JOSUA 8:6-21

⁶Eme jâpec‐nâpopie haeonec fârec‐joparâ ranaŋmu. Nâŋe wisepene jaŋe ʒiŋuc hâcne muniŋmu: ‘Jaŋe mârâc embiŋ iŋuc jaha eŋgopieŋ.’

⁷Iŋuc ehapie ŋoŋe quruŋ he ferâ hae ronʒepieŋ, Wofuŋ Anutu‐ŋeŋiczi hae i meŋeŋicko râeocmu hâcne.

⁸Haeo fefârerâ ine Wofuŋzi mutâcne‐nârewec irec sâcko ʒoczi turuŋkepie ʒazejec. No ŋaza mutâc eŋarekopac hâcne.”

⁹Eme Josuazi sorec‐jopame rambiŋ. Rarâ Ai hae ʒoaŋ huhunao, Bete â Ai hae ŋondeŋ‐jekicko ruc bahuc somâ râerâ fombiŋ. Josua e ine ŋafe ira ŋic gâcne qâtec‐jopame mâmâc fombiŋ.

¹⁰Eme Josua e furic araraŋte faharerâ ŋic biric‐joparâ e jahacne â Israe ŋic soŋaŋfâc‐jeŋic jaŋe bânie‐jarepie Ai haeopec rambiŋ.

¹¹Ehuc momori sasawa e jahacnehec jumbiŋ jaŋe Ai hae bâqiŋkehuc faicpec teuŋ âterâ fombiŋ, â ŋoŋondeŋ‐jeŋicko ine uuruŋ moc fowec.

¹²Josua e ine ŋic 5 tauseŋ heririŋ rocjoparâ ʒoaŋ huhunao Bete â Ai hae ŋoŋondeŋ‐jekicko somâ barâ foniŋte râec‐jopawec.

¹³Momori guru sâko faicpec teuŋ âtekicne ira biric‐jopa‐fârembiŋ. Â jaŋere râpeo guru moc ine ʒoaŋ huhunaopec râec‐jopambiŋ. Josua e jahacne ŋafe ira wâneŋkoa fowec.

¹⁴Iŋuc epie Ai haere ŋicwofuŋzi honerâ e jahacne â ŋicfâc‐ticne sasawa jaŋe ʒocne fârone ehuc Israe ŋic jaŋehec qaqac eniŋte wâneŋkopec rambiŋ. E hae râpeo somâ râerâ fombiŋ i mi manawec.

¹⁵Eme Josua â Israe ŋic sasawa jaŋe dockerâ wiseŋgopieŋ hawari ehuc mâreŋ burocnaopec rambiŋ.

¹⁶Eme ŋic haeo jumbiŋ jaŋe sasawa faharerâ Josua â ŋicfacne jâpec‐jopaniŋte fânoc hejarembiŋ. Eme heâckerâ rahapie hae‐jeŋic mâc fowec.

¹⁷Ŋic moczi Ai me Bete haeo moc mi juhuŋgaŋkewec. Jaŋe hae behepie mâc foha Israe ŋic jâpec‐jopa rambiŋ hâcne.

¹⁸Ehame Wofuŋzi Josua âzâcnerâ muwec: “Go damuge badomakomec i haeopec sicnec. No hae i megao râekopac.” Mume Josuazi damu‐ticne haeopec sicnewec.

¹⁹Meticne fâretiŋnehame izia momori jaŋe somâ barâ fombiŋkonec fahare gasake ferâ haeo raʒimbiŋ. Ehuc picpac jaha hae i ʒoczi turuŋkepie ʒawec.

²⁰Eme Ai hae rune jaŋe râpe‐jeŋicko fotikie firâ fic haere hosâc sawao feme honembiŋ. Ehame mâreŋ burocnaopec wisembiŋ jaŋe fotikierâ maic‐jopambiŋ. Iŋuc epie Ai hae rune jaŋe ira me ira wiseniŋte hata basambiŋ.

²¹Eme somâ bapa ŋic jaŋe hae rombiŋ â haere hosâczi sawao fehuc domawec i Josua â Israe ŋic jaŋe honerâ risie Aiŋic imac‐jopambiŋ.