Isanquienare Joa 11:41-53

⁴¹Irosati itivironcanteetajaro mapi. Yamenanaque Jesoshi jenoqui, icantanaque: —Ariove, Apa, niotaque piquemaquena.

⁴²Niotaque irosati picanta piquemapinitana. Jeri oshequi catiimojeitanari. Nocoaque iriojeite pitiancaquena, irootaque noquenquetsatacantimpiri.

⁴³Irosati icajemasanotantanaca: —Irasaro, pintinaanaje, pimpocaje.

⁴⁴Irosati isoquijantanaja camavetainchari. Ora chapinqui yoisotanteetavacariri tocoyatsa: iracoqui, iitiqui, maaroni. Ipashicavorotanteetavacariri paanio. Icantiri Jesoshi: —Poisoreajeri, pishineteri irijataje.

⁴⁵Joriopee, yora tsipajeitacarori Maria, ineacojeitaqueri Jesoshi. Oshequi quemisantajeitanaqueriri;

⁴⁶itsipapee ijatashitaqueri variseopee, icamantacotapaaqueri Jesoshi.

⁴⁷Yora jivatacaajeitiriri saserotepee, jeri aisati variseo, yapatojeitaqueri pincatsaripee oametavacaajeitainchari. Icantavacaajeitaca: —¿Paita antajeiteri? Yora shirampari oshequi itasoncantapinitaque.

⁴⁸Ariorica ashinetajeri aisati, ario inquemisantajeitanaqueri maaroni atiri; impoiji ipocashijeiteecari oromasati, itireayetirocari ivanco Tasorentsi. Ipoyereajeiteecari, maaroni.

⁴⁹Itsipajeitari anta Caijashi iriori. Meeca osarintsi ipincatsariventiri saserotepee. Icantanaque iriori:

⁵⁰—Tecatsi piojeite avinti. Te pinquenqueshireempaji. Pamenajeite: ocameetsatimojeitee incameta shiramparinta aparoni, iroavisacojeitantajeeri eiro apoyereajeitantatsi.

⁵¹Te incantashitearoji oca. Iriotaque pincatsariventajeitiriri maaroni saserotepee. Yoametiri Tasorentsi, iotantacari incamimentajeiteri Jesoshi maaroni joriopee.

⁵²Te apaniro incamimentajeiteri joriopee, irointi incamimenteri maaroni atiri intomintajeiteari Tasorentsi. Inashijeiveta, isavicajeiti nampitsipeequi arejipeequiniri, iro cantaincha incamimenteri irampatojeitanteariri maaroni.

⁵³Irosati isareajeitantacariri iroyeri Jesoshi.