6Idia ese ai do idia lulua mai, ela bona hanua dekena amo sisina daudau dekenai. Do idia gwau, ‘Iseda vairana dekena amo idia heau lao noho, vanegai idia heau hegeregerena.’ Unai dainai idia edia vairana dekena amo do ai heau noho.
7“Unai neganai umui be do umui toreisi, emui hunia gabuna do umui rakatania, bona Ai hanua do umui abia, badina be, Lohiabada, emui Dirava, ese umui dekenai do ia henia.
8“Hanua umui abia neganai, lahi dekenai do umui gabua, Lohiabada ese umui ia oda henia hegeregerena. Vadaeni, egu oda umui dekenai be unai.”
9Vadaeni Iosua ese idia ia siaia, bona edia hunia gabuna dekenai idia lao. Unai gabu be Betele hanua bona Ai hanua edia huanai, Ai ena dina diho kahana dekenai. To Iosua be unai hanuaboi iena taudia danu kamepa dekenai idia noho.
10Iosua be daba maragi ia lao, iena tuari taudia ia haboua, vadaeni ia bona Israela tau badadia ese Ai hanua dekenai tuari orea idia hakaua lao.
11Vadaeni iena tuari taudia ibounai, Iosua danu idia lao taudia, be hanua magu ena iduara kahirakahira idia raka lao. Ai ena mirigini kahana dekenai idia kamepa. Edia kamepa bona Ai edia huanai be koura ta ia noho.
12To Iosua ese tatau 5000 ia abia, hunia noho totona gabuna ta dekenai ia siaidia, Betele hanua bona Ai hanua edia huanai, Ai hanua ena dina diho kahanai.
13Unai dainai tuari taudia ibounai be edia gabu dekenai idia noho, orea badana be hanua ena mirigini kahanai, to idia hunia noho orea be dina ia diho kahanai. To Iosua be unai hanuaboi neganai koura dekenai ia noho.
14Ai hanua ena king ese Iosua ena tuari taudia ia itaia neganai, ia bona iena hanua taudia ibounai be daba maragi neganai idia toreisi haraga, hanua dekena amo idia raka lao, Israela taudia do idia tuari henia totona. Idia tuari gwauraia gabuna be Arabaha ena tano palaka. To king ia diba lasi Israela taudia orea ta be hanua ena murinai idia hunia noho.
15Iosua bona iena tuari taudia ese Ai taudia idia koia, Israela taudia be tano kaukau dekenai idia heau haraga, tuari idia lusi bamona.
16Vadaeni Ai ena king ese iena hanua taudia ibounai ia boiria, do idia heau hebou, Iosua do idia lulua totona. Unai dainai idia ese hanua idia rakatania.
17Ai ena tatau ibounai ese Israela taudia lulua totona edia hanua idia rakatania. Hanua ena magu iduara be idia koua lasi, bona tuari tauna ta lasi be hanua lalonai ia noho.
18Unai neganai Lohiabada ese Iosua ia hamaoroa, ia gwau, “Oiemu io be do oi abia isi, Ai hanua dekenai do oi duduia. Lau ese oi dekenai lau henia noho.” Vadaeni Iosua ese unai bamona ia karaia.
19Iosua ese iena imana ia abia isi neganai, unai idia hunia noho taudia be idia toreisi haraga, hanua dekenai idia heau lao, hanua lalonai idia heau vareai, idia abia momokani. Vadaeni nega tamona hanua be lahi dekenai idia gabua.
20Ai taudia ese edia matana idia negea, edia hanua dekena amo be lahi ena kwalahu ia daekau guba dekenai idia itaia. Edia heau dalana ta be lasi, badina be tano kaukau idia heau noho Israela taudia be hari idia giroa mai lou, Ai taudia do idia tuari henia totona.
21Iosua bona Israela tuari taudia idia itaia, idia hunia noho tuari taudia ese hanua idia abia vadaeni, bona hanua idia gabua ena kwalahu ia daekau. Unai neganai idia giroa mai lou, bona idia ese Ai taudia idia halusia.
IOSUA 8
IOSUA 8:6-21