Iosua 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ma ra tarai Israel dia ga kale go ra umana tiniba ta ra gunan Kanaan, nina ba Eleasar ra tena tinabar, ma Iosua natu i Nun, ma ra umana lualua na apik na tarai ta ra umana vuna tarai Israel, dia ga tibe diat me.

²Dia ga padapadailam upi ra umana tiniba, da ra Luluai i ga vartuluai tana pire Moses ure ra lavuvat ma a ngungu vuna tarai.

³Tago Moses i ga tibe ra ura vuna tarai ma a ngungu ma ra gunan ta ra papar a Iordan maro; ma pa i ga tul tar ta tiniba pire diat ta ra tarai Levi.

⁴Tago ra lavur natu i Iosep a ura vuna tarai diat, Manase ma Epraim; ma pa di ga tibe tar ta pakana ta ra gunan ta ra tarai Levi, ia kaka ta umana pia na pal upi diat a ki tana, ma ra pia na vura ure kadia lavur vavaguai ma ure kadia tabarikik.

⁵Da ra Luluai i ga vartuluai pire Moses, damana ra tarai Israel dia ga pait ia, ma dia ga tibe varbaiane ra gunan.

⁶Ma ra tarai Iuda dia ga vana tadav Iosua aro Gilgal; ma Kaleb natu i Iepune ra te Kenis i ga biti tana: U nunure ra magit ra Luluai i ga tatike tai Moses ra tutana kai God ure dor, ure iau ma ure u, aro Kades-Barnea.

⁷Iau ga laun pa a ivat na vinun na kilala ba Moses ra tultul kai ra Luluai i ga tulue iau maro Kades-Barnea upi ina gire vakilang ra gunan; ma iau ga varvai pirana da ra balagu i ga vateten iau.

⁸A dovotina ra umana turagu ave ga varagur ma diat dia ga vabilua ra nuknuk i ra tarai, ina iau, iau ga mur tuna ra Luluai kaugu God.

⁹Ma Moses i ga vavalima ta nam ra bung, ma i ga biti: A gunan u tar rua ia ma ra kakim, kaum iat ma kai ra umana natum vatikai, tago u tar mur tuna ra Luluai kaugu God.

¹⁰Ma gire, ra Luluai i tar valolovina kaugu nilaun, da i ga biti, ma i tar ivat na vinun ma a ilima na kilala taun ra bung ba ra Luluai i ga tatike go ra tinata pire Moses, ba Israel i ga vanavana ta ra bil; ma ea, iau tar laun vue lavutul na vinun ma a ilima na kilakilala gori.

¹¹Ma go ieri iau ongor boko varogop ra bung ba Moses i ga tulue iau; a dekdekigu i varogop uka, ma i tale iau ra vinarubu, ma ra niirop ma ra niolo.

¹²Io, boina ba una tul tar go ra lualuana tagu, nina ba ra Luluai i ga varvai ure ta nam ra bung; tago u ga valongore ta nam ra bung ba ra tarai Anak dia ki tana, ma ba ra umana pia na pal dia ngala ma di liplip bat diat; kan ra Luluai na maravut iau, ma ina korot vue diat, da ra Luluai i ga tatike.

¹³Ma Iosua i ga tata vadoane; ma i ga tul tar Kebron tai Kaleb natu i Iepune upi kana tiniba vatikai.

¹⁴Kari Kaleb natu i Iepune a te Kenis i ga kale Kebron tuk tar ta go ra bung, tago i ga mur tuna ra Luluai ra God kai Israel.

¹⁵Ma amana di ga vatang Kebron ba Kiriat-Arba; ma Arba ia ra ngala na tutana ta ra tarai Anak par. Ma ra gunan i ga ngo kan ra vinarubu.