Jeremaia 41

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

¹Iwe, lon ewe afisuen maram Ismael nöün Netania we, nge Netania nöün Elisama seni ewe familien king, i eman lein nöün ewe king kewe meilap, a feito me engol mwän ren Ketalia nöün Aikam we lon Mispa. Nge lupwen ra mongöfengen ikenan lon Mispa,

²Ismael me ekewe engol mwän mi nom ren ra ütä o niela Ketalia ren ketilas, i ätewe ewe kingen Papilon a awisa pwe epwe kepinan ewe fanü.

³Ismael a pwal niela ekewe chon Juta meinisin mi nom ren Ketalia lon Mispa, pwal ekewe sounfiun Papilon a sereniir me ikenan.

⁴Iwe, lon ewe rän mürin än Ketalia ninnila, mwen esamwo wor eman a silei usun,

⁵walik mwän ra feito seni Sikem, Silo me Samaria, nge ra räisöüla alüser, ra kamwei üfer o akinasa inisir. Ra uwato asoren mongö me apach mi pwokus, pwe repwe asor lon ewe imwenfel.

⁶Nge Ismael a feiliwu seni Mispa pwe epwe churiir, a fetal nge kechü. Iwe, lupwen a churiir, a üreniir, “Ouse mochen oupwe feito ren Ketalia.”

⁷Nge lupwen ra tolong lon ewe telinimw, Ismael me ekewe mwän mi nom ren ra nirela o atururolong lon eu chönüttu.

⁸Nge mi wor engol mwän me leir ra üreni Ismael, “Kosap niikem, pun a wor äm föün wiich me parli, äm noppuk me chönün chunen aia aopala lemäl.” Iei mine Ismael esap chüen nirela.

⁹Iwe, ewe chönüttu ia Ismael a aturalong ie somän ekewe mwän a nirela eu chönüttu mi fokun watte, ewe king Asa a tuw, lupwen Paasa ewe kingen Israel a maun ngeni. Iwe, Ismael a amasoua ei chönüttu ren ekewe somä.

¹⁰Mürin, Ismael a liapeni ekewe lusun aramas meinisin mi chüen nom Mispa me nöün ewe king kewe föpwül, ir chokewe Nepusaratan ewe meilapen chon tümwünü ewe king a awisa Ketalia pwe epwe nemeniir. Iwe, Ismael a liapeniir o emweniir, pwe repwe feila ngeni fanüen chon Amon.

¹¹Nge lupwen Johanan nöün Karea we me ekewe souemwenin ewe mwichen sounfiu mi eti ra rong usun ewe föföringau Ismael a föri,

¹²ra angei nöür aramas meinisin o tapweri Ismael pwe repwe maun ngeni. Iwe, ra tori Ismael me arun ewe nomun koluk mi watte a nom Kipeon.

¹³Nge lupwen ekewe aramas meinisin mi nom ren Ismael ra küna Johanan me ekewe souemwenin ewe mwichen sounfiu, ra fokun pwapwa.

¹⁴Mürin, ekewe aramas meinisin ra kul o sä ngeni Johanan.

¹⁵Nge Ismael fiti waluman mwän ra sü seni Johanan o feila ren ekewe chon Amon.

¹⁶Mürin, Johanan me ekewe souemwenin ewe mwichen sounfiu mi eti ra angei ekewe sounfiu, ekewe fefin me semirit me ekewe nöüwis lon imwen king, o aliwinireto seni Kipeon. Ikkei ir ekewe aramas Ismael a uweerela seni Mispa mürin an niela Ketalia.

¹⁷Iwe, ra feila o ekis kaüla lon Kerut Kiman arun Petleem, pun ra ekiekin feila Isip,

¹⁸pokiten ekewe chon Papilon. Pun ra fokun niuokusitiir pokiten än Ismael niela Ketalia, ätewe ewe kingen Papilon a awisa pwe epwe kepinan ewe fanü.