IOANE 1:10-47

¹⁰Ia na tanobada ai e nohova, tanobada danu iena amo e vara; to tanobada na asi dibana ia.

¹¹Iena tanobada ema; to iena taunimanima ese asie abia dae.

¹²A haida ese e abia dae bona ia ladana e abiabiraia, bena ia ese siahu vada e henidia, Dirava natuna ai baela.

¹³Idia na dia tau-anina ena ura amo asie vara, dia tau ta ena ura amo asie vara, a Dirava ena ura amo e vara.

¹⁴Hereva na taunimanima tau-anina ai ema, ai bogaragimai e taruhava. Ia hairaina danu a itaiava, natuna vara-edeana tamana ese e henia, hariharibada bona hereva momokani ai e honu honu dae.

¹⁵Ia herevana Ioane ese e gwauraia, e lolo, eto, Lau vada na herevalaia tauna binai, nato “Lau murigu ai be maimu tauna ese baine gunalaigu, badina be ia na vada e nohova, a lau be do asina vara”.

¹⁶Ena honuhonu-dae amo ita iboudai tame abi, harihari ma hariharibada.

¹⁷Badina be Mose ese taravatu e henida; a harihari-bada bona hereva momokani na Iesu Keriso ese vada e mailai.

¹⁸Matamana negana ema bona harihari tau ta ese Dirava se itaia; Natuna vara-edeana, Tamana kemena ai e nohomu, ia ese vada e gwauraia hedinarai.

¹⁹Ioane ena hereva binai. Iuda taudia ese hahelaḡa taudia bona Levi oreana taudia haida Ierusalem amo e siaidia, bae nanadaia, baeto “Oi na daika?”

²⁰Bena ia na e gwau hedinarai, se heḡore, eto, Lau na dia Keriso.

²¹Ma e nanadaia, eto, Benaini, oi Elia a? Ia eto, Lau na dia ia. Ma eto, Oi na peroveta tauna a? Ia e haere, eto, Lasi.

²²Bena idia ese e nanadaia lou, eto, Oi be daika? Emu haere na e siaimai taudia baia hamaorolaidia lao. Sibomu harimu be ede o piua tomamu?

²³Bena ia sibona e hehari piu, eto, Lau na Gado ta tano ḡaḡaena ai e boi lolomu, e tomamu, Lohiabada ena dala ba lailaia; Isaia, peroveta tauna, ese vada e gwauraia guna.

²⁴Hari e siaidia taudia na Farisea taudia.

²⁵Bena idia ese ma e nanadaia lou, eto, O matona, oi ese taunimanima o bapatisodiamu, a oi be dia Keriso, dia Elia, dia peroveta tauna o tomamu?

²⁶Ioane e haere, eto, Lau na ranu amo na hahebapatisomu; a umui bogaragimui ai asi dibamui tauna ta vada e ginimu:

²⁷ia na lau murigu ai be maimu, bona lau na dia namo ena tamaka varona baina ruhaia.

²⁸Ini ḡau na Betania, Ioridane unukahana ai, e vara. Ioane na unuseni ai e hahebapatisova.

²⁹Daba ai ia ese Iesu e itaia, ia dekena e maiva, bena eto, Dirava ena Mamoe Natuna a itaia; ia na tanobada ena dika iabi-ohona tauna.

³⁰Vanegai na gwauraiava tauna binai. Lau nato “Lau murigu ai be maimu tauna ese baine gunalaigu, badina be ia na e guna, lau na gabe amo”.

³¹Lau na asi dibagu ia; to Israel ai baine hedinarai helaoreana lau nama, ranu ai na hahebapatisomu.

³²Ioane ma e hereva hedinarai, eto, Lauma vada na itaia guba amo e diho, pune na heto, ia tubuana ai e kau.

³³Lau na asi dibagu ia; to e siaigu ranu amo baina hahebapatiso Diravana ese e hamaorogu, eto “Tauna na oi ese ba itaia, Lauma baine diho tubuana ai baine kau tauna, ia na Lauma Helaḡa amo baine hahebapatiso”.

³⁴Lau ese vada na itaia, bona vada na gwauraia hedinaraimu: ia na Dirava Natuna.

³⁵Daba ai Ioane mai ena hahediba rarua ida ginidia ai

³⁶Iesu e raka hanaiva ai e itaia; bena Ioane eto, Dirava ena Mamoe Natuna a itaia.

³⁷Hahediba raruosi iena hereva e kamonai, bena idia ese Iesu e ḡavaia.

³⁸Iesu e gini kerehai, e gavaia taudia raruosi e itadia, bena e nanadaidia, eto, Dahaka o tahuamu? Idia e haere, eto, Rabi e, oi be edeseni ai o nohomu? (“Rabi” anina be “hahediba tauna”).

³⁹Ia eto, Aoma, ba itaia. Bena idia ela, ena noho gabuna eha itaia, bena una dina ai ia dekenai e noho. Negana be adorahi kahanai.

⁴⁰Ioane ena hereva e kamonai bena Iesu e ḡavaia tauna ta be Andrea; ia na Simona Petro tadina.

⁴¹Ia ese kakana korikori Simona maoromaoro e ha davaria, bena e hamaoroa, eto, Ai na Mesia vada ame davaria. (“Mesia” anina be “Keriso”).

⁴²Bena Iesu dekena e hakaua lao. Iesu ese e raraia, bena eto, Oi na Simona, Iona natuna: Kefa na ba nemaia. (“Keta” bona “Petro” anidia tamona, “Papapapa”).

⁴³Daba ai, Iesu e ura Galilea bainela eto, bena Filipo e davaria, e hereva henia, eto, Murigu ai a raka.

⁴⁴Filipo na Betesaida tauna, Andrea bona Petro edia hanuua tauna.

⁴⁵Filipo ese Natanael e ha davaria, bena e hamaoroa, eto, Mose ena taravatu ai bona peroveta taudia edia buka ai harina e piuava tauna vada ame davaria: ia na Iesu, Nasaret tauna, Iosef natuna.

⁴⁶Natanael eto, Nasaret amo ḡau namona ta bainema a? Filipo eto, Aoma, a itaia.

⁴⁷Iesu ese Natanael e itaia, ia na ia dekena ema, bena e herevalaia, eto, Israel tauna korikorina ta a itaia; ia na asi ena koikoi.