1“Te na pes tumaro jilo daral! Pačan andro Del, pačan the andre ma.
2Andre mire Dadeskero kher hin but khera, te oda na uľahas avke, phenďomas tumenge, hoj tumenge džav te pririchtinel o than?
3Sar oddžava a pririchtinava tumenge o than, avava pale a lava tumen ke mande, hoj te aven ode, kaj som me.
4Tumen džanen o drom kaj džav.”
5O Tomaš leske phenďa: “Rajeja, na džanas, kaj džas. Sar šaj džanas o drom?”
6O Ježiš leske phenďa: “Me som o drom, o čačipen the o dživipen. Ňiko na avela ko Dad, te na prekal ma.
7Te prindžarďanas man, prindžarďanas the mire Dades. Akanastar les imar prindžaren a imar les dikhľan.”
8O Filip phenďa: “Rajeja, sikav amenge le Dades. Na kampel amenge buter.”
9O Ježiš leske phenďa: “Kajci but som tumenca a na prindžarďal man, Filip? Ko man dikhľa, dikhľa le Dades. Sar šaj phenes: ‘Sikav amenge le Dades?’
10Na pačas, hoj me som andro Dad a o Dad andre ma? O lava, so tumenge vakerav, na vakerav korkoro mandar. Ale oda kerel o Dad, savo dživel andre mande.
11Pačan mange, hoj me som andro Dad a o Dad andre mande. A te na, akor pačan vaš oda, so kerav!
12Čačes, čačes phenav tumenge, hoj the oda, ko pačal andre ma, kerela o skutki, save me kerav – a mek bareder kerela, bo me džav ko Dad.
13Me kerava savoro, so mangena andre miro nav, hoj te el o Dad oslavimen andro Čhavo.
14Te mangena mandar vareso andre miro nav, me oda kerava.”
15“Te man kamen, doľikerena mire prikazaňja.
16A me mangava le Dades a dela tumen le Duchos, savo tumenge pomožinela a ľidžala. Ov, o Duchos le čačipnaskero, ela tumenca pro furt. O svetos les našťi prilel, bo les aňi na dikhel aňi na prindžarel. Ale tumen les prindžaren, bo dživel maškar tumende a ela andre tumende.
18Na omukava tumen sar široti, avava ke tumende.
19Mek sikra a o svetos man buter na dikhela, ale tumen man dikhena. Vašoda, hoj me dživav, the tumen dživena.
20Andre oda džives tumen prindžarena, hoj me som andre miro Dad a tumen andre mande a me andre tumende.
21Ko prilel mire prikazaňja a doľikerel len, oda man kamel. A oda, ko man kamel, oles kamela miro Dad; a the me les kamava a sikavava man leske.”
22O Judaš, ale na oda Iškarijotsko, phenďa: “Rajeja, sar oda, hoj kames amenge tut te sikavel a na le svetoske?”
23O Ježiš leske odphenďa: “Te man vareko kamel, doľikerela miro lav a miro Dad les kamela. A amen avaha ke leste a dživaha leha.
24Oda, ko man na kamel, na doľikerel mire lava. O lav, so šunen, nane miro, ale le Dadeskero, savo man bičhaďa.
25Kada tumenge phenďom, medik somas tumenca.
26Ale o Sentno Duchos, savo tumenge pomožinela, saves bičhavela o Dad andre miro nav, ov tumen sikavela savoreske a leperela tumenge savoro, so tumenge phenďom.
27Smirom tumenge mukav; miro smirom tumenge dav. Ale me les tumenge na dav avke, sar kada svetos. Tumare jile pes te na trapinen aňi te na predaran!
28Šunďan, hoj tumenge phenďom: ‘Džav a pale avava ke tumende.’ Te man kamľanas, radisaľiľanas, hoj phenďom: ‘Džav ko Dad,’ bo o Dad hino bareder sar me.
29Phenďom tumenge akana, sigeder sar pes oda ačhela, hoj tumen te pačan, sar pes oda ačhela.
30Imar na vakerava but tumenca, bo avel o princos le svetoskero. Nane les zor upral mande,
31ale hoj o svetos te prindžarel, hoj kamav le Dades, kerav savoro, so mange prikazinďa. Ušťen, džas adarik!”