1Sas jekh nasvalo, o Lazar, andral o gav Betanija, kaj bešenas e Maria the lakeri pheň Marta.
2Odi Maria pomakhľa le Rajes le olejoha a khosľa leske o pindre le balenca. Lakero phral Lazar sas nasvalo.
3Avke ola pheňa dine le Ježišoske te phenel: “Rajeja, oda, kas tu rado dikhes, hino nasvalo.”
4Sar o Ježiš oda šunďa, phenďa: “Kada nasvaľiben nane pro meriben, ale pre le Devleskeri slava, hoj o Čhavo le Devleskero te el barardo.”
5O Ježiš rado dikhelas la Marta, lakera pheňa the le Lazar.
6Ale sar šunďa, hoj o Lazar hino nasvalo, ačhiľa mek duj džives pre oda than, kaj sas.
7Paľis phenďa le učeňikenge: “Aven, džas pale andre Judsko.”
8O učeňika leske phende: “Rabbi, ča akana tut kamenas o Židi te murdarel le barenca a pale ode džas?”
9O Ježiš odphenďa: “Či nane dešuduj (12) ori andro džives? Te vareko phirel dživese, na perela, bo dikhel o svetlos kale svetoskero.
10Ale te phirel vareko rači, perela, bo nane andre leste o svetlos.”
11Pal kala lava lenge phenďa: “Amaro prijaťeľis Lazar zasuča, ale džav, hoj les te uštavav.”
12Akor leske o učeňika phende: “Rajeja, te zasuča, sasťola avri.”
13O Ježiš vakerelas pal leskero meriben, ale on peske gondoľinenas, hoj vakerel pal o soviben.
14Paľis lenge o Ježiš phenďa phundradones: “O Lazar muľa.
15Vaš tumenge som rado, hoj ode na somas, hoj tumen te pačan. Ale aven, džas pal leste!”
16Akor phenďa o Tomaš, saves vičinen Didimos, okle učeňikenge: “Džas the amen, hoj te meras leha!”
17Sar ode avľa o Ježiš, dodžanľa pes, hoj o Lazar imar štar džives pašľol andro hrobos.
18E Betanija sas pašes paš o Jeruzalem, vaj trin kilometri.
19A but Židi avle ke Marta the Maria te preľidžal lenca e dukh pal lengero phral.
20Sar šunďa e Marta, hoj avel o Ježiš, geľa ke leste, ale e Maria ačhiľa khere.
21Avke phenďa e Marta le Ježišoske: “Rajeja, te ade uľalas, miro phral na muľahas.
22Ale the akana džanav, hoj savoro, so mangeha le Devlestar, o Del tut dela.”
23O Ježiš lake phenďa: “Tiro phral ušťela.”
24E Marta leske phenďa: “Džanav, hoj ušťela akor, sar ušťena o mule andral o meriben andro posledno džives.”
25O Ježiš lake phenďa: “Me som oda, ko uštavel le manušen andral o meriben a del len o dživipen. Oda, ko andre mande pačala, choc merela, dživela.
26Ňiko olendar, save dživen a pačan andre ma, šoha (ňikda) na merela. Pačas oleske?”
27Oj leske phenďa: “He, Rajeja, me pačanďiľom, hoj tu sal o Kristus, o Čhavo le Devleskero, savo mušinďa te avel pro svetos.”
28Sar oda phenďa, geľa pale, vičinďa peskera pheňa la Maria a počoral lake phenďa: “O Učiťeľis hino ade a vičinel tut.”
29Sar oda šunďa, ušťiľa sigo a geľa pal leste.
30O Ježiš mek na geľa andro gav, ale ačhiľa mek pro than, kaj ke leste avľa e Marta.
31O Židi, save andro kher zľidžanas la Mariaha e dukh, dikhle, sar sigo ušťiľa a geľa avri. Gele pal late, bo peske gondoľinenas, hoj džal paš o hrobos te rovel.
32Avke e Maria avľa ode, kaj sas o Ježiš, a sar les dikhľa, peľa paš leskere pindre a phenďa leske: “Rajeja, te ade uľalas, miro phral na muľahas.”
33Sar dikhľa o Ježiš, hoj rovel oj the o Židi, save avle laha, zaiľa les oda a avľa leske igen pharo andro jilo
34a phučľa: “Kaj les thoďan?” On leske phende: “Rajeja, av a dikh!”
35A o Ježiš zarunďa.
36Akor phende o Židi: “Dikhen, sar les rado dikhelas!”
37Varesave džene lendar phende: “Či ov, savo phundraďa o jakha le koreske, našťi kerďa vareso, hoj o Lazar te na merel?”
38Le Ježišoske sas pale pharo a avľa ko hrobos, so sas jaskiňa a sas phandlo le bareha.
39O Ježiš phenďa: “Odlen o bar!” E Marta, e pheň le muleskeri, phenďa: “Rajeja, imar khandel, bo hino ode imar štarto džives.”
40O Ježiš lake phenďa: “Či na phenďom tuke, hoj te pačaha, dikheha le Devleskeri slava?”
41Avke odile o bar. O Ježiš hazdňa upre o jakha a phenďa: “Dado, paľikerav tuke, hoj man šunďal avri.
42Me džanavas, hoj man furt šunes, ale oda phenďom anglo nipi, save ade ačhen, hoj te pačan, hoj man tu bičhaďal.”
43Sar oda phenďa, vičinďa zorale hangoha: “Lazar, av avri!”
44O mulo avľa avri. O pindre the o vasta leske sas zaphandle le fašťenca a leskero muj sas zakerdo andre le khosneha. O Ježiš lenge phenďa: “Rozphanden les a muken te džal het!”
45But džene ole Židendar, save avle pal e Maria, dikhle so kerďa o Ježiš, a pačanďile andre leste.
46Ale varesave džene lendar gele ko Farizeja a phende lenge, so kerďa o Ježiš.
47Akor zvičinde o nekbareder rašaja the o Farizeja e Bari Rada a phende: “So keraha? Bo kada manuš kerel but znameňja!
48Te les mukaha avke, savore pačana andre leste! Avena o Rimana a zňičinena o chramos the amaro narodos!”
49Jekh dženo lendar, o Kajfaš, savo sas oda berš nekbareder rašaj, phenďa: “Tumen na džanen ňič!
50Na achaľon, hoj tumenge hin feder te merela jekh manuš vaš o nipi, sar te muľahas calo narodos.”
51Vašoda, hoj sas oda berš nekbareder rašaj, na phenďa oda korkoro pestar, ale prorokinďa, hoj o Ježiš merela vaš o narodos,
52a na ča vaš o narodos, ale the hoj te anel pale le rozčhide čhaven le Devleskere jekhetane.
53Avke ole dživesestar pes dovakerde, hoj les murdarena.
54Vašoda o Ježiš pes imar na sikavelas maškar o Židi, ale geľa odarik andro phuva paš e pušťa, andro foros Efrajim. Ode ačhiľa peskere učeňikenca.
55E Patraďi sas pašes a but džene gele angle Patraďi andro Jeruzalem, hoj pes te obžužaren.
56Akor rodenas le Ježiš a sar ačhenas andro chramos, phenenas jekh avreske: “So phenen? Avela ov pro inepos?”
57Ale o nekbareder rašaja the o Farizeja imar dine prikazis, hoj te vareko pes dodžanela, kaj hino o Ježiš, mušinela oda te phenel avri, hoj les te chuden.
