanaŋkerâ râsi fifisi‐ŋare i moc mi fuawec erâ wâc mi fuakac.

¹⁰Wofuŋ Anutu‐ŋeŋic e mupaŋke‐ŋarewec irec sâcko ŋoŋere erâ ʒika qaekacte ŋoŋeraonec mocjahazi ŋic 1 tauseŋ jaŋe ejareme sâcne wiseniŋmu.

¹¹Ʒi ine ŋaŋac juhâmoniŋte Wofuŋ Anutu‐ŋeŋic maŋzi ʒâficke‐jâmbâŋkenʒepieŋ.

¹²Ŋoŋe mocwâc risierâ ŋic gurune gurune hetiric‐jopakicne ŋondeŋ‐ŋeŋicko juraŋgopieŋ, jaŋerao qohotahuc ŋokac nareŋ gareŋ eniŋmuo