Jon 1:10-47

¹⁰Sahou Awas badeh, ndra bwena labai ndra-en bolo kon munyak. Kon munyak asahan badeh, na iy le amwenen. Arile, iri lau badu kon munyak badeh, bala tanan iy bwe.

¹¹I buku bolo kon munyak ma hawe iri lau tan amwenen badeh, baso-ok iy ja bwe.

¹²Arile, are lau mwan o badih iri atehei budon tiri in tan; ma aso-ok iy labai, iri le doh kameh winiyan asahan nadu Kindrei handru.

¹³Iri basahan nadu Kindrei ta ndraye tama taha hawe tine taha iri amwenen bwe, buku uru asehek sahou ta nyala uru kato-ou nah, bwe. Kindrei le ari badeh, bwidi iri asahan nadun, tasah iri atehei budon tiri handru in tan le ari.

¹⁴Sahou Awas eme asahan Ndramak Awas, ma manyah tan udu hawe taha. Ahi ndranyolom lomada Nadu Ndramak Awas. Iy badeh, Nadu Kindrei ari le. Iy irek ta tikisiy ma hawe iri sahou handru.

¹⁵Jon asehek nyala Jises. Iy anya, “Iy le adeh mene jo asehek taha. Jo anya, ‘Iy in hamon tek eme kameh, iy sakalawi jo ja, tasah iy bwena tek labai.’”

¹⁶Iy badeh, irek labai ta kandriyen ta aso-ok ma ta tikisi taha. Iy amekes kandriyen mwasin eme tataha lau mwan ma badih mari, ma taha ndrakohok nyosowan mwasin, eme taha arek ta aliy.

¹⁷Kindrei edeu kandriyen malen ili mine Moses. Arile, kandriyen mwasin ta tikisiy ma ta sahou handru badeh, udu bada Jises Krais.

¹⁸Ari ndramak batou Kindrei bwe le. Nadun le ari badeh, atou iy. Iy i buku le Kindrei, iy manyah udu hawe taman. Nadun le bwidiy, eme ma lau marakon atanan iy.

¹⁹Iri lau ta mwena tiri Juwis ado Jerusalem tiye tiri pris ma hawe iri lau rayah badu boho kamen ta Libai badeh, kala hawe Jon kandremenya iy ki buku doh, “Ya, ou are lau handru?”

²⁰Jon bawendreya oro bwe, iy asehek sahou handru i tiri anya, “Jo Krais bwe.”

²¹Iri ndremenya iy ja, “Ka, ou are lau handru? Sebwe ou Alaija nadeh?” Iy anya, “Jo Alaija bwe.” Iri anya ja, “Sebwe ou ari propet nadeh?” Iy anya, “Jo dah ari propet bwe.”

²²Iri anya, “Abo, ou tiye ki tahi, ou are lau handru? Ahi kameh ala hamon a kon ma kasehek kili tiri lau nane suni ahi ame dah. Ma ahi kasehek ou kili tiri.”

²³Jon asumon boho oro na sahou ta propet Aisaya, “Jo i boho ndramak ari, iy aloh in kon lomale an, ‘Kalowosa san ta Laban ma kadik san kales lewan.’”

²⁴Iri lau nane ala ta atou Jon badeh, iri Parasi ra-on ado bolo iri ale.

²⁵Ano iri lelen Jon, “Buku ou anya, ou Mesaya bwe, ou Alaija bwe, ma ou ari propet bwe. Ya, i buku sah ja, ou anyu iri lau?”

²⁶Jon anya, “Jo inyu iri lau badeh, na gwa. Arile, ndramak ari ales udu hawe to kada-ah, ado tanan ado iy bwe.

²⁷Iy in hamon tek eme kameh jo bala winiyan ta talou malou ta molowa ku-i katin bwe.”

²⁸Iri lakou marakon mene asahan doh badeh, udu kon Betani, udu loboho kapa gwa Jodan mene Jon inyu iri lau udu aliy.

²⁹Udu len ari ja, Jon anyolom Jises edek ales eme hawen, ma iy aloh, “Kede-eh Nadu Sipsip ta Kindrei, iy le adeh andrei taha ame len ta kandriyen ndra-in badu kon munyak.

³⁰Iy le adeh mene jo asehek iy ewek taha. Jo asehek, ‘Iy ndramak in hamon tek eme kameh, tanan tan kameh udu bwele-en labai ja ta tanan tek. Tasah, iy ndra bwena labai, ano tine baradeu jo.’

³¹Jo ma bwena badeh, bala tanan iy bamwenen bwe, arile jo eme dah badeh ta inyu iri lau na gwa, ta iri lau badu Isra-el kameh katanan, iy are lau handru.”

³²Jon eme asehek eme lewan i buku doh, “Jo anyolom Malawin Mwasin badeh, atah udu kandrah i buku ban eme andri, ma erah udu bwele-en.

³³Jo bala tanan iy bala mwasin bwe, arile Kindrei leheyani iy i buku doh eme madak: Iy tiye jo kinyu iri lau na gwa. Idoh iy asehek eme tek, ‘Buku ou anyolom Malawin Mwasin atah eme andri, ma erah udu bwele-en, badeh, iy le ai. Iy kameh inyu iri lau na Malawin Ndrabun.’”

³⁴Eme Jon asehek, “Handru, jo ndranyolom, ma jo ndrasehek taha. Iy kede-eh Nadu Kindrei handru.”

³⁵Ano eme len ari ja, Jon ales udu hawe uru lau tan la-uh.

³⁶Jon anyolom Jises edek eme, ma iy aloh, “Aha kanyolom, iy kede-eh Nadu Sipsip ta Kindrei.”

³⁷Uru lau ma la-uh nane anuhun boho Jon ano le badeh, uru ame ruwani Jon ma uru an hamon ta Jises.

³⁸Mada Jises anya keme hamon badeh, iy anyolom lau la-uh adek an hamon tan. Iy eme ndremenyani uru, “Ah aso-ok sah handru?” Uru ame asehek ili tan, “Ndramak ta leheya, ou ado heh handru?”

³⁹Jises tiye turu, “Ah kame kanyolom.” Ndra beyeh ai, uru ame ala hawen anyolom ndrahunen, ma uru ado hawen ado gwek.

⁴⁰Uru lau ma la-uh nane an hamon ta Jises badeh, ndranuhun Jon ndrasehek nyala Jises. Nyara iy ari Enduru, iy nadu tine Saimon Pita.

⁴¹Ano le badeh, Enduru edek ili asilah nadu tinen Saimon. Iy eme ndruni iy ma iy tiye i tan, “Aru badeh ndrandruni Mesaya.” (Iy i buku le Krais.)

⁴²Enduru andrei nadu tinen Saimon, uru ala hawe Jises. Jises anyolom iy le badeh, ma iy anya, “Ou Saimon nadu Jon, neh? Nyaram kameh Sepas” (Boho kon tiri Aramek aloh Sepas. Boho kon tiri Grik aloh Pita. Moso boho kon ma la-uh doh badeh, Bek).

⁴³Ano len ari ja, Jises anya kedek kili kon ari iri aloh Galili. Iy ili ndruni ndramak ari nyaran Pilip. Jises eme tiye i tan, “Ou ame an hamon tek.”

⁴⁴Pilip i buku le Enduru uru Pita. Oro ma taloh badeh, badu kon tinan ari iri aloh Betsaida.

⁴⁵Pilip ili ja ndruni Nataniyel. Iy eme asehek i tan anya, “Aso badeh, ndrandruni ndramak mene Moses hawe iri propet arikiy udu bolo kandriyen malen. Iy Jises badu Nasaret, nadu Josep.”

⁴⁶Nataniyel ndremenya, “Saba lakou mwasin kameh asahan Nasaret?” Eme Pilip asumon bohon anya, “Ou ame, anyolom kudu madam amwenen.”

⁴⁷Jises anyolom Nataniyel edek ales eme hawen. Iy eme asehek, “Iy ndramak eme dah badeh, iy ndramak ari handru badu Isra-el, iy tanan wendreya bwe!”