Joshua 11:6-22

⁶Ma Yahweh te bosa vania Joshua me ghaghua, “Ko bei mataghunira gea, te vagha na bona ia taeni i ropo ke, gaira udolu kara mate. Ko tokai na tuadira didira na lei horse gekara bei sakutua, mo ko kerei didira na lei taitakiro.”

⁷Keri ke, Joshua ma nina lei malaghai tara tonavia va na beti lilighina Merom mara veitotoghoni minamina kolura inaghona tara gonidila tua..

⁸Ma Yahweh te vahera nina lagavule ta ghadira na levunimate. Rana Israel tara ghurura va tana komu sule Sidon, mi Misrephoth-maim, paleva uluna na boboko i Mizpah ritina taho siki sakai ke vola.

⁹Ma Joshua kolura nina Malaghai tara goni taonighi na hava te bosa vanira nia Yahweh, gera tokai na ula ni na tuadira didira na horse mara kerei didira na taitakiro ni veitotoghoni.

¹⁰Tana bona keri, na Vunaghi haba ni Hazor te vunaghi pungisira rana vure maira na lei vunaghi haba tara veitotoghoni kolura Israel. Keri ge Joshua ma nina malaghai tara ririu pulohi mara lagavulea na komu sule Hazor, mara matea didira vunaghi haba.

¹¹Joshua kolura nia nina malaghai tara mate sokora rana vure ni Hazor, mara kere horua na komu. Taho siki sakai lokana te vola.

¹²Joshua ma nina malaghai tara holai na lei komu maia na lei vunaghi haba. Ma Joshua te bosa vanira nina malaghai gekara labumate sokora, te vagha Moses nina tinoni ni lutu Yahweh te bosaa.

¹³Ma Joshua ma nina malaghai tara kerea Hazor, hauva tara mua kerei na lei komu tara ghahai kou ni ghotu.

¹⁴Mana vure ni Israel tara labumate sokora rana vure ilokani, mara holai heghedira didira na lei totobo uto kolui nia didira na maumanu.

¹⁵God te bosai tua na lei kokokoe ini vania Moses nina tinoni lutu idania, ma Moses te bosai Joshua geke gonighi. Keri ke Joshua te taoni utoi na lei bosa Yahweh te arevaghi vania Moses.

¹⁶Joshua ma nina malaghai tara holai tua na lei pari vuivuni boko me sara ulu. Mara holai na lei komu tana ghotu, maia na lei komu tana lei boboko i betitina Jordan, na bona mamaha tara holoa nia Negev, na boboko i Goshen, mi tana lei nanata ni Israel

¹⁷Ra holai na lei bona ni pari tana ghotu Halak, paleva launa dutuvia na bubulo i Edom, me va saravia Baal-gad tana boboko i Lebanon paleva launa, sarana na ghotu Hermon. Joshua te lagavulera na lei vunaghi haba me matera.

¹⁸Me daro ni bona ngangata tua Joshua te veitotoghoni kolura na lei vunaghi haba ni komu ini, me lagavulera sokora tua.

¹⁹Na kemana Hiv tara kabui Gibeon vamua tara dolo kolura Joshua mana vure ni Israel. Mana lei taba ni vure soko, Joshua kolura nia nina malaghai tara labu pisu matera soko.

²⁰Ma Yahweh te ne udolura gera liona ngangata so na veitotoghoni koluadira na vure ni Israel, me nea ghua Joshua ma nina lei malaghai gera mua arovira mara labu pisu matera. Aeni na hava Yahweh te bosa/arevaghi vania nia Moses dania.

²¹Mi tana bona ia ghua keri Joshua ma nina lei malaghai tara labumatera na lei mumutabu tana kemana Anak, tara kabu tana komu i Hebron mi Debir mi Anab maia tana lei ghotu tana Judah ma Israel. Gaira tara labumate sokora mara durakei nina lei komu.

²²Joshua ma nina malaghai tara mate sokora na lei mumutabu tara ghana tana lei bona keri. Rua pe tolu vamua tara ghana tana lei komu i Gaza, Gath, mi Ashdod.