San Juan 1:10-47 - Xasasti talacaxlan

¹⁰Pus a̠má Tachuhuí̠n milh nac ca̠quilhtamacú la̠qui̠ nalatama̠y nac ca̠quilhtamacú hua̠ntu̠ lacxtum xta̠ma̠lacatzuqui̠ni̠t Dios; pero hua̠nti̠ xtalamá̠nalh nac ca̠quilhtamacú a̠ma̠ko̠lh cristianos ni̠ talakápasli.

¹¹Y a̠má pu̠latama̠n hua̠ntu̠ xlacsacni̠t la̠qui̠ antá nalacachín, hua̠nti̠ antá xtahuilá̠nalh hua̠nti̠ xnata̠chiquí̠n ni̠ tali̠pá̠hualh xtachuhuí̠n.

¹²Pero makapitzí̠n cristianos hua̠nti̠ tali̠pá̠hualh xtachuhuí̠n y ca̠qui̠taxtúnilh cumu lá̠mpara talacachimpá a̠maktum y xcamaná̠n Dios ca̠li̠má̠xtulh.

¹³Huá u̠ma̠ko̠lh hua̠nti̠ talacáchilh xli̠maktiy la̠qui̠ xcamaná̠n Dios natahuán, huá chuná tali̠lacáchilh xli̠maktiy porque huá Dios ca̠ma̠xqui̠lh aktum xasa̠sti xlatama̠tcán hua̠ntu̠ chú takalhi̠y pero ni̠ xta̠chuná qui̠táxtulh cumu la̠ acxni̠ xtzí chu xtla̠tcán ca̠má̠xqui̠lh xlatama̠tcán hua̠ntu̠ xala u̠má ca̠quilhtamacú.

¹⁴Amá Tachuhuí̠n milh lacachín cumu la̠ cha̠tum skata y nac quilaksti̠pa̠ncán qui̠latama̠chi cumu la̠ cati̠hua̠ chixcú, xlá qui̠li̠chuhui̠nánchi xtalakalhamaní̠n Dios y hua̠ntu̠ xlá xtalacapa̠stacni. Aquinín cucxilhni̠táhu pi̠ lanca xlacatzúcut y ccatzi̠yá̠hu pi̠ huá Dios ma̠xqui̠ni̠t xli̠makatlihueke porque xma̠nhuá ta̠stum Xkahuasa.

¹⁵Juan li̠chuhuí̠nalh nac xlacati̠ncán cristianos y chiné huá: —Huá eé chixcú hua̠nti̠ xacli̠chuhui̠nama acxni̠ chiné cuá: Acali̠stá̠n mima a̠cha̠tum ti̠ a̠tzinú lanca xlacatzúcut ni̠ xachuná aquit, porque xlá aya xlama hasta acxni̠ aquit ni̠najtí xaclama.

¹⁶Caj hua̠ntu̠ quilacatacán pu̠tum quinca̠ma̠xqui̠ni̠tán xtapa̠xquí̠n y ni̠ caj maktum porque caj xpa̠lacata lanca xtalakalhamaní̠n quinca̠siculana̠tlahuani̠tán cane̠cxnicahuá.

¹⁷Profeta Moisés quinca̠ma̠xquí̠n a̠má li̠pe̠cuánit xtapéksi̠t Dios la̠qui̠ aquinín li̠huana̠ nama̠kantaxti̠yá̠hu, pero tla̠n xtalacapa̠stacni xa̠hua xtalakalhamaní̠n Dios huá kalhi̠yá̠hu porque Jesucristo quinca̠ma̠siyunini̠tán.

¹⁸Ni̠para cha̠tum cristiano a̠ ucxilha Dios, pero hui̠ntí quinca̠ma̠lakapasni̠ni̠tán huá tamá cha̠stum Xkahuasa porque xlá na̠ Dios y luu lacxtum xlá ta̠ma̠lacastucni̠t xtalacapa̠stacni Quintla̠ticán.

¹⁹Ama̠ko̠lh xanapúxcun judíos xalac Jerusalén tama̠lakácha̠lh makapitzí̠n cura xa̠hua hua̠nti̠ ca̠huanicán levitas xlacata natakalhasquín Juan túcu xlá xli̠taxtuy.

²⁰Xlá ni̠tu̠ ma̠láktze̠kli huata luu lacatancs ca̠huánilh: —Aquit ni̠ huá Cristo hua̠nti̠ huixinín kalhi̠pá̠tit.

²¹Xlacán takalhasquimpá: —Entonces, ¿tícu chi̠nchú huix? ¿Pi̠ huix a̠má profeta Elías hua̠nti̠ namimparay? Juan chiné ca̠huánilh: —Pus aquit ni̠ Elías. Xlacán takalhasquimpá: —Entonces, ¿pi̠ huix a̠má profeta hua̠nti̠ xli̠mínit xuani̠t? Juan ca̠kálhti̠lh: —Ni̠ aquit.

²²Chiné tahuanipá: —¿Tícu chi̠nchú huix? Pus hua̠nti̠ quinca̠ma̠lakacha̠ni̠tán natacatzi̠putún tícu huix. ¿Túcu naquila̠huaniyá̠hu caj la̠ta tu̠ milacata?

²³Juan ca̠kálhti̠lh: —Aquit a̠má hua̠nti̠ tili̠chuhuí̠nalh profeta Isaías acxni̠ chiné huá: “Natakaxmata nac desierto la̠ naakchuhui̠nán cha̠tum chixcú y chiné nahuán: Caca̠xtlahuanítit kantum tiji hua̠ntu̠ luu statua antaní nalactla̠huán Quimpu̠chinacán.”

²⁴Ama̠ko̠lh lacchixcuhuí̠n hua̠nti̠ xtama̠lakacha̠ni̠t fariseos, acxni̠ takaxmatko̠lh xtachuhuí̠n Juan,

²⁵takalhasquimpá: —Para ni̠ huix Cristo, ni̠para Elías y ni̠para a̠má profeta hua̠nti̠ namín, ¿lácu chi̠nchú ca̠liakmunúpa̠t cristianos?

²⁶Juan chiné ca̠huánilh: —Aquit caj chúchut cliakmunu̠nún, pero uú nac mimpu̠latama̠ncán ca̠ta̠lamá̠n cha̠tum chixcú hua̠nti̠ ni̠ lakapasá̠tit.

²⁷Xlá a̠cú nama̠tzuqui̠y xtascújut y tlak a̠tzinú lanca xlacatzúcut ni̠ xachuná aquit; pus aquit ni̠ quimini̠niy nacli̠taxtuy xtasa̠cua nacuán hua̠nti̠ naxcutniy xacorrea xtatu̠nú̠n.

²⁸Pu̠tum eé qui̠táxtulh nac aktum pu̠latama̠n huanicán Betábara, a̠li̠quilhtu̠án kalhtu̠choko Jordán antanícu xca̠akmunuma cristianos Juan.

²⁹Li̠cha̠lí a̠má quilhtamacú Juan úcxilhli Jesús pi̠ xtalacatzuhui̠ma, chiné huá: —Caucxílhtit, huá eé chixcú li̠taxtuy cumu la̠ xborrego Dios hua̠nti̠ naxoko̠nún nac xlacatí̠n y chuná naca̠li̠lacxacaniy cristianos xala ca̠quilhtamacú xli̠hua̠k xtala̠kalhi̠ncán hua̠ntu̠ tatitlahuani̠t.

³⁰Huá tamá chixcú hua̠nti̠ aquit xacli̠chuhui̠nama acxni̠ chiné cuá: “Acali̠stá̠n mima a̠chatum hua̠nti̠ tlak kalhi̠y lanca xlacatzúcut ni̠ xachuná aquit, porque xlá aya xlama acxni̠ aquit ni̠najti̠ xaclama.”

³¹Na̠ ni̠para aquit xaccatzi̠y túcu a̠má hua̠nti̠ namín, ma̠squi aquit quimacamínca xlacata nacliakmunu̠nún chúchut la̠qui̠ a̠ma̠ko̠lh cristianos xalac Israel natalakapasa acxni̠ nalakchá̠n quilhtamacú.

³²Y Juan chiné huampá: —Pero la̠nchú tla̠n nacca̠huaniyá̠n pi̠ aquit cucxilhni̠t Espíritu Santo la̠ xta̠ctama̠chi nac akapú̠n cumu la̠ actzu̠ paloma y antá tahuilachi nac xokspú̠n.

³³Aquit na̠ ni̠naj xaccatzi̠y tícu xlá, pero hua̠nti̠ quimacámilh la̠qui̠ nacliakmunu̠nún chúchut chiné quihuánilh: “Acxni̠ naucxilha Espíritu Santo ta̠ctama̠chi nac xokspú̠n cha̠tum chixcú y antá natamakxteka, pus huá tamá ti̠ naliakmunu̠nún Espíritu Santo.”

³⁴Pus aquit aya cucxilhni̠t y cma̠luloka pi̠ xli̠ca̠na huá Xkahuasa Dios.

³⁵Li̠cha̠lili̠túm Juan xca̠ta̠láya cha̠tiy xtama̠kalhtahuaké̠n.

³⁶Antá lacatzú ti̠táxtulh Jesús, Juan cacs lakláca̠lh y chiné ca̠huánilh: —Caucxílhtit, huá a̠má chixcú li̠taxtuy cumu la̠ xborrego Dios hua̠nti̠ naxoko̠nún xpa̠lacata tala̠kalhí̠n.

³⁷Amá cha̠tiy xtama̠kalhtahuaké̠n Juan acxni̠ takáxmatli hua̠ntu̠ xlá huá pus la̠li̠huán tasta̠lánilh.

³⁸Y acxni̠ Jesús talakáspitli úcxilhli pi̠ csta̠lanimá̠calh, chiné ca̠huánilh: —¿Túcu putzapá̠tit? Xlacán takalhtí̠nalh: —Ma̠kalhtahuake̠ná, ¿nícu huilapi?

³⁹Jesús ca̠kálhti̠lh: —Catátit, caáhu la̠qui̠ nalakapasnaná̠tit. Xlacán tatá̠alh Jesús y cumu ko̠tanu̠yá xuani̠t acxni̠ tácha̠lh ma̠x cumu aya ca̠makta̠ti hora, a̠ma̠ko̠lh lacchixcuhuí̠n antá tatamakxtekchá.

⁴⁰Ama̠ko̠lh lacchixcuhuí̠n hua̠nti̠ takaxmátnilh xtachuhuí̠n Juan y hua̠nti̠ tasta̠lánilh Jesús, cha̠tum xuanicán Andrés xta̠lá Simón Pedro.

⁴¹Huata Andrés pu̠lh alh putzay xta̠Simón y chiné huánilh: —Cmaclani̠táhu Mesías —u̠má tachuhuí̠n huamputún Cristo o ma̠laktaxti̠ná.

⁴²Andrés la̠li̠huán le̠lh Simón antaní xuilachá Jesús y acxni̠ Jesús úcxilhli, chiné huánilh: —Huix huanicana Simón xkahuasa Juan, pero aquit nacli̠ma̠pa̠cuhui̠yá̠n Cefas —u̠má tachuhuí̠n huamputún Pedro o chíhuix.

⁴³Li̠cha̠lí Jesús alh nac xapu̠latama̠n Galilea y antá ta̠tanoklhchá Felipe, y chiné huánilh: —Caquista̠lani.

⁴⁴Amá Felipe xalac Betsaida xuani̠t antá na̠ ní xtahuila̠nanchá Andrés y Pedro.

⁴⁵Felipe la̠li̠huán alh putzay Natanael y chiné huánilh: —Cucxilhni̠táhu a̠má chixcú hua̠nti̠ titali̠chuhuí̠nalh xalakmaká̠n profetas xa̠hua Moisés, xlá huanicán Jesús xkahuasa José xalac Nazaret.

⁴⁶Natanael kalhtí̠nalh: —Ni̠para tzinú cca̠najlay. ¿Lácu pi̠ tla̠n nataxtuya̠chá cha̠tum tali̠pa̠hu chixcú nac Nazaret? Pero Felipe chiné huanipá: —Pus catat ucxilha la̠qui̠ naca̠najlaya.

⁴⁷Acxni̠ úcxilhli Jesús pi̠ xlaktalacatzuhui̠ma Natanael, chiné huá: —Anú min cha̠tum chixcú hua̠nti̠ xli̠cána luu mini̠niy li̠tapa̠cuhui̠y israelita porque ni̠para caj chunatá li̠ma̠siyuma.