Iosua 8:6-21

⁶(Isi abo se laolaoma se henaumai) i lau e ai woeaidi eanua murimurina eai, si ene, se dago matada eai doha lahinae va; arinai bena ai dagoedi.

⁷Omi emi aba vesei eai abo au torohai, eanua au girihai, paana Guiau emi Eaubada nimamiu eai eanua abo i reava.

⁸Eanua va abo au girihai, eanua au gabu, doha Guiau ena laugagaeo i ene abo au gabu; au nuatui, ea lauhesomiuo.

⁹Iosua abo i hetamaridi se lau, se lau Betele, eo Eae duaduaridi eai se bavaeamui Eae tupo lalasi eai: nei maieonana ne Iosua tatao boeadi eai ie mia.

¹⁰Maraitomtom, mahana sora, Iosua i toro tatao i hasiridi, ia maena Isaraela edi babada se sae Eae tataodi matadi eai.

¹¹Tatao gamagaridi, tauiala gamagaridi maenaeao se sae se lage eanua hanahanauna eai, e, se abi numa Eae teha bauri eai: edi aba mia eo Eae arotauna duaduari eai.

¹²Tatao 5000 i laedi Beteli eo Eae duaduari eai i hebavaeamuidi eanua tupo lalasi eai.

¹³Tatao va se toredi, moutuadi va eanua teha bauri eai, eo tatao eanua teha lalasi eai se bavaeamui, Iosua maieona eai i dobi arotau gonuna duaduarina eai.

¹⁴Eae edi Vasavasa Isaraela i itadi abo se toroheuheula, eanua tataodi se lau Isaraela se ialaidi, ia, eo ena eanua tataodi gamagaridi hinage, gonu eai se lauesega: tatao va se bavaeamui eanua murimurina eai nige se nuatuidi.

¹⁵Iosua eo Isaraela gamagaridi se boraauridi, se woeawoeaidi arinai se dago barabara dobilana eai.

¹⁶Eae tataodi adi sasagueao gamagaridi se eogaidi bena Isaraela se henaudi, Iosua se henau arinai eanua va se laugabaei.

¹⁷Beteli eo Eae eai nige tau esega i mia, gamagaridi se lau Isaraela hesabadi: eanua se laugabaei, edi eanua dobiladi nige se gududi, Isaraela se aihenaudi, se lau.

¹⁸Guiau i ribalau Iosua arinai, i ene, Alahia nimam eai u abiisini Eae matana eai, Eae nimam eai abo ea reava. Iosua alahia nimana eai abo i abiisini Eae matana eai.

¹⁹Nimana i abiisini va tau vaseina edi aba bavaeamui eai se toroheuheula se aitautau, se avasae eanua eai, se girihai, se gabuheulai.

²⁰Eae tataodi abo se sinibui edi eanua asuasuna se ita i sae gareva eai, nige edi dobila bena se dago, se sae, se dobi, Isaraela se dago borabora va barabara eai abo se uio tauhenaudi matadi eai.

²¹Iosua eo Isaraela gamagaridi se itaeao tauvesevesei eanua se girihaiao, eanua asuasuna i sae, se uio Eae tataodi se unuidi.