JAN 11:41-53

⁴¹Avke odile o bar. O Ježiš hazdňa upre o jakha a phenďa: “Dado, paľikerav tuke, hoj man šunďal avri.

⁴²Me džanavas, hoj man furt šunes, ale oda phenďom anglo nipi, save ade ačhen, hoj te pačan, hoj man tu bičhaďal.”

⁴³Sar oda phenďa, vičinďa zorale hangoha: “Lazar, av avri!”

⁴⁴O mulo avľa avri. O pindre the o vasta leske sas zaphandle le fašťenca a leskero muj sas zakerdo andre le khosneha. O Ježiš lenge phenďa: “Rozphanden les a muken te džal het!”

⁴⁵But džene ole Židendar, save avle pal e Maria, dikhle so kerďa o Ježiš, a pačanďile andre leste.

⁴⁶Ale varesave džene lendar gele ko Farizeja a phende lenge, so kerďa o Ježiš.

⁴⁷Akor zvičinde o nekbareder rašaja the o Farizeja e Bari Rada a phende: “So keraha? Bo kada manuš kerel but znameňja!

⁴⁸Te les mukaha avke, savore pačana andre leste! Avena o Rimana a zňičinena o chramos the amaro narodos!”

⁴⁹Jekh dženo lendar, o Kajfaš, savo sas oda berš nekbareder rašaj, phenďa: “Tumen na džanen ňič!

⁵⁰Na achaľon, hoj tumenge hin feder te merela jekh manuš vaš o nipi, sar te muľahas calo narodos.”

⁵¹Vašoda, hoj sas oda berš nekbareder rašaj, na phenďa oda korkoro pestar, ale prorokinďa, hoj o Ježiš merela vaš o narodos,

⁵²a na ča vaš o narodos, ale the hoj te anel pale le rozčhide čhaven le Devleskere jekhetane.

⁵³Avke ole dživesestar pes dovakerde, hoj les murdarena.