Josua 8:6-21

⁶Teda augwaligo da pobeasa asomainu sula tagaliyu, te dago augwali te hanu tagalama, digibulu kegasa soabo usu tiwai yaibao. Augwaligo homugo da te polobadu augwalide wi soali tiwai gilama ebo, te homu yaibao.

⁷Dagego te tiwai ebo subaso da, teda dage te dualaluali pesage tagalama, tama te hanu tomoba pedela sigi pao. God, dago Genuai Bidigo, te hanu dagego nogoba mawaibao.

⁸Dagego te hanu tomoba pedela sigi pabo sogo, dagego te Genuai Bidigo po wali tiwai gilama, te hanu siago ulao. Te eno po da, tama dagego bugagia wali piąo,” wali.

⁹Tialima, Josuago augwali tagala palobaso, tama augwali pelama, te sia ge dega sigi pabo bulu me deli badu geme duala sigi pali, te Ai hanu de te Betel, te bulu si tomoba duala sigi pelama, tama te nǫ muai. Tama augwali tonalu bidali. Tiali goli, Josua te bidibo pesagede te sogo hulide tede bididuai.

¹⁰Tialima, te kigamu digi mu te Josua hodaluama, tama te ami bidi dabe deliba sisinagasomainogo i wai. Nosali, aga dali, te Israel dabe genuai bidi dabe dali, augwali polasa peyu, tama te ami te Ai hanuba odasa pai dao.

¹¹Te Josua dali pali ami bidi dabe augwali te pąba pelama gana, te hanu tomoba pabo genuai sunumi te me badu sesege bogo badu pelama, tama augwali osogo bidabo pesage nigai. Tama te bulu odogo me deli te augwali de te Ai dabe dali te tomode elaluai.

¹²Tama Josuago te bidi sese hauwa umabo 5,000 bidi tiwai usu pąde ami bidi dabe selama, tama augwali te sia dega sigi pabo badu, te hanu Ai de Betel tomo agebele si tomoba pelama, geme duala sigi pomainu tagala palai dao, te do tama yai dao.

¹³Te ami bidi dabego te tama tialio, te genuai ami hanigo bidabo pesage te hanu sese bogo badu pąde nigai. Tama te gasa ami bidi dabe meba te sia ge dulubo badu te nǫ muyu bidali. Tama Josua te hulide te bulu odogode bidalio.

¹⁴Te Ai hanu tuni bidigo te Josuago ami bidi dabe bidibo suali sogo, kigamu digi mu aga te aga bidi dabe tigidali dali asesa polo te Jordan odogo buluba dulama, te Israel dabe dali hwįainogo yali. Te bulu odogode te augwali polobadu hwįai madi. Tiali goli, te Ai gavman tuni bidigo te nǫ muani hwįbo bidi tudi badu asabo te agai munu me konebeo.

¹⁵Josua me, te aga ami bidi dabe dali, te augwali tibo digi te augwali te kemi tǫ buluba wi soai.

¹⁶Tuni bidigo te tama tebo subaso, tama agai te hanude bidibo tigidali bidi dabe i olama, te Israel dabe augwali nǫ bagulagasao wai. Tama augwaligo te Josua pobeasa soabo sę eyu, tama augwaligo te hanu taga soyu, digibulu mu soalio.

¹⁷Megi da, te Ai hanu dali Betel hanu si ami bidi dabe tigidaligo te Israel dabe pobeasa pelama silai. Tama te hanu tomoba pabo genuai sunumi te olo dalaluali, tama te tonaluabo bidi me meni yanio.

¹⁸Tialima, Genuai Bidigo Josuabolo te po wai, “Te nago sesemone ene ugwaba selama, tama te Ai hanu usu sao. Megi eno te hanu nage nogoba mawaibao,” wali. Tama Josuago te Genuai Bidigo wali po tiwai gilama yai.

¹⁹Agai te sesemone ene ugwaba sobaso, tama polo mu, te ami bidi dabe geme dualaluali augwali hogodaluama, tama augwali udada peyu, te hanu tomoba pai. Augwaligo te hanu pedela sigi pelama, tama polo augwaligo te hanu siago ulalio.

²⁰Te Ai bidi dabego te hanuba tonono pobadi, augwaligo te hano ugwaba holobo suai. Augwaligo koneani, te augwali geme duala sabo pesage meni isiąyu, te dolabo sęgo augwali me edeligobeo. Magi baso meni, te Israel dabego augwali tibo po olama, tama te masigi tǫ buluba wi pali, megi da te augwali ma begelama, tama augwali dali hwįai.

²¹Josua dali te ami bidi dabe augwaligo suali, te augwa age dabego te hanu selama, tama te siago ulubo suai. Tama tibaso, augwali ma gelama, begasama asiyu, tama te Ai bidi dabe ela mubo sę yai dao.