1Iwe, ewe Samol mi Lapalap a kapas ngeni Jeremaia fän aruuan, lupwen a chüen kalapus lon ewe lenien chon mas.
2Iei alon ewe Samol mi Lapalap mi föri fanüfan, mi alapalapa o anüküchara lon lenian, itan ewe Samol mi Lapalap,
3“Kopwe kökköriei, nge ngang üpwe pälüenuk, üpwe pwäri ngonuk mettoch mi aüchea o amwarar kosap silei me mwan.
4Pun iei aloi ngang ewe Samol mi Lapalap, ewe Koten Israel, fänäsengesin ekewe imw lon ei telinimw, pwal fänäsengesin imwen ekewe kingen Juta mi katatiu, pwe ekewe aramas repwe aea le epetiir seni ekewe ororen maun me ewe ketilas:
5Lon ewe maun ngeni ekewe chon Papilon, ekewe imw repwe ur ren somän chokewe ngang üpwe nirela lon ai song me lingeringer. Pun üa kul seni ei telinimw pokiten än ekewe aramas föföringau meinisin.
6Inamwo ai föri ei, nge üpwe apöchökülasefäli ei telinimw, üpwe pwal achikara ekewe aramas o ngeniir unusen kinamwe me nonomöch.
7Üpwe aliwinisefäli ekewe chon Juta me chon Israel mi oola o aüsefäliretä, pwe repwe usun me mwan.
8Üpwe limetiir seni ar kewe tipis meinisin ra föri ngeniei, üpwe pwal amusala ar tipis me ar ü ngeniei.
9Iwe, ei telinimw epwe afisätä ai pwapwa, ai iteüöch me än aramas mwareitiei. Chon ekewe mwü meinisin won fanüfan repwe niuokus o chechech, lupwen repwe rongorong usun ekewe feiöch meinisin üpwe awarato won ekewe chon Jerusalem, pwal usun ekewe wöü meinisin üpwe atoto won ei telinimw.”
10Iei alon ewe Samol mi Lapalap, “Ämi oua apasa usun ei leni pwe eu fanü mi pön, esap wor aramas ika man ra nom ie. Mi pwüng pwe ekei telinimwen Juta, pwal ekewe alen Jerualem ra pönüla, esap wor aramas ika man ra nom ie. Nge lon ekei leni oupwe rongorongsefäl
11kölün mweireir me kölün pwapwa, apwapwan mongön apwüpwülü, pwal mwelien chokewe mi köl, lupwen ra uwato ar asoren kilisou lon imwei. Iwe, repwe apasa, ‘Ousipwe kilisou ngeni ewe Samol mi Unusen Manaman, pun i a kirikiröch, an tong ellet a nom tori feilfeilachök.’ Pun ngang üpwe aliwini wöün ewe fanü usun me mwan. Ngang ewe Samol mi Lapalap üa kapas.”
12Iwe, iei alon ewe Samol mi Unusen Manaman, “Lon ei fanü mi usun chök fanüapö, esap wor aramas ika man ra nom ie, epwe worsefäl lenien enen man, ia chon mas repwe asösöü nöür pwiin sip ie.
13Lon ekewe telinimwen ewe fanü mi chukuchukutä, lon telinimwen ewe fanü mi chukutekison me ewe fanü Nekep, lon ewe fanü Peniamin me ekewe sop ünükün Jerusalem, pwal lon ekewe telinimwen Juta chon mas repwe aleanisefäli nöür pwiin sip. Ngang ewe Samol mi Lapalap üa kapas.”
14Iei alon ewe Samol mi Lapalap, “Epwe war ewe fansoun, üpwe apwönüetä ewe pwon üa föri ngeni ekewe chon Israel me chon Juta.
15Lon ena fansoun üpwe apwükätä efoch Palan mi pwüng epwe fasar seni mwirimwirin Tafit. I epwe föri mine a wenechar o pwüng me lon ewe fanü.
16Lon ena fansoun chon Juta me chon Jerusalem repwe küna manau o nonom fän kinamwe. Iwe, ewe telinimw epwe iteni ‘Ewe Samol mi Lapalap ach pwüng.’
17Pun ngang ewe Samol mi Lapalap üa pwon pwe epwe fokun wor eman mwirimwirin Tafit epwe king lon Israel.
18Epwe pwal fokun wor souasor seni ewe ainangen Lefi repwe eäni asoren kek ngeniei, repwe keni asoren mongö o eäni sokopaten asor fansoun meinisin.”
19Iwe, ewe Samol mi Lapalap a kapas ngeni Jeremaia,
20“Are oupwe tongeni atai ai pwon fän iten rän me pwin, pwe rän me pwin resap chüen fis lon ar fansoun mi kefilitä,
21mürin ai pwon ngeni nei chon angang Tafit epwe pwal tongeni ta, pwe esap wor eman nöün epwe king. Epwe pwal tongeni ta ai pwon ngeni ekewe souasor seni ewe ainangen Lefi mi angang ngeniei.
22Usun ekewe fün läng resap tongeni lea, pwal usun ekewe föün pien aroset resap tongeni aükük, iei usun üpwe achomonga ekewe mwirimwirin Tafit nei chon angang me ekewe souasor seni ewe ainangen Lefi mi angang ngeniei.”
23Iwe, ewe Samol mi Lapalap a kapas ngeni Jeremaia,
24“Ifa usun, kosap rongorong än ekei aramas apasa pwe ngang ewe Samol mi Lapalap üa pöütala Israel me Juta, ekewe ruu mwü üa fen filiretä? Iei usun ra turunufasei nei aramas, pwe resap chüen ekieki pwe ir eu mwü.
25Nge ngang ewe Samol mi Lapalap üa apasa: Are ai pwon fän iten rän me pwin me ai allük fän iten läng me fanüfan resap chüen pwönüetä,
26mürin üpwe tongeni pöütala ekewe mwirimwirin Jakop me Tafit nei chon angang. Üsap pwal filätä eman me lein mwirimwirin Tafit epwe nemeni ekewe mwirimwirin Apraham, Isaak me Jakop. Nge ngang üpwe aliwini ekewe chon oola o eäni ümöümöch ngeniir.”
