Jon 1:10-47

¹⁰I kiis tah na piklinbat, ma piklinbat i tapiek sing i tom. Isau le fanu na piklinbat biil ri iliim u.

¹¹I la tah una maleh kia tom, isau le fanu kia tom biil ri ier isi.

¹²Isau le fanu tikii ae ri ka kep ta u ma ri ka unune tah na asa, ka somangat pes ta ri isi rin tapiek berberat ke God.

¹³Biil ri tapiek berberat ke God wara ri pang namin mat le namin wolwol ken kaltu le na sinangun fakekel, biil. God tom i fatapiek ri arae berberat kia.

¹⁴Orek ka tapiek kaltu, ma ka liu na fatpoto kemem. Kemem ka par ta u e memeh kia, i e memeh ke itikii sau e Kalalik ke God ae fuun ini famais ke tekentu.

¹⁵Jon i orek malal ini. I tautau ma ka tara aragii, “Igii mang e kaltu ae ia use ta u le, i mih pes iau, isau le i laumet lo iau, wara le i liu famu ta tom lo iau.”

¹⁶I fuun ini famais, ma tina famais kia, kerer tikii kere ka kep fafakalok fafamih.

¹⁷Moses i la ta ini nagogon usuf kerer, isau le Iesu Karisito i la ini famais ke tekentu usuf kerer.

¹⁸Biil biitom tikas i par ta God, isau le Kalalik tutus sau kia, ae i kiis na baba Tama, ka par ta u ma ka famalal ta u usuf fanu.

¹⁹Jon i orek malal, aunbiing foron famfamu ken fan Iudaia tina Ierusalem ri wuun fal e pris ke foron Liwai isi rin diik u le, “Wo seh?”

²⁰Jon biil i fun ti orek una kiliis ri. I use famalal u tom le, “Ia biil e Mesaia.”

²¹Pesu ri ka diik u le, “Wo seh, wo Elaisa?” Ka kiliis ri le, “Ia biil e Elaisa.” Ke ri ka diik u sabin le, “Kol wo mang e poropet ae Buk na Gogoh i fafas ta ini?” Ka kiliis ri aragii, “Ia biil.”

²²Namih ri ka diik u tala aragii, “Wo seh? On fas kemem ini ti orek isi kemek kep fafis u usuf fanu ae ri wuun ta kemem. O tara le wo e seh tom?”

²³Ke Jon i kiliis ri ini orek ae na buk ke Poropet Aisaia le, “Ia kinen nenge kaltu i tautau na falifuh foes aragii, ‘Fatortores sal sala Kumguui.’”

²⁴Foron Farasi ae ri wuun ta ri usuf Jon,

²⁵ri ka galte u aragii, “Le biil wo e Mesaia, le wo Elaisa, le poropet, isi sah o ka baptais fanu?”

²⁶Jon ka kiliis ri aragii, “Ia baptais fanu ini dan, isau le awii na fatpoto gam e kaltu ae biil gam usum lo.

²⁷I mang e ier ae in la sau na ming, i kalkaluu, pesu biil i fasih ian tel ufu su tina keke, wara le biil ia kalkaluu.”

²⁸Foron tier tikii igii i tapiek na Beteni na nenge baban dan na Ioridan na falifuh ae Jon i tel bapitaiso lo.

²⁹Na biing namih, Jon ka par Iesu i la usuf i ke ka tara aragii, “Gam par u! Apiek e natun sipsip ke God ae in tel ufu sinang laulau ken fanu tikii na piklinbat.

³⁰Igii mang e ier ae ia use ta u le, ‘I mih pes iau, isau le i laumet lo iau, wara le i liu famu ta tom lo iau.’

³¹Iau tom biil ia usum ta le i e seh, isau le wara ia ka baptais fanu ini dan, isi iak famalal u usuf fan Israel tikii.”

³²Ke Jon ka ta orek an famalal kia aragii, “Ia par Tanwa Kalkaluu i filau puh arae bun tinbae na kukulii ma ka kiis lo.

³³Biil i fasih le ian usum ta lo, isau le, God tom ae i wuun ufu ta iau isi baptais fanu ini dan, i fas ta iau le, ‘Kaltu sah on par Tanwa Kalkaluu in filau puh ma ka kiis lo, i sau e ier ae in baptais fanu ini Tanwa Kalkaluu.’

³⁴Ia ka par ta u ke ia ka famalal u le, i e Kalalik ke God.”

³⁵Na biing namih Jon ka fis sabin turan iu e kalalik na fafausum kia.

³⁶Aunbiing Jon ka par Iesu i liu ufu rituul, ke ka tara aragii, “Kamu par u! Ae kol e Natun Sipsip ke God.”

³⁷Aunbiing iun kalalik na fafausum ae ru ongen Jon i use ta u arae, ru aptih sau ke ru ka mi lo Iesu.

³⁸Iesu ka giliim fis ma ka par ru mimih la lo, ke ka diik ruh aragii, “Sanih kamu ier isi?” Ke ru ka kiliis u aragii, “Rabi, fia o kiis la wah?” (Rabi, le tom fafausum.)

³⁹Iesu ka kiliis ruh aragii, “Kamu la, isi kamuk par u.” Ru ka la ma ru ka par falifuh ae Iesu i kiis la wah. Rituul ka tapiek na ifet e aunbiing, ma ru ka melmel tura papang na aunbiing ka sup e pisiih.

⁴⁰Enru, tualik e Saimon Pita, i e neng lo ruh ae ru ongen tah Jon i use u arae, ma ru ka mi lo Iesu.

⁴¹Tier famu ae Enru i tel u, i im isi Saimon Pita, tualik ma ka fas u le, “Kama ka tafe ta Mesaia.” (Mesaia i e Karisito.)

⁴²Ma ka lame u usuf Iesu. Ke Iesu ka par usuf i ma ka tarah, “Asam e Saimon, kalalik ke Jon. Rin foteng wo ini Sipas.” Na orek Grik, ri foteng u ini Pita, kamtinan orek ae le fat.

⁴³Na biing namih, Iesu ka ier isi la una Galili. Ka tafe Pilip ma ka fas u le, “Mi lo iau.”

⁴⁴Pilip i tina maleh na Betsaida na maleh sau ke Enru ru e Pita.

⁴⁵Pilip ka tafe Nataniel ma ka fas u le, “Keme ka tafe ta kaltu ae na Buk na Nagogon, Moses i use ta u le in tapiek ma foron poropet sabin ri ororek famu tah isi. I e Iesu tina Nasaret kalalik ke Iosep.”

⁴⁶Nataniel ka diik u aragii, “Tina Nasaret! Biil i fasih le ti tier rokap in tapiek tina Nasaret.” Pilip ka kiliis u aragii, “La ugapiek, isi ok par u.”

⁴⁷Aunbiing Iesu ka par Nataniel i la isi tafe u, ka fas fanu aiwa tura le, “Igii mang kol e kaltu tekentu tina Israel ae biil ti famfabal sing i.”