Jone 11:41-53

⁴¹Dokopa dupame kana doko nyoo kapya leami. Dopa peteaminopa Jisasame kaiti-kisa kandalyetae katao, “Apane, embame nambanya pii doko silino dokonya nambame emba kandao yaka pilino lelyo.

⁴²Embame koteaka lao nambanya pii singi doko nambame masilyo. Nambame dopa lelyo doko, endakali ae kalyamino datupame namba embame puu leenopa epee lamo lao masoo minina lao lelyona,” lea.

⁴³Dopa latala baame puu lao lao pituu, “Lasatasa, emba kamaka ipu!” lea.

⁴⁴Dopa leamopa akali kumiamo doko kamaka epea. Baanya moko kingipi dupa banisa kendeme yaki piaminoli petae, baanya lengelyaapi dupa lapalapame malu pyaanya ambo piaminoli petayaka epeamosa, Jisasame dokaita lamaiyoo, “Tata lao nepatakamaitala pena kayalapa,” lea.

⁴⁵Juta endakali longo Matia kanja epeamino dupame Jisasame piamo doko kandatala baa lao masoo miniami.

⁴⁶Dopaka doko, yangi dupame pilyoo Patasi dupa kateamisa pupala, Jisasame piamo dupa lamaiyami-pyaa.

⁴⁷Dokopa pitisa mupapi Patasipi dupame kanjole dupa nyoo kambu pyatala lamaiyoo, “Akali dokome kongali longo pilyamo doko naimame aipa pilyamape?

⁴⁸Baame dopaka pyoo katena kayatamano kandao doko, endakali pitakame baa lao masoo minalapimino. Dopa pitaminopa dee Loma tange dupame naimanya losuu anda andake dake kaluoo nepao dee naima tata dupa koyasalapiminona,” leami-pyaa.

⁴⁹Dokopa dupanya akali mende Kayapasa lenge doko, baa ee kana dokonya pitisa mupa joo katea. Dokome dupa lamaiyoo, “Nyakamame kukipi mende masala naelyamino.

⁵⁰Nyakamame dake masala naelyamino: aopyoo latala endakali paliuu pelyamo dupa pitaka alu pitamina akali mendaimi endakali dupa nisoo kumatamo kandao doko epena,” lea-pyaa.

⁵¹Pii doko baa tangenya moname iki masetala laa naya-pyaa. Baa ee kana dokonya pitisa mupa joo katea dokomena potopesa joo Jisasa kumapala Juta endakali dupa nisetana lao lea-pyaa.

⁵²Doko, baa kumapala Juta endakali dupa iki niseta daa. Baame kumapala Gotenya wane wakale kata-kata pilyamino dupa nyoo limbatala tata mendai jina latana lao lea-pyaa.

⁵³Koto gii dokonya pituu tee pyao dupame Jisasa pyao kumasemana lao pii lao kambuiyami-pyaa.