San Juan 11:41-53

⁴¹Chiyru bdzɨcádeb guiaqui. Ax bguiaa Jesús nez llayabaa guniigany: —Xtada, xtiosten laabiu pur ni abaanbiu cuend xtiidxa.

⁴²Nare nanchuua dec hórtisy runbiu cuend naa. Per rniia ziy pur de bniety ni zuguaa rurén par chaldilaazdeb dec laabiu bxiaaldbiu nare.

⁴³Chi gulull guniiny ziy, ax gurɨxtiany: —¡Lázaro, bdiia láanquɨ!

⁴⁴Chiy bdiia Lázaro láani baaqui zectisy ni liiby de naab cun de niib cun de vend ni bduuibbɨ ne dxíi tuby panit lob. Chiyru raipy Jesús laadeb: —Gulxaicquibɨ, ne gulsaan guiab.

⁴⁵Parzi zienzi de bniety Israel ni baany company María, güeldilaazdeb Jesús pur ni gunádeb milagrɨ ni baanny.

⁴⁶Per nuudeb ax güetixteedeb lo de fariseu xi baany Jesús.

⁴⁷Chiy de fariseuqui cun de bxoz ni rnabee bdxasaadeb par dún xa gúndeb ax guniideb: —¿Xa xquel idxannɨ an? Bnietquɨ zienzi de milagrɨ cayunbɨ.

⁴⁸Ne belati chalaa isaannɨ, ira bniety zeldilaaz laab. Chiy de gurtisy xte Roma zeeddeb par initlodeb xquiudoon ne naciony xtennɨ.

⁴⁹Per tuby saadeb ni lá Caifás bxozroo ni rnabee lo izqui laab guniib: —¿Ta quɨt gántɨ

⁵⁰ne ta quɨt racbeet dec par dunnɨ güenru su gaty tubyzi bniety pur ira bniety Israel, xlat ni nitlo naciony xtennɨ?

⁵¹Per Caifásqui quɨt guniitib ziy pur xgabzib. Pur ni náb bxozroo lo izqui, ningui bguaad Dios laab de diidxqui ax guniib dec Jesús gaty pur irate de bniety Israel.

⁵²Ne gati purzíti de bniety Israel sino que par gacdeb tubyzi cun irateru de xpɨny Dios ni nuu iduibte lo guɨchliu.

⁵³Ningui desde dxiqui baany de gurtisy Israel xgab quinxúdeb Jesús.