1Iwe, ewe king Setekia a tinala Pasur nöün Malkia we mwän me ewe souasor Sefania nöün Maseia we mwän ren Jeremaia, pwe repwe üreni,
2“Kose mochen kopwe kapas ngeni ewe Samol mi Lapalap fän item. Pun Nepukatnesar ewe kingen Papilon a maun ngenikem. Eli ewe Samol mi Lapalap epwe föri eu manaman fän item o föri pwe Nepukatnesar epwe kul senikem.”
3Mürin Jeremaia a üreniir,
4“Iei usun mine oupwe üreni Setekia, ‘Iei alon ewe Samol mi Lapalap ewe Koten Israel: Üpwe akufu noum kewe sounfiu mi maun ngeni ewe kingen Papilon me nöün kewe sounfiu. Üpwe ionifengeni än noum kewe sounfiu pisekin maun lukalapen ei telinimw.
5Püsin ngang üpwe maun ngenikemi lon ai song, lon ai chou me lon ai lingeringer mi fokun watte ren pei mi manaman o aköüpöü.
6Üpwe nifengeni aramasen ei telinimw me man. Repwe mäla ren eu mätter mi watte.
7Mürin, üpwe föri pwe en Setekia ewe kingen Juta fiti noum kewe nöüwis me aramasen ei telinimw, ir ekewe mi chüen manau seni mätter, seni maun me lengita, oupwe sechilong lepöün Nepukatnesar ewe kingen Papilon, pwal lepöün chon oputemi mi mochen angei manauemi. Nepukatnesar epwe nikemiila, nge esap tongeekemi ika achikakemi ika ümöümöch ngenikemi. Ngang ewe Samol mi Lapalap üa kapas.’”
8Mürin ewe Samol mi Lapalap a üreniei pwe üpwe kapas ngeni ekewe aramas, “Oupwe rongorong! Ngang ewe Samol mi Lapalap, üa mwüt ngenikemi pwe oupwe filätä lefilen ewe al mi ale ngeni manau me ewe al mi ale ngeni mäla.
9Chokewe mi nomotiu lon ei telinimw repwe mäla ren maun, ren lengita pwal ren mätter. Nge chokewe mi towu seni ei telinimw o fangatä ngeni ekewe chon Papilon mi pwelifeili ei telinimw fän pisekin maun repwe manau, repwe chök kütta en me püsin manauan.
10Üa fen apwüngala pwe üpwe ataala ei telinimw, nge üsap achika. Epwe oolong lepöün ewe kingen Papilon, iwe, epwe kenala. Ngang ewe Samol mi Lapalap üa kapas.”
11Iwe, ewe Samol mi Lapalap a akünöüei pwe üpwe üreni chon leimwen ewe kingen Juta, “Oupwe aüselinga alon ewe Samol mi Lapalap,
12ämi ekewe mwirimwirin Tafit: Oupwe eäni kapwüng fän wenechar iteiten rän, oupwe angasa ekewe mi riaföü seni ekewe chon ariaföüür. Pun are ousap föri ei, ai lingeringer epwe kü usun ekkei esap tongeni kunula, pokiten ämi föföringau.
13Ngang üpwe ü ngenikemi, ämi chon Jerusalem mi imweimw lon ewe lemol won ewe achau mi sonosonöch, ämi chokewe mi apasa, ‘Iö epwe tongeni feito o mauneekich, ika iö epwe tongeni tolong lon leniach?’
14Üpwe apwüngükemi fänäsengesin ämi föför. Üpwe aküw eu ekkei lon ämi kewe wöllap, epwe kenala meinisin mine a nom ünükün. Ngang ewe Samol mi Lapalap üa kapas.”
