Iosua 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ma ba Adoni-Sedek a king Ierusalem i ga valongore ba Iosua i ga uvia pa Ai ma i ga kamare vakakit vue, ma ba i ga pait ia tai Ai ma kana king da i ga pait ia tai Ieriko ma kana king, ma ba ra tarai Gibeon dia ga ki na malmal ma ra tarai Israel ma dia ga ki livuan ta diat,

²i ga burut na kaia, tago Gibeon a ngala na pia na pal, a pia na pal na king, ma i ga ngala ta dir ma Ai, ma ra tarai par tana dia ga ongor tuna.

³Kari Adoni-Sedek ra king Ierusalem i ga tulue ra tinata tadav Oam ra king Kebron, ma tadav Piram ra king Iarmut, ma tadav Iapia ra king Lakis, ma tadav Debir ra king Eglon, dari:

⁴Avat a vana uti, ma avat a maravut iau, ma dat a ubu Gibeon, tago dia ga pait ra malmal ma Iosua ma ra tarai Israel.

⁵Kari ra ilima na king kai ra tarai Amor, ra king Ierusalem, ra king Kebron, ra king Iarmut, ra king Lakis, ra king Eglon, dia ga vana varurung, ma dia ga vana urama, diat ma kadia lavur kor na tarai na vinarubu, ma dia ga tur marave Gibeon ma dia ga varubu me.

⁶Ma ra tarai Gibeon dia ga tulue ra tinata tadav Iosua ta ra gunan kai ra tarai aro Gilgal dari: Koko una vana balakane avet kaum umana tultul, una vana lulut tadav avet, una valaun avet, ma una maravut avet, tago ra lavur king par kai ra tarai Amor nina dia ki ta ra gunan i buabuana dia tar tur rangup upi diat a ubu avet.

⁷Io, Iosua i ga vana urama maro Gilgal, diat ma ra tarai na vinarubu par, ma ra lavur rangrang na tutana par.

⁸Ma ra Luluai i ga biti tai Iosua: Koko una burutue diat, tago iau tar tul tar diat ta ra limam; ma pa na tale ta tikai ta diat pi na tur ta ra luaina matam.

⁹Io, Iosua i ga tadav vakaian diat, tago i ga vana ta ra marum maro Gilgal.

¹⁰Ma ra Luluai i ga vapurpuruan diat ta ra luaina mata i Israel, ma i ga ubu diat ma ra ngala na vardodoko aro Gibeon, ma i ga korot mur diat ta ra nga i tutua urama Bet-Koron, ma i ga ubu diat tuk ta ra gunan Aseka ma Makeda.

¹¹Ma ba dia ga takap kan ra tarai Israel, ba dia ga kuba ta ra kukuba Bet-Koron, ra Luluai i ga vue vaba ra umana ngala na vat marama ra bakut taun diat, ma i ga tuk tar ta ra gunan Aseka, ma dia ga virua ka; mangoro tuna dia ga virua ta ra bata na vatvat, ma nam diat ba ra tarai Israel dia ga ubu diat ma ra pakat na vinarubu pa dia ga manga mangoro.

¹²Ma Iosua i ga tata pire ra Luluai ta nam ra bung ba ra Luluai i ga tul tar ra tarai Amor ta ra tarai Israel, ma i ga biti dari ta ra luaina mata i ra tarai Israel: U ra Matana Keake, una tur uka aro Gibeon; Ma u ra Gai, una tur uka ta ra male Aialon.

¹³Ma ra matana keake i ga tur uka, ma ra gai pa i ga tutua, tuk tar namana ba ra tarai dia ga tar obo pa diat mulai ta kadia lavur ebar. Dave, pa di ga tumu go ta ra buk kai Iasar? Ma ra keake i ga ki tur uka livuan ta ra maup, ma pa i ga ong lulut, i ga ki tur varogop ma tika na kidoloina bung.

¹⁴Ma lua pa ta bung dari, ma namur bula pata, ba ra Luluai i ga torom ta ra nilai ra tutana; tago ra Luluai i ga varubu maravut Israel.

¹⁵Ma Iosua i ga lilikun, diat ma ra tarai Israel par, tadav ra gunan kai ra tarai aro Gilgal.

¹⁶Ma nam ra ilima na king dia ga vilau, ma dia ga parau ta ra babang aro Makeda.

¹⁷Ma di ga ve Iosua dari: Di ga tikan tadav nam ra ilima na king, dia parau ta ra babang aro Makeda.

¹⁸Ma Iosua i ga biti: Avat a pul tar ta umana ngala na vat ta ra mata na babang, ma avat a vaki ta umana monamono tana;

¹⁹ma avat, koko avat a ki; avat a korot mur kavava lavur ebar, ma avat a ubu ra umana tena murmur bat ta diat; koko avat a nur vue diat upi diat a olo ta kadia lavur pia na pal, tago ra Luluai kavava God i tar tul tar diat ta ra lima i vavat.

²⁰Ma ba Iosua ma ra tarai Israel dia ga pait vapar ra ngala na vardodoko, ma dia ga virua par, ma diat dia tar laun valili dia ga tar olo ta kadia lavur pia na pal nina di ga liplip bat diat,

²¹a tarai par dia ga lilikun ma ra malmal tadav Iosua ta ra gunan Makeda; ma pa ta na i ga bor ta tikai ta ra tarai Israel.

²²Ma Iosua i ga biti: Avat a papa are ra mata na babang, ma avat a ben vaarike nam ra ilima na king tadav iau mara ra bala na babang.

²³Ma dia ga pait ia damana, ma dia ga ben vaarike nam ra ilima na king tadav ia mara ra bala na babang, ra king Ierusalem, ra king Kebron, ra king Iarmut, ra king Lakis, ma ra king Eglon.

²⁴Ma ba dia ga ben vaarike nam ra umana king tadav Iosua, Iosua i ga oro pa ra tarai Israel par, ma i ga biti ta ra umana luluai na vinarubu nina dia ga varagur me: Avat a tur maravai, ma avat a rua taun ra inoa i go ra umana king. Ma dia ga tur maravai, ma dia ga rua taun ra inoa i diat.

²⁵Ma Iosua i ga biti ta diat: Koko avat a burut ma koko avat a ururian, avat a ongor ma avat a balamat; tago damana ra Luluai na pait ia ta kavava lavur ebar par, ba ava varubu ma diat.

²⁶Ma namur Iosua i ga ubu doko diat, ma i ga al vatokobe diat ta ra ilima na davai; ma dia ga taba ta ra umana davai tuk tar ta ra ravian.

²⁷Ma ta ra pakana bung ba i ga ong ra keake tana, Iosua i ga vartuluai ma dia ga pala vairop ra minat i diat kan ra umana davai, ma dia ga vue diat ta nam ra babang dia ga parau tana, ma dia ga vung bat ra mata na babang ma ra umana ngir na vat, ma gori boko dia va ie.

²⁸Ma ta nam ra bung Iosua i ga uvia pa Makeda, ma i ga ub ia ma ra pakat na vinarubu, ma i ga ubu bula ra king tana; i ga kamare vakakit vue diat par dia ki tana, ma pa i ga nur vue ta tikai pi na laun; ma i ga pait ia ta ra king Makeda da i ga pait ia ta ra king Ieriko.

²⁹Ma Iosua, diat ma ra tarai Israel par, dia ga vana maro Makeda uro Libna, ma dia ga varubu ma ra pia na pal Libna;

³⁰ma ra Luluai i ga tul tar ia bula ta ra lima i ra tarai Israel, ma ra king tana; ma i ga ub ia ma ra mangi na pakat na vinarubu, ma diat par dia ga ki tana; pa i ga nur vue ta tikai pi na laun valili; ma i ga pait ia ta ra king tana da i ga pait ia ta ra king Ieriko.

³¹Ma Iosua i ga vana kan Libna, diat ma ra tarai Israel par, ma i ga tadav Lakis, ma i ga tur maravai pirana ma i ga varubu me;

³²ma ra Luluai i ga tul tar Lakis ta ra lima i ra tarai Israel, ma dia ga uvia pa ia ta ra vauruana bung, ma dia ga ub ia ma ra mangi na pakat na vinarubu, ma diat par dia ga ki tana, varogop ma ra magit par dia ga pait ia tai Libna.

³³Ma Oram ra king Geser i ga vana pi na maravut Lakis; ma Iosua i ga ubu diat ma kana tarai, ma pa i ga nur vue ta tikai pi na laun pirana.

³⁴Ma Iosua, diat ma ra tarai Israel par, dia ga vana maro Lakis uro Eglon, ma dia ga tur maravai pirana ma dia ga varubu me;

³⁵ma dia ga uvia pa ia ta nam ra bung iat, ma i ga ub ia ma ra mangi na pakat na vinarubu, ma i ga li vapar vue ra tarai tana ta nam ra bung, varogop ma ra lavur magit i ga pait ia tai Lakis.

³⁶Ma Iosua, diat ma ra tarai Israel par, dia ga vana maro Eglon uro Kebron; ma dia ga varubu me;

³⁷ma dia ga uvia pa ia, ma dia ga ub ia ma ra mangi na pakat na vinarubu, ma ra king tana, ma ra lavur pia na pal, ma ra tarai par dia ga ki tana, ma pa i ga nur vue ta tikai pi na laun, varogop ma ra lavur magit i ga pait ia tai Eglon; i ga kamare vakakit vue ma ra tarai par dia ga ki tana.

³⁸Ma Iosua, diat ma ra tarai Israel par, dia ga lilikun uro Debir, ma dia ga varubu me;

³⁹ma i ga uvia pa ia, ma ra king tana bula, ma ra lavur pia na pal; ma dia ga ubu diat ma ra mangi na pakat na vinarubu, ma dia ga li vakakit vue ra tarai par dia ga ki tana; pa i ga nur vue ta tikai pi na laun; da i ga pait ia aro Kebron, damana i ga pait ia aro Debir, ma ta kana king, varogop i ga pait ia bula tai Libna ma ra king tana.

⁴⁰Damana Iosua i ga ubu ra lavur gunan, ta ra lualuana, aro Negeb, ta ra male, ma ta ra papar a luana, ma kadia lavur king par; pa i ga nur vue ta tikai pi na laun, i ga nila vapar vue ra magit i laun, da ra Luluai ra God kai Israel i ga vartuluai tana.

⁴¹Ma Iosua i ga ubu diat par, i ga tur pa ia aro Kades-Barnea ma i ga tuk tar aro Gasa, ma ra gunan Gosen par, tuk tar ta ra gunan Gibeon.

⁴²Ma Iosua i ga uvia pa go ra lavur king ma kadia gunan ta ra kopono e, tago ra Luluai ra God kai Israel i ga varubu maravut Israel.

⁴³Ma Iosua ma ra tarai Israel par dia ga talil tadav ra gunan Gilgal.