Joni 1:10-47

¹⁰Ama mopafi Agra mani'ne, hagi Agra'a ama mopa tro hu'ne hu'neanagi, ama mopafi vahe'mo'za Agrira antahi'za ke'za osu'naze.

¹¹Agra'a vaheku huno e'ne, hianagi Agri vahe'mo'za ovre'naze.

¹²Hianagi iza'zo nevareza Agri agifima zamentinti nehaza vahe'mokizmia, Agra'a hugnare hige'za Anumzamofo mofavre se'naze.

¹³Mofavremo'za arera afa zamesitero, vahe avesitero neve avesitera forera osunazanki, Anumzamo zamazeri fore hu'ne.

¹⁴Ana Kemo vahe fore huteno, tagri'ene mani'ne. Agri msazama'a tagra ke'none, magoke ante'nea Ne'mo hanave'ane msa zama'a Nefantegati e'ne. Asunku zamo'ene tmage kemo'a avite'nea Nere.

¹⁵Joni'a huama huno Agriku hu'ne. Agra kezatino amanage hu'ne, nagrama amama nehuana Agriku nehue, nagri nmage'ma ne-emo'a, nagrira nagateretfa hune. Na'ankure nagra fore osu'nogeno Agra pusante fore huno mani'neane.

¹⁶Higeta tagra ana maka'mota hakare zana Agripi avitenefinti eri'none, asunku huranteno muse zama'a agumpi agumpi huno neramie.

¹⁷Na'ankure kasegea Mosesempi tami'ne. Hagi asunku'zane tamage kea, Jisas Kraisimpi tami'ne.

¹⁸Mopafi vahe'mo'a magore huno Anumzana onketfa hu'ne. Anumzamofo mofavre magoke mani'neno, Nfa'amofo asumpinka mani'ne, Agra'a Anumzana mani'neno huama hu'ne.

¹⁹Ama Joni agi agenke, Jiu kva vahe'moza, mono kva pris vahe'ene Livai vahera Jerusale kumateti huma zamantage'za antahigeku vu'za, Kagra azage? hu'za ome antahige'naze.

²⁰Antahigageno'a, agra huama nehuno vahane osu'ne, huama huno, Nagra tmazahu nera Kraisi'na omni'noe.

²¹Hige'za, hagi azaga mani'nane? Ilaijago? hu'za hzageno, a'o, nagra Ilaijana omni'noe huno hige'za, kagra kasnampa nero? hu'za antahigageno, Agra kezmi nona huno i'o huno hune.

²²Hurantagetama e'nona vahe ome zamasmisunku nehune. Azaga mani'nane huta kagrikura ome zamasmigahune? Kagragura azage hunka nehane?

²³Agra anage hu'ne, Nagra mago Kezanke ka'ma mopafi mani'neno keza netiana Ramofo ka azeri ante fatgo hiho hu'nea Aisaia kasnampa ne'mo korapa hunte'nea mani'noe. (Aisa 40:3)

²⁴Hu'zmantage'za e'naza Farisi vahe'mo'za,

²⁵zamagra antahige'za, amanage agriku hu'naze, kagra Kraisigafi, Ilaijagafi, mago Kasnampa ne'ma omninenka, nahigenka mono tina fre nezmantane?

²⁶Joni'a kenonazamire anage hu'ne, nagra amne tintfanteti mono tina frenermantoe. Hu'neanagi tmagripina magora tamagra onke'naza ne' oti'ne.

²⁷E'ima Agra nagri nmage'ma esnimo'e, Agri aga'nona knare osu'noankina katu ofegahue.

²⁸Ana nanekea Betani kumara Jodani timofo asoparega antahige'naze, anante Joni'a mono tina frezamante'ne.

²⁹Anante kotigeno Jisasi'a agrite egeno negeno, Joni amanage hu'ne, keho, Anumzamofo sipisipi anentara, ama mopafi vahe'mokizmi kumira, Agra eri atregahie!

³⁰Ama'ne ana nera, Agriku'ma hu'na nagrama kema hu'noana, nagri namge'ma esnia nera, nagrira nagtereno ra agi eri'nea nere, nagra fore osu'nogeno, Agra korapa Agraragisa mani'nea nere.

³¹Nagra antahi'na ke'na Agrira osu'noanagi, Israeli vahemo'za Agrira antahiza keza hnaze hu'na, nagra ena mono tina eme frezmante'noe.

³²Joni'a huama huno amanage hu'ne, Nagra kogeno Avamura maho nmamo hiaza huno monafinti eramino Agrite emanige'na ke'noe.

³³Nagra ke'na antahi'na Agrira osu'noanagi, Agra'a hunantege'na mono tina frente'noa ne'mo nagrikura anage hu'ne, kankeno'ma avamu'mo monafinkati'ma, eramino Agrite'ma emani'nea ne'mo, Agra Ruotge Avamupi mono tina fre zamantegahie hu'ne.

³⁴Nagrani'a kete'na, huama hu'na ama Anumzamofo mofavre hu'na neramasmue.

³⁵Anante zupa Joni'a, amagema nenta'a disaipol netrema'ane oti'neno,

³⁶Jisasi ne-egeno Joni'a negeno amanage huno hu'ne, Keho, amu Anumzamofo Sipisipi anentare,

³⁷anage hige'ne, Joni amagema nenta'a disaipol netremoke nentahi'ne, Jisasi amage'anteke vu'na'e.

³⁸Jisasi'a amage'a nevakeno rukrahe huno neznageno, Na'anku nehakra'e? huno znantahigege'ne, Hurami ne'moka inante Kagra nemnine? hu'ne antahigena'e.

³⁹Agra anage znagriku hu'ne, E'netna tanagratani'a emege'o hige'ne, Agrane vuke nemnia nonkuma omenege'ne ana zupa Agrane mani'nakeno, 4 kiloki hu'ne.

⁴⁰Ana nanterana mago'mo Joni hiankema antahiteno Jisasi amage'ma vu'nea nera Endru'e, Saimon Pitana nefu'e.

⁴¹Hagi Endru'a, Jisasi keteno pusante Endru'a nefu Saimoni keno, amanage huno asmi'ne, Tagra hago Mesaiana hakreta erifore hu'none. (E'i ana agima eri rukrehe'ma hu'neana Kraisi'e hu'ne.)

⁴²Jisasinte Endru'a, Saimonina avreno vu'ne. Vigeno Jisasi'a negeno anage huno asmi'ne, kagra Saimonige Joni nemofoga mani'nane, kagri kagi'a Sifasi'e hugahaze. (E'i ana agima eri rukrehe'ma hu'neana Pita'e hu'ne.)

⁴³Mseno kotigeno Jisasi'a Galili vunaku nehuno Filipi ome negeno, Nagri namage anto hu'ne.

⁴⁴Hanki Filipi'a Betsaidati ne' Andrune, Pita kiznia ra kuma zani'areti nere.

⁴⁵Filipi'a, Natanieli'e nehaza ne' kefore huteno amanage huno asmi'ne, Mosesi ene Kasnampa vahe'mo'zama avo tafepima agenke'ama krente naza Ne'ma, Nazareti kumateti Josefe nemofo Jisasi'e hu'naza nera hago hakreta erifore hu'none, huno asmi'ne.

⁴⁶Natanieli'a anage huno Filipina antahige'ne, Nazaretia knare'zana efore hugahio? Filipi'a anage hu'ne, kagraka'a enka emego.

⁴⁷Natanieli Agritega ne-egeno Jisasi'a negeno amanage hu'ne, keho, tmage Israeli vahere, agu'afina havige hu'zana omne'ne!