1Sas o džives angle Patraďi. O Ježiš džanelas, hoj avľa leskeri ora, hoj te oddžal andral kada svetos ko Dad, a vašoda, hoj kamelas peskeren, save sas pro svetos, presikaďa lenge baro kamiben.
2Rači paš o chaben o beng imar thoďa andro jilo le Judašiske, saveske sas dad o Šimon Iškarijotsko, hoj les te zradzinel.
3No o Ježiš džanelas, hoj o Dad leske diňa savoro andro vasta a hoj avľa le Devlestar a džal ko Del.
4Ušťiľa pašal o chaben, čhiďa tele o uprune gada a phandľa e leketa pašal peste.
5Paľis čhiďa o paňi andro lavoris, chudľa te thovel (omorel) o pindre le učeňikenge a khoselas la leketaha, so sas phandľi pašal leste.
6Sar avľa paš o Šimon Peter, phenďa leske: “Rajeja, tu mange kames te thovel o pindre?”
7O Ježiš leske odphenďa: “Oda, so me kerav, tu akana na achaľos, ale paľis achaľoha.”
8O Peter leske phenďa: “Šoha tuke na domukava, hoj mange te thoves o pindre!” Ale o Ježiš leske odphenďa: “Te tuke na thovava o pindre, na aveha buter miro učeňikos.”
9Akor leske o Šimon Peter phenďa: “Rajeja, na ča mire pindre, ale the o vasta the o šero.”
10O Ježiš leske phenďa: “Oleske, ko imar pes thoďa, kampel te thovel ča o pindre, bo imar hino calo žužo. The tumen san žuže, ale na savore.”
11Džanelas, ko les zradzinela, vašoda phenďa: “Na savore san žuže.”
12Sar lenge thoďa o pindre, urďa pre peste pale o uprune gada a bešľa peske. Paľis phenďa: “Achaľiľan, so tumenge kerďom?
13Tumen man vičinen ‘Učiťeľina’ the ‘Rajeja’ a mištes phenen, bo me som.
14No te me, tumaro Raj the Učiťeľis, tumenge thoďom o pindre, avke the tumen thoven o pindre jekh avreske.
15Me tumenge sikaďom, sar te kerel, hoj the tumen te keren avke sar me.
16Čačes, čačes phenav tumenge, hoj o sluhas nane bareder sar leskero raj, aňi oda, savo sas bičhado, nane bareder sar oda, ko les bičhaďa.
17Te oda džanen, bachtale san, te oda the keren.
18Na vakerav pal tumende savorende. Me džanav, kas mange avri kidňom, ale hoj pes te ačhel oda, so hin pisimen: ‘Oda, ko manca chal o maro, chudľa pre ma te džal.’
19Phenav tumenge oda akana, hoj paľis, sar pes oda ačhela, te pačan hoj Me Som.
20Čačes, čačes phenav tumenge: Oda, ko prilel oles, kas me bičhavava, man prilel, a ko man prilel, prilel oles, ko man bičhaďa.”
21Sar oda vakerelas o Ježiš, sas leske phares pro jilo a phenďa lenge phundradones: “Čačes, čačes phenav tumenge, jekh tumendar man zradzinela.”
22O učeňika dikhenas jekh pre aver, bo na achaľonas, pal kaste vakerel.
23Jekh leskere učeňikendar – oda, saves o Ježiš rado dikhelas – sas igen pašes paš o Ježiš.
24O Šimon Peter leske sikaďa, hoj te phučel, pal kaste vakerel.
25Oda učeňikos zmukľa o šero pašeder ko Ježiš a phučľa lestar: “Rajeja, ko hin oda?”
26O Ježiš odphenďa: “Oda, kaske me podava o močimen maro.” Močinďa o maro a diňa le Judašiske, saveske sas dad o Šimon Iškarijotsko.
27Sar o Judaš iľa o maro, o satan takoj avľa andre leste. O Ježiš leske phenďa: “Oda, so kames te kerel, ker sigo.”
28Ale ňiko lendar, save bešenas pašal o skamind, na achaľile, soske leske o Ježiš oda phenďa.
29Vaš oda, hoj le Judašiste sas o gonoro le lovenca, varesave učeňika peske gondoľinenas, hoj leske phenel: “Dža, cin oda, so kampel pro inepos,” abo: “De vareso le čoren.”
30Sar iľa o Judaš o maro, geľa avri. A sas rat.
31Sar o Judaš geľa avri, phenďa o Ježiš: “Akana hin oslavimen o Čhavo le Manušeskero a o Del hin oslavimen andre leste.
32A te hin oslavimen andre leste, the o Del les oslavinela korkoro andre peste a takoj les oslavinela.
33Čhave mire, imar na avava but tumenca. Rodena man a avke, sar phenďom le Židenge, the tumenge akana phenav: Ode, kaj me džav, tumen našťi aven.
34Nevo prikazaňje tumen dav: Kamen jekh avres. Avke, sar me tumen kamavas, the tumen kamen jekh avres.
35Pal oda prindžarena savore, hoj san mire učeňika, te ela o kamiben maškar tumende.”
36O Šimon Peter leske phenďa: “Rajeja, kaj džas?” O Ježiš leske odphenďa: “Kaj me džav, ode pal ma akana našťi aves, ale paľis pal ma aveha.”
37O Peter leske phenďa: “Rajeja, soske našťi džav akana pal tu? Me o dživipen vaš tu dava!”
38O Ježiš leske odphenďa: “Tu vaš ma o dživipen deha? Čačes, čačes phenav tuke, hoj medik o kohutos na giľavela, tu man trival zaprineha.”
