ᤕᤢᤜᤢᤴᤏᤠ 11:41-53

⁴¹ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤌᤠ᤺ᤱ ᤀᤥᤔᤧᤳᤋᤢᤖ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤀᤠᤒᤣᤗᤡ᤺ᤴ ᤁᤧᤄᤧᤵᤛᤢᤒᤠᤀᤥ ᤏᤥᤃᤧᤴᤗᤥ॥

⁴²ᤂᤧᤏᤧ᤹ᤃ ᤛᤍᤠᤍᤡᤱ ᤀᤠᤒᤣᤗᤡ᤺ᤴ ᤁᤧᤄᤧᤵᤛᤢ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ. ᤁᤖ ᤀᤡᤱᤃᤠ᤹ ᤁᤵᤔᤥ ᤀᤠᤄᤡᤖᤡ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤕᤠᤵᤔᤡ ᤁᤧᤒᤠᤱᤄᤧᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤒᤠᤖᤥ॥”

⁴³ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤳᤋᤢ. “ᤗᤠᤈᤖᤛ᤻ᤛᤣ. ᤗᤠ᤺ᤰᤁᤠᤳ ᤗ᤺ᤴᤍᤧ᤹ᤀᤥ᥄”

⁴⁴ᤁᤧᤛᤡ᤺ᤒᤠ ᤗᤠᤈᤖᤛᤧᤴ ᤗᤠ᤺ᤰᤁᤠᤳ ᤗ᤺ᤴᤍᤧ. ᤂᤢᤏᤧ᤹ ᤁᤢᤗᤠᤱ ᤏᤢ ᤁᤢᤜᤢᤰᤜᤠ᤹ ᤆᤣᤍᤣ᤺ᤳᤋᤡᤸᤗᤧ ᤁᤢᤓᤠᤰ ᤁᤢᤓᤠᤰ ᤔᤧᤃᤡᤳᤋᤢᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤁᤢᤏᤠᤖᤠ᤺ᤴᤏᤠᤱ ᤆᤡᤖᤡᤰᤁᤡᤸᤗᤧ ᤔᤧᤍᤧᤵᤋᤢᤀᤠᤱ ᤐᤳᤇᤧᤖᤥ॥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤣᤍᤣ᤺ᤳᤋᤡᤴ ᤑᤠ᤺ᤰᤂᤧᤶ ᤐᤡᤖᤧᤶᤔᤧ᤹ᤀᤠᤱ ᤐᤣ᤺ᤰᤗ ᤕᤠ᤺ᤴᤍᤧᤶᤔᤧ᤹॥”

⁴⁵ᤂᤧᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤔᤖᤡᤕᤔᤖᤧ ᤁᤢᤍᤢᤶᤛᤧ ᤁᤧᤍᤠ᤺ᤒᤠᤀᤠᤱ ᤁᤧᤘᤠ᤹ᤒᤠ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥

⁴⁶ᤁᤖ ᤁᤢᤓᤠ ᤔᤏᤠᤜᤠ᤹ᤃ ᤑᤖᤡᤛᤡᤜᤠ᤹ᤀᤥ ᤔᤧᤒᤣᤀᤠᤱ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤔᤧᤈᤧᤰᤋᤢᤛᤡ॥

⁴⁷ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤐᤠ᤺ᤴᤎᤰᤛᤧ ᤕᤜᤢᤍᤡ ᤕᤧᤈᤢᤶᤓᤥ ᤕᤢᤱᤔᤠ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤸᤗ ᤀᤠᤏᤡ᤹ ᤌᤣ ᤀᤠᤈᤥᤃᤢᤶᤒᤠᤒᤣ᥅ ᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢᤛᤡ॥ ᤁᤴ ᤔᤏᤠ᤺ᤸᤗᤧᤃ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤆᤥᤃᤢᤖ ᤘᤠ᤹ᤖᤥ॥

⁴⁸ᤒᤠ ᤀᤰᤂᤣ ᤗᤧᤵᤔᤠᤏᤧ ᤑᤠ᤹ᤃᤪ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢ᤹ᤀᤠᤱ ᤔᤧᤍᤡᤶᤍᤢ᤹॥ ᤜᤧᤰᤁᤩᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤔᤧᤍᤠᤀᤠᤱ ᤔᤠᤱᤜᤡᤶᤔᤡᤴ ᤏᤢ ᤀᤠᤏᤡ᤹ ᤛᤢᤘᤠᤱᤜᤠ᤹ ᤔᤧᤔᤧᤰᤂᤢᤛᤡ᤹ᤖᤥ॥

⁴⁹ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ᥄

⁵⁰ᤁᤠᤰ ᤀᤠᤏᤡ᤹ ᤗᤠᤈᤣ᤹ᤀᤡᤴ ᤔᤧᤰᤔᤠᤏᤢ᤺ᤸᤗᤧ ᤁᤴ ᤗᤳᤇᤠ ᤔᤏᤠ᤺ᤴ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤛᤡ᤺ᤸᤗᤧ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹॥”

⁵¹ᤂᤢᤏᤧ᤹ ᤁᤴ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤔᤧ᤺ᤴᤗᤥ. ᤁᤖ ᤂᤢᤏᤧ᤹ᤃ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴ ᤗᤠᤈᤣ᤹ᤖᤧ ᤗᤠᤃᤡ ᤛᤡ᤺ᤔᤠ ᤐᤥ᤺ᤱ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤒᤠᤖᤥ.

⁵²ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤔᤧ᤺ᤴ. ᤁᤖ ᤘᤣ᤹ ᤗᤠᤈᤣ᤹ᤜᤠ᤹ᤀᤥ ᤁᤠᤰ ᤁᤧᤛᤧᤒᤠᤀᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤛᤥᤖᤡᤰ ᤋᤠ᤺ᤵᤔᤠᤛᤡᤀᤠᤱ ᤌᤡᤰᤜᤢᤵ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤂᤧᤸᤗᤧ ᤐᤠ᤺ᤳᤋᤢᤒᤠᤖᤥ॥

⁵³ᤜᤧᤰᤁᤣ᤺ᤸᤗᤧ ᤂᤧᤴ ᤕᤧᤴᤏᤠᤱᤎᤥ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤧᤵᤔᤠ ᤑᤠ᤹ᤀᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥