JOSUA 11:6-22

⁶Eme Wofuŋzi Josua ʒiŋuc âzâcnewec: “Go jaŋere mi hâwicguoc. Tomâcko dameŋ ʒiŋucne hâcne noni joparâ Israe ŋic ŋoŋere meo râec‐jopa‐fârepemu. Go ine becâsicfâc‐jeŋic jaŋere rua hetâcnerâ keretac wiac‐jeŋic ʒoczi turuŋketec ʒazejec.”

⁷Eme Josua e momorifâc‐ticne jaŋehec ututuŋ jaha Merom opâo fisi‐jarewec.

⁸Eme Wofuŋzi Israe ŋic jaŋere meo râec‐jopame jopa jâpec ejare raku Sidoŋ‐Raba â Misirefo‐Maim haeo, erâ ʒoaŋ wewefunaopec ine Mizipe wâneŋko fisimbiŋ. Erâ moc mi akic‐jopa huŋgaŋkehuc ima samaki bacjopa‐fârembiŋ.

⁹Eme Josua e Wofuŋzi âzâcnewec irec sâcko becâsicfâc‐jeŋic jaŋere rua hetâcne‐fârewec â keretac wiac‐jeŋic ine ʒoczi turuŋkeme ʒafârewec.

¹⁰Eme Josua e dameŋ ira mocwâc risierâ Hazoro hae rorâ ŋicwofuŋ‐ticne ʒikazi imackewec. Hazoro hae i mâmâc jaha ŋicwofuŋ sasawa jaŋere hae qizec ŋewec.

¹¹Eme Israe ŋic jaŋe wiac jujune moc mi akic‐jopa huŋgaŋkehuc bâsirowec‐jopa‐fârembiŋ, â Hazoro hae ine Josuazi turuŋkeme ʒawec.

¹²Eme hae sasawa â ŋicwofuŋfâc‐jeŋic jaŋe ine Wofuŋte kiŋaŋŋic Mosezi mutâcnewec irec sâcko Josuazi rocjoparâ ʒikazi imac‐jopahuc bâsirowec‐jopa‐fârewec.

¹³Â hae gâcne tikio ŋerawec i ine Israe ŋic jaŋe ʒoczi moc mi turuŋkepie ʒawec, Hazoro hae sawa Josuazi turuŋkeme ʒawec.

¹⁴Eme hae irec bulimakao â wiac sasawa Israe ŋic jaŋe jaŋacne biŋe rocjopambiŋ. Â ŋic ine moc mi akic‐jopahuc ʒikazi imac‐jopa‐fârembiŋ.

¹⁵Wofuŋzi kiŋaŋŋic‐ticne Mose âzâcne mutâc ewec irec sâc Mosezi Josua mutâcnecnewec. Eme Josua e irec sâc wiac efârewec. E Wofuŋzi Mose mutâcnecnewec i moc mi hetiriwec.

¹⁶Josua e iŋuc ehuc tiki mâreŋ â Negebe mâreŋ erâ Goseŋ mâreŋ â wâneŋ â sopâc mâreŋ, erâ Israere tiki mâreŋ â wâneŋ‐ticne, mâreŋ i sasawa ro rauc efârewec.

¹⁷I Halaka tikionec Seiri mâreŋkopec feraku Baali‐Gada, Herimoŋ tikifuŋko Lebanoŋ wâneŋko fisikac i ro rauc efârewec hâcne. Ehuc Josuazi ŋicwofuŋfâc‐jeŋic rocjoparâ imac‐jopa‐fârewec.

¹⁸Josua e dameŋ ʒora ŋicwofuŋ i jaŋehec ʒika qahuc juwec.

¹⁹Hae moczi Israe ŋic jaŋehec wama qaqac i moc mi ewec. Gibeoŋ haere ŋecjucfâc, Hiwiŋic hâcne, jaŋehec sawa embiŋ. Hae mâreŋ gâcne i Israe ŋic jaŋe ʒika qahuc rofârembiŋ.

²⁰Wofuŋ e mâsi‐ticne bahuc râsi jaŋere maŋ bârâŋgeŋkeme Israe ŋic jaŋehec ʒika qazore faharembiŋ. I Israe ŋic jaŋe Wofuŋzi Mose mutâcnecnewec irec sâcko buuruc moc mi qajarehuc omaec‐jopaniŋte iŋuc hâcne fuawec.

²¹Dameŋ ijaha Josua e fisirâ Anaka ŋic, tiki mâreŋkonec, Heboroŋ, Debiri â Anaba haeonec, erâ Juda tiki mâreŋkonec â Israe tiki mâreŋkonec jaŋe mâmâc sasawa bârârâŋ‐jopawec; Josua e hae‐jeŋichec bâsirowec‐jopawec hâcne.

²²Israe ŋic jaŋere mâreŋko Anaka ŋic moc mi akic‐jopapie jumbiŋ. Hae ʒiŋuc ira afecne maczi jurambiŋ: Gaza, Gati â Asidode.