Isɑ̃ɑ̃ 6:15-60

¹⁵Kɛ̀ Yesu nsɔ̃́ mbɛ̀ dɔ́ kóò pĩ ntikpɑ̀tì nɛ̀ muwɛ̃rímú, kɛ́wɛ̃tɛ kɛ́dekɛ ditɑ̃rì o mɑ́ɑ̀ borɛ̀.

¹⁶Kuyuoku mɔ̀nnì kòo tɑncɔ́ùmbɛ̀ɛ kɔtɛ mɛniɛ mborɛ̀,

¹⁷kɛ́dekɛ kudɑbɛkù kɛ́nsenti Kɑpɛnnɑummu bíɛ́kɛ̀, kɛ sɔ̃́ ndɛ̀ bììtɛ kɛ̀ Yesu mu nyí wɛ̃̀tɛní bɛ borɛ̀.

¹⁸Kɛ̀ kuyɑɑkperikú mɑkùu ítɛ́ kɛ́nfuuti kɛ íinko yɛnɛ́fĩ̀nfĩ̀rɛ̀.

¹⁹Dɛ̀ do bo nsɔ̃́ mbɛ̀ tùɔ̀kɛ cìdòmɛ́tìrìbɛ̀ bɛ̀nùmmù yoo bɛ̀kuɔ̀, kɛ́yɑ̀ Yesu kòò kéróo mɛniɛ nyĩ́nkɛ̀ kɛ bɛ̀ tɔ́ɔ́ntoo kɛ̀ kufɔ̃wɑɑ́ mbɛ̀ pĩ.

²⁰Kɛ̀ Yesu bɛ̀ nɑ̀kɛ́ kɛ dɔ̀: Mí nwe! Kufɔ̃wɑɑ́ mbɑ́ɑ́ di pĩ́.

²¹Kɛ̀ bɛ̀ ndɔ́ kóò tùótɛ́nɛ̀ kudɑbɛkù kɛ́yɑ̀ bɛ̀ pɑ̃̀nkɛ tùɔ̀kɛmɛ̀ bɛ̀ kɔ̀ri kɛ̀.

²²Kɛ̀ dɛ̀ɛ wentɛ́ kɛ̀ bɛ̀ɛ̀ kpɑɑ́ mɛniɛ nyɑ́ɑ̀ bɛ̀ wee ìtɛ́ dɛ̀, kɛ̀ bɛ̀ɛ dentɛní kudɑbɛkù wee dɛ̀ bomɛ̀ kumɑ́ɑ̀ ndi, kɛ̀ Yesu tɑncɔ́ùmbɛ̀ɛ kù tɑ kɛ́ítɛ́ bɑ́ ò í nɛí.

²³Dɛ mɔ̀nnì kɛ̀ tidɑbɛɛtì mɑtì bonní Tiberiyɑti kɛ́tuɔkɛní Yesu wee sɑ̃ntɛ dɛ̀ Kuyie mpɛ̃́ɛ̃̀ kpɛ́í kɛ̀ bɛ̀ɛ dɛ̀ cɑ̀ɑ́kɛ́.

²⁴Bɛnìtìbɛ̀ bɑntɛ́ dìì mɔ̀nnì kɛ dò nYesu nɛ̀ o tɑncɔ́ùmbɛ̀ bɛ̀ í dɛ̀ kpɑɑ́ kɛ́tɑ dɛ kó tidɑbɛɛtì kɛ́kɔtɛ Kɑpɛnnɑummu o wɑmmù.

²⁵Bɛ̀ yɑ̀ dìì mɔ̀nnì Yesu kóo bekɛ kɛ dɔ̀: Okótì, ɑ tùɔ̀kɛní diɛ ɔ̃̀mmɔ̀nnì?

²⁶Kɛ̀ Yesu bɛ̀ tɛ̃̀ńnɛ́ kɛ dɔ̀: N di nɑ́ɑ́ mɔ́mmuɔ nwe, di n wɑnti kɛ nɑɑti kɛ yɛ̃́ di wee cɑ̀ɑ́kɛ́mɛ̀ pɛ̃́ɛ̃̀bɛ̀ kɛ́nsɑ̀nnɛ̀, dɛ̀ í tú di yɑ̀ mɛ̀ɛ̀ kpɛ́í n dɔɔri dɛ̀.

²⁷Di bɑ́ mpĩ́ mmutɔ̃mmú mudiì mùù yóó cɑkɛ mu kpɛ́í, mpĩ́nnɛ̀ mùù í yóó cɑkɛ mu kpɛ́í, mùù yóó di duɔ́ mmufòmmu mùù bo sɑ̃́ɑ̃̀. Onìtìbirɛ dɔ́ kɛ́ mu ndi duɔ́ nkɛ yɛ̃́ o cicɛ Kuyie nhò cɑ̀nnɛmɛ̀ koò duɔ́ mmuwɛ̃rímú.

²⁸Kɛ̀ bɛ̀ɛ ò bekɛ kɛ dɔ̀: Ti dò nkɛ́dɔɔ̀ bɑ kɛ pĩ́ nKuyie ntɔ̃mmú?

²⁹Kɛ̀ Yesu bɛ̀ tɛ̃̀ńnɛ́ kɛ dɔ̀: Kuyie nkó mutɔ̃mmú tú di bo ntɑ̃́mɛ̀ kù tɔ̃nní wè.

³⁰Kɛ̀ bɛ̀ɛ ò bekɛ kɛ dɔ̀: A bo nɑ kɛ́dɔɔ̀ ɔ̃̀nti diɛtì kɛ̀ ti yɑ̀ kɛ nɛ́ ntɑ̃́, ɑ bo nɑ kɛ́dɔɔ̀ ɔ̃̀mmu tɔ̃mmú!

³¹Ti yɛmbɛ̀ do dimu mɑ́nnì dikpɑ́ɑ̀ miɛkɛ, kɛ́ndònnɛ̀ tì wɑ̃̀rimɛ̀ kɛ tú: Kù bɛ̀ duɔ́ nkɛĩ́nkɛ̀ kó mudiì kɛ̀ bɛ̀ di.

³²Kɛ̀ Yesu bɛ̀ tɛ̃̀ńnɛ́ kɛ dɔ̀: N di nɑ́ɑ́ mmɔ́mmuɔ nwe, dɛ̀ í tú Mɔyiisi weè di duɔ́ kɛĩ́nkɛ̀ kó mudiì, n cicɛ weè di duɔ̀ kɛĩ́nkɛ̀ kó mudiì mɔ́mmɔmmu.

³³Kuyie nduɔ̀ mùù diì tú wèè cùtɛ́ní kɛĩ́nkɛ̀ kɛ duɔ̀ mmufòmmu kutenkù.

³⁴Dɛ mɔ̀nnì kɛ bɛ dɔ̀: Okótì, ńti duɔ̀ ndɛ kó mudiì sɑ̃́ɑ̃̀.

³⁵Kɛ̀ Yesu bɛ̀ nɑ̀kɛ́ kɛ dɔ̀: Míì tú mudiì mùù duɔ̀ mmufòmmu, wèè kɔ̀tɛní m borɛ̀ dikònnì tɛ̃́nkɛ bɑ́ɑ́ ò pĩ, wèè n tɑ̃́ sinɛ́yɛ̃ĩ tɛ̃́nkɛ bɑ́ɑ́ ò pĩ.

³⁶M mɛ̀ nti ndi nɑ̀kɛ́: Di n yɑ̀mu, di mɛ nyí tɑ̃́.

³⁷N cicɛ n duɔ́ mbɛ̀ bɛmɔu bɛ̀ kɔ̀rinímu m borɛ̀, m mɛ nyí yóó yetɛ òmɔù!

³⁸Kɛ yɛ̃́ n cùtɛ́nímɛ̀ kɛĩ́nkɛ̀ kɛ bo dɔɔ̀ wèè n tɔ̃nní ò dɔ́mɛ̀ mmɛ, dɛ̀ í tú m mɔ́mmuɔ n dɔ́mɛ̀.

³⁹Wèè n tɔ̃nní ò í dɔ́ n fétìnnɛ ò n duɔ́ mbɛ̀ kóò mɔù, ò dɔ́ n duɔ́ nkɛ̀ bɛ̀ɛ yɑ̃́ntɛ́mu diyiè sɔnni yiè.

⁴⁰N cicɛ dɔ́ bɛ̀ɛ̀ kó dimɑ̀ɑ̀ yɑ̀ dɛbirɛ kɛ dɛ̀ tɑ̃́ bɛ̀ mmɔkɛmu mufòmmu mùù bo sɑ̃́ɑ̃̀, kɛ̀ dɛ̀ɛ duɔ́ nkɛ̀ bɛ̀ɛ yɑ̃́ntɛ́ diyiè sɔnni yiè.

⁴¹Kɛ̀ dɛ̀ɛ yonkɛ Sifubɛ Yesu yĩ mɛ̀ɛ̀ kpɛ́í nhò tú mudiì mùù cùtɛ́ní kɛĩ́nkɛ̀.

⁴²Kɛ̀ bɛ̀ dɔ̀: Sosɛfu kó dɛbirɛ ndɛ, kɛ̀ ti yɛ̃́ o cicɛ nɛ̀ o yɔ̃, ò bo yĩ́mɛ kɛ́nɑ kɛ dɔ̀ o cùtɛ́ní kɛĩ́nkɛ̀.

⁴³Kɛ̀ Yesu dɔ̀: Bɑ́ nhũntínɛ̀ dimɑ́ɑ̀.

⁴⁴N cicɛ wèè n tɔ̃nní, kòò í yũ̀ɔ̃́nní òmɔù, ò bɑ́ɑ́ nɑ kɛ́kɔtɛní m borɛ̀, kɛ̀ n duɔ́ nkòo yɑ̃́ntɛ́ diyiè sɔnni yiè.

⁴⁵Kuyie mpɑ̃ɑ̃nɑ́ɑǹtì nɑ́ɑm̀bɛ̀ pɑ́tɛ miɛkɛ tì wɑ̃̀ri kɛ tú Kuyie mbo bɛ̀ duɔ́ nyitié. Wèè kèè Cicɛ tié nkɛ ì yie nweè kɔ̀riní m borɛ̀.

⁴⁶Dɛ̀ í tú n yɛ̃ nhòmɔù yɑ̀ Cicɛ Kuyie, wèè ìtɛ́ní Cicɛ Kuyie mborɛ̀ weè kù yɑ̀.

⁴⁷N di nɑ́ɑ́ mmɔ́mmuɔ nwe, wèè n tɑ̃́ ò mɔ̀kɛmu mufòmmu mùù bo sɑ̃́ɑ̃̀.

⁴⁸Míì tú mudiì mùù duɔ̀ mmufòmmu.

⁴⁹Di yɛmbɛ̀ do dimu mɑ́nnì dikpɑ́ɑ̀ miɛkɛ nɛ̀ mɛmmɛ kɛ ku.

⁵⁰Mudiì mùù cùtɛ́ní kɛĩ́nkɛ̀ muù tú muu, wèè mù di ò bɑ́ɑ́ kú.

⁵¹Míì tú mudiì mùù cùtɛ́ní kɛĩ́nkɛ̀ kɛ duɔ̀ mmufòmmu. Kɛ̀ wèè di dɛ kó mudiì ò yó nfòùmu sɑ̃́ɑ̃̀. N yóó pɑ̃ mùù diì tú n kɔ̃̀ntì, n yóó mu mpɑ̃ kɛ̀ dɛ̀ɛ yie nkɛ̀ bɛnìtìbɛ̀ nfòù.

⁵²Ò bɛ́i mmɛmmɛ, kɛ̀ Sifubɛ ńnɛì bɛmɑ́ɑ̀ mɛdiɛ̀ nkɛ tú: Ò bo yĩ́mɛ kɛ ti duɔ́ nho kɔ̃̀ntì kɛ̀ ti cɑ́ɑ́kɛ́.

⁵³Kɛ̀ Yesu bɛ̀ nɑ̀kɛ́ kɛ dɔ̀: N di nɑ́ɑ́ mmɔ́mmuɔ nwe, kɛ̀ di í cɑ̀ɑ́kɛ́ Onìtìbirɛ kɔ̃̀ntì kɛ yɑ̃̀ dɛ yĩ̀ĩ̀ ndi bɑ́ mmɔkɛ mufòmmu.

⁵⁴Wèè cɑ̀ɑ́ n kɔ̃̀ntì kɛ yɔ̃ n yĩ̀ĩ̀ weè mɔ̀kɛ mufòmmu mùù bo sɑ̃́ɑ̃̀, kɛ̀ n yóó duɔ́ nkòo yɑ̃́ntɛ́ diyiè sɔnni yiè.

⁵⁵Kɛ yɛ̃́ n kɔ̃̀ntì tiì túmɛ̀ mudiì mɔ́mmɔmmu, kɛ̀ n yĩ̀ĩ̀ ntú mɛniɛ mmɔ́mmɔmmɛ.

⁵⁶Wèè cɑ̀ɑ́ n kɔ̃̀ntì kɛ yɔ̃̀ n yĩ̀ĩ̀ weè n tɑunɛ̀, kɛ̀ nh ò tɑunɛ̀.

⁵⁷N cicɛ wèè n tɔ̃nní ò fòùmu sɑ̃́ɑ̃̀, kɛ te kɛ̀ n fòù. Mɛɛ̀ botí nku wèè cɑ̀ɑ́ n kɔ̃̀ntì m bo ntemɛ̀ kòò nfòù.

⁵⁸Míì tú mudiì mùù cùtɛ́ní kɛĩ́nkɛ̀, mù í wɛ̃ńnɛ̀ di yɛmbɛ̀ do di mù kɛ́kú. Wèè bo di dɛ kó mudiì ò bo nfòù sɑ̃́ɑ̃̀.

⁵⁹Kɑpɛnnɑummu kó kutííntouku miɛkɛ nkɛ Yesu do nɑ̀kɛ́mɛ̀ dɛ kó tinɑ́ɑǹtì.

⁶⁰Bɛ̀ kèè dìì mɔ̀nnì Yesu bɛ́immɛ̀ dɛ kó tinɑ́ɑǹtì kòo tɑncɔ́ùmbɛ̀ sṹkùbɛ̀ dɔ̀: Dɛ kó tinɑ́ɑǹtì yóumu, we mbo nɑ kɛ́ tì yie.