Josua 8:6-21

⁶Iwe, repwe towu o cherikem tori aipwe panirela toau seni ewe telinimw. Repwe ekieki pwe aia sü me mwer usun me mwan.

⁷Mürin ämi oupwe ütä seni ämi lenien op o tolong lon ewe telinimw, pun ewe Samol mi Lapalap ämi we Kot epwe atolonga lepöümi.

⁸Iwe, lupwen oupwe liapeni ewe telinimw, oupwe kenala, pun iei usun ewe Samol mi Lapalap a allük. Oupwe pii pwe oupwe föri mine üa allük ngenikemi.”

⁹Mürin, Josua a tinirela. Iwe, ra feila ren ewe lenien op o witiwit pelilotoun Ai lefilen Petel me Ai. Nge Josua a nom ren ekewe aramas lon ewe pwinin.

¹⁰Iwe, Josua a pwätä lesosorusich o körifengeni ekewe sounfiu. Mürin a akomwola mwer, nge ekewe souakomwen Israel ra eti.

¹¹Iwe, ekewe sounfiu meinisin mi eti ra kan ngeni mwen ewe telinimw o asösö peliefengin Ai, nge eu lemol a nom lefiler me Ai.

¹²Iwe, Josua a angei ina epwe ükükün limungeröü mwän o anomuur lon eu lenien op pelilotoun ewe telinimw lefilen Petel me Ai.

¹³Iei usun ra alenia ekewe sounfiu: Ewe mwich mi watte a nom peliefengin ewe telinimw, nge ewe mwich mi op a nom pelilotoun. Nge Josua a nom lon ewe lemol lon ewe pwinin.

¹⁴Iwe, lupwen ewe kingen Ai a küna ekewe re Israel, ir me mwänin ewe telinimw meinisin ra müttir towu lesosor o feila ren ewe lemolun Jortan, pwe repwe maun ngeniir. Nge ewe king esap silei pwe mi wor chon op lükisökürün ewe telinimw.

¹⁵Mürin, Josua me ekewe re Israel meinisin ra tipin timär o sü ngeni ewe fanüapö.

¹⁶Iei mine ekewe meilapen ewe telinimw ra körifengeni ekewe aramas meinisin mi nom lon, pwe repwe tapweri ekewe re Israel. Nge lupwen ra tapweri Josua, ra toauala seni ewe telinimw.

¹⁷Esap wor eman mwän mi chüen nom lon Ai ika Petel, pwe meinisin ra tapweri chon Israel. Ra sukala chök asamalapen ewe telinimw o likitala, nge esap wor eman a mamasa.

¹⁸Iwe, ewe Samol mi Lapalap a üreni Josua, “Kopwe aitietä wokum siles ngeni Ai, pun üpwe atolonga ewe telinimw lepoum.” Iwe, Josua a aitietä wokun siles ngeni ewe telinimw.

¹⁹Lon ewe otun ewe mwichen chon op a müttir ütä seni lon lenier, ra sälong lon ewe telinimw o liapeni. Iwe, ra müttir kenala ewe telinimw.

²⁰Nge lupwen ekewe re Ai ra nenesökür, ra küna ötüötün ekkei seni ewe telinimw mi ötütä läng. Iwe, esap chüen wor ia repwe süla ie, pun ekewe re Israel mi sü ngeni ewe fanüapö ra kul o fiu ngeni ekewe re Ai mi tapweriir.

²¹Pun lupwen Josua me ekewe re Israel meinisin ra küna ötütän ekkei seni ewe telinimw pokiten ekewe chon op ra liapeni o kenala, ra kul o niela ekewe re Ai.