Josue 11:6-22

⁶Migkaǥi is Nengazen diyà te ki Josue te, “Kenè kew mahandek kandan, su keeselem te iring kayi he uras, ne egeraan ku sikandan is langun para te Israel. Penlepui niw is menge kudè dan wey peminsuli niw is menge kerwahi zan.”

⁷Umbe, midtik-awan sikandan surunga ni Josue duma te menge sundaru zin dutun te Wahig he Merom.

⁸Mibpengelinteuwan te Nengazen he mezaag te menge Israilihanen haazà is menge kuntada zan. Midal-as dan is menge kuntada zan taman diyà te Zekelà he Sidon wey ziyà te Misrefot Maim, wey taman diyà te Suǥud te Mizpa ziyà te edsilaan, taman te naamin dan mepatey is menge kuntada zan.

⁹Mibeelan ni Josue ziyà te kandan is insuǥù te Nengazen: Mibpenlepuan din is menge kudè dan ne mibpeminsulan din is menge kerwahi zan.

¹⁰Kegkepasad kayi midlikù ensi Josue ne mid-aǥew zan is Hazor ne midhimetayan dan is hadì kayi. (Is Hazor iyan utew mekeǥeǥehem he ginhedian dutun he timpu.)

¹¹Mibpenhimetayan dan daan is langun he meǥinged diyà te Hazor, ne wazà nesamà he uuyag. Ne mibinsulan dan haazà is inged.

¹²Naaǥew eni Josue heini is langun he menge inged. Migerè dan is langun he menge meǥinged kayi, ragkes is menge hadì dan, su iyan heini insuǥù te suluǥuen te Nengazen he si Moises.

¹³Iyan, wazà mulà binsuli te menge Israilihanen is menge inged he menge vuvungan, gawas te Hazor he mibinsulan ni Josue.

¹⁴Mibpenguwa te menge Israilihanen is langun he menge azen wey menge uyaǥen kayi he menge inged. Piru mibpenhimetayan dan mulà is langun he meǥinged kayi, ne wazà nesamà he uuyag.

¹⁵Iyan heeyan insuǥù te Nengazen ki Moises, ne insuǥù daan heini ni Moises diyà te ki Josue. Ne midtuman ni Josue is langun he insuǥù te Nengazen ki Moises.

¹⁶Nekuwa ni Josue haazà is tivuuk he tanà: is menge vuvungan, is tivuuk he tanà te Negev, is tivuuk he tanà te Goshen, is menge mibuntud-buntud diyà te edsenlepan, is Araba, wey is menge metikang wey mevavà he menge vuntud diyà te Israel.

¹⁷Is lugar he nesakup din, ne ziyà ebpuun te Buntud he Halak petekezeg diyà te Seir taman te Baal Gad he ziyà te Suǥud te Lebanon diyà te lugtenaan te Buntud he Hermon. Midakep din wey mibpenhimetayan din is menge hadì kayi he menge lugar.

¹⁸Meluǥayad he timpu is kebpekidtebek dan ne human nepasad.

¹⁹Wazà duma he mibpekid-emiǥu te menge Israilihanen kayi he lugar gawas te menge Hivihanen he meǥinged diyà te Gibeon. Is duma nezaag dan te tebek.

²⁰Su mibpekubalan te Nengazen is gehinawa zan su wey zan sukuli te tebek is menge Israilihanen. Ne pinaaǥi kayi egkepurung sikandan egkezeeti ne ebpenhimetayan he kenè ne egkelizuwan, su iyan insuǥù te Nengazen ki Moises.

²¹Dutun daan he timpu, midsurung ni Josue is menge kevuwazan ni Anak he meǥinged diyà te menge vuvungan te Hebron, Debir, Anab, wey is diyà te langun he menge vuntud he nesakup guntaan te Juda wey Israel. Midèdeetan ni Josue sikandan is langun ragkes is menge inged dan.

²²Wazà kevuwazan ni Anak he nesamà diyà te lugar te menge Israilihanen gawas te ziyà te Gaza, Gat, wey ziyà te Ashdod.