Iosua 11:6-22

⁶Guiau i ribalau Iosua arinai i ene, Isi tabu u matausiedi; maraitom, mahana doha ede ina, se mateohi abo ea mosedi Isaraela matadi eai; edi hosi abo au nigoidi, edi kariota abo oeagi eai au gabudi.

⁷Iosua abo i laoma, eo tauiala gamagaridi maenaeao, i hetagugudi Meroma goilana eai, se ialaidi.

⁸Guiau Isaraela nimadi eai i mosedi, to se lauelepaidi, eo se henaudi se lau e Sidona eai se lage, eo Misirepota‐maima eai se lage, eo Misepa teha aruabo arotauna eai se lage, se lauelepaidi i lau e nige esega i mia.

⁹Iosua Guiau ena riba gamagaridi i lauvataidi: edi hosi i nigoidi, eo edi kariota oeagi eai i gabudi.

¹⁰Nei asubenana ne Iosua i uio abo Hasoa i girihai, elepa eai edi Vasavasa i unui: beabeana Hasoa va teina basileia gamagaridi i sae tavatavaidi.

¹¹Isi tatao gamagaridi boeana eai se lauelepaidi se unuhematedi: nige esau i mia i eahua: Hasoa hinage i gabu.

¹²Vau Vasavasa va edi eanua gamagaridi, eo edi Vasavasa hinage Iosua i girihaidi i lauelepaidi, i hebaaeaaririedi, doha Mose, Guiau ena heaheari, i lauhesomdi.

¹³Eanua lailai headi Isaraela sora nige se gabudi, Iosua Hasoa mo i gabu.

¹⁴Teina eanua edi gogo, eo edi bulumakau, Isaraela nanatunaeao se abigaibuidi isi isibom edi ginauri: tatao mo gamagaridi se lauelepaidi, nige tau esau i mia i eahua.

¹⁵Doha Guiau ena heaheari Mose i lauhesom, Mose hinage Iosua i lauhesom, Iosua hinage i abivatai: ginauri gamagaridi Guiau Mose i lauhesom va Iosua i abiheohidi.

¹⁶Arinai Iosua oea i girihaiohi, oea tupidi, eo oea maudoudoina teha eavana eai, Gosena oeana maudoudoina, eo arotau eo gonu, eo Isaraela edi oea, eo edi gonu.

¹⁷Halaki tupina eai i sae Seia eai, i lau e Balagada eai, Labanona arotauna eai, Heamona tupina ubuna eai: edi Vasavasa gamagaridi i abidi, i lauelepaidi, i unuidi hinage.

¹⁸Teina Vasavasa gamagaridi aridi eai Iosua huia roharoha eai i ialaidi.

¹⁹Nige eanua esau Isaraela maena se labini: Haivaiti tataodi isibom Gibeona taumiaidi: gamagaridi se ialaidi, eo se girihaidi.

²⁰Paana ede Guiau nuadi i heoiuradi, bena se laoma Isaraela se ialaidi, ia abo i hebaaeaaririedi, nige i nuatuidi; bena i hebaaeadi mo, doha Guiau Mose i lauhesom.

²¹Nei huiana ne Iosua i laoma Anakimi tataodi bena i helautomdi oea tupidi eai, eo Heberona eai, Debiri hinage, eo Anabi, eo Iueda oea tupidi eai, eo Isaraela oea tupidi eai: Iosua i hebaaeaariedi, eo edi eanua hinage.

²²Isaraela nanatunaeao edi tano eai nige Anakimi esau i mia; headi mo se mia Gasa eai, eo Gati eai, eo Asidodi eai.