IOSUA 8:6-21

⁶Bena bae havamai; una dala ai hanua amo baia veridia oho dauhai: badina be idia na baeto “Vairada ai e heaumu, vanegai e heau heḡereḡerena”. Taunabunai ai na idia vairadiai baia heau;

⁷bena umui na ba tore isi, emui komu gabuna ba rakatania, hanua na bavabia; badina be Iehova, emui Dirava, ese imamui ai baine atoa kau.

⁸Hanua na bavabia negana ai, vada ba doua, Iehova ena hahedua heḡereḡerena. Vadaeni, vada name haḡanimui.

⁹Taunabunai, Iosua ese e siaidia, bena edia komu gabuna ela, Betele bona Ai padadiai, Ai lahara kahana ai. A Iosua na ena orea taudia ida e nohova una hanuaboi ai.

¹⁰Iosua na daba maraḡi ela, taunimanima e haboudia, bena idia bona Israel tau-badadia ida e dae ela, taunimanima vairadiai Ai ela.

¹¹Bena tuari taudia iboudiai, ia ida ela taudia, na e dae ela, hanua e raka henia kahi, Ai mirigini kahana ai e taruha. Edia taruha bona Ai hanuana padadia ai na koura dobudobuna ta.

¹²A taunimanima daha ima sisivana e abidia, Betele bona Ai padadiai bae bani henidia, Ai lahara kahana ai.

¹³Taunabunai iboudiai na edia gabu e abi, orea badana na hanua mirigini kahana ai, a e komu oreana na lahara kahana ai. A Iosua na koura ai e noho rani.

¹⁴Ai pavapavana ese una kara e itaia, bena ia mai ena tuari taudia bona ena hanua taudia iboudiai na hanua amo e didi lasi, bena ia mai ena orea taudia, Ai hanuana taudia, e tore isi haraḡa, e didi lasi, Araba hekeidihona ela, Israel taudia bae tuari henidia totona; asi dibana orea ta be hanua murina kahana ai vada e komu.

¹⁵Bena Iosua bona Israel taudia iboudiai ese e koidia, e kara vada e darere na heto, bena e heau, tano ḡaḡaena e heau lao.

¹⁶Bena Ai taudia iboudiai e heau hebou, bae hahavadia totona; bena idia ese Iosua e havaia, hanua na e rakatania.

¹⁷Ai bona Betele lalodiai tau ta dia noho; asi tauna ta Israel se havadia. I lanua na hekehona ai e rakatania, idia e havadia lao.

¹⁸Bena Iehova ese Iosua e hamaoroa, eto, Io na imamu ai ba toia roro, Ai ba dudui henia; badina be oi imamu ai baina atoa kau. Taunabunai Iosua ese ena io na imana ai e toia roro, hanua e dudui henia.

¹⁹Bena imana e toia roro negana ai, hari e komu oreana na edia komu gabuna amo e tore isi haraḡa, e heau lao, hanua lalonai e heau vareai, vada e abia; bena maoromaoro e doua.

²⁰Taunabunai, Ai taudia na e roha kerehai, hanua e doua kwalahuna guba ai e dae e itaia. Bena asi edia heau dalana ta; badina be tano ḡaḡaena e heau lao taudia na ma e lou, e havadia taudia ma e lou henidia.

²¹Iosua bona Israel taudia iboudiai ese e itaia, e komu oreana ese hanua vada e abia, bona hanua e doua kwalahuna na e daeva, bena idia na e lou, Ai taudia e hadareredia.