San Juan 1:10-47

¹⁰Neka Tlájtoli okatka itech nin tlaltíkpaktli, iwa Ye okichijchi nochi n tlaltíkpaktli pero n tlaltikpaktlakah mach okixmatkeh akin Ye.

¹¹Owala innawak ichanikniwah, pero yejwah mach okiselijkeh.

¹²Pero akimeh okiselijkeh iwa okineltokakeh, Ye okinkawili mamochiwakah ipilwah Dios.

¹³Ninteh amo otlakatkeh kemi tlakatih n tlaltikpaktlakah, yej otlakatkeh kemi tepilwah de Dios porke Ye ijkó okimonekilti matlakatikah inawak.

¹⁴Non Tlájtoli omókopki Tlakatl, iwa towa ochanchiwako. Tejwah otiktakeh imawistilis, iwa non mawistílistli kipia non san Ye ikone n Totajtsi Dios, porke otechititi nochi itlasojtlalis iwa nochi tlan ye milajka.

¹⁵Juan otetlapowi de non Tlájtoli. Iwa chikawak otlajto, iwa okijto: —Ye nin tlakatl non ne onomechiliaya. N tlakatl non satepa wits, Ye okachi weyijkatitok ke ne, porke Ye yokatka ijkuak ne ayamó onitlakatia.

¹⁶Nochi tlan Ye kipia tejwah tikselijtiwitseh, nochipa topah momiakilia itlatiochiwalis.

¹⁷Moisés otechmák n tlanawátili, pero por Cristo Jesús owala n tlasojtlálistli iwa tlan milák.

¹⁸Amaka tlakatl yokitak Totajtsi Dios, pero Ikone non san Ye se Akin noiwa Dios, Akin nochipa nechonitok iwan Itajtsi, Ye Akin otechixmatiltiko.

¹⁹Ye ni tlan Juan otlapoaya ijkuak n judíojteh de Jerusalén okintitlankeh sikimeh tiopixkeh iwa levitas makitlajtlanitih n Juan akin ye.

²⁰Okimili tlan milák iwa okimokuiti: —Mach ne ni Cristo.

²¹Ijkuakó yejwah oksepa okitlajtlanijkeh: —¿Akin te? ¿Te n profeta Elías? Juan okinnankili: —Amó, mach ne. —Techili, ¿Te n profeta? Ye okinnankili: —Amó.

²²Ijkuakó okilijkeh: —¿Akin te kiné? Moneki tikinmiliskeh itla akimeh otechaltitlankeh. ¿Techili, akin te?

²³Juan okinnankili: —Ne non nitetsajtsilia kan tlaltejtéyinki iwa nikijtoa: “Xikmilawakah iojwiu n Toteko” —ijkó kemi okijto n profeta Isaías.

²⁴N fariseos okintitlankeh sikimeh makitlajtlanitih n Juan

²⁵—Tla te amo Ti Cristo, nion ti Elías, nion ti profeta, ¿tleka titlakuaatekia?

²⁶Juan okinnankili: —Ne nitlakuaatekia ika atl, pero nomowah kajki se Akin nomejwah amo nonkixmatih.

²⁷Milák, Ye satepa wits, iwa ne mach nitlawelkuali kemi para nikkaktojtomas.

²⁸Nochi ni otlamochi itech altepetl de Betania, ik nepa lado de n río Jordán, kan Juan otlakuaatekijtoka.

²⁹Ipan ok se tonati, Juan okitak n Jesús okinamiktiwalaya iwa okijto: —Xikitakah, Ye Ni Iichkatsi Dios, non kitekixtilis nochi intlajtlakol n tlaltikpaktlakah.

³⁰De Ye onitlajto: “Satepa wits se tlakatl Akin okachi weyijkatitok ke ne, porke Ye yokatka ijkuak ne ayamó onitlakatia.”

³¹Ne nonewia amo onikixmatia. Yika onitlakuaatekijtiwalaya ika atl para n tlakah de Israel makixmatikah Ye.

³²Juan noiwa okijto: —Ne onikitak n Espíritu owaltemok de ilwikak kemi se palomatsi, iwa omotlaliko itech Jesús.

³³Ne ayamó onikixmatia. Pero Akin onechaltítlanki manitlakuaatekiki ika atl, onechili: “Ijkuak tikitas n Espíritu waltemos iwa motlaliki itech se tlakatl, Ye Akin tlakuaatekis ika n Espíritu Santo.”

³⁴Ne yonikitak, yika, nomechilia nik Ye Ikone Dios.

³⁵Ijkuak owalmostlatik Juan oksepa ompa okatka iwa ome itlamachtijkawah.

³⁶Iwa ijkuak okitak Jesús opanoaya, Juan okijto: —Xikitakah, nin tlakatl Ye Iichkatsi n Totajtsi Dios.

³⁷Ijkuak n ome itlamachtijkawah n Juan okikakeh tlan okijto, oyajkeh iwan Jesús.

³⁸Ijkuakó Jesús oontláchixki ik ikuitlapa, iwa ijkuak okinmitak okiwaltokayah, okintlajtlani: —¿Tlan nonkitemoah? Yejwah okinankilijkeh: —Rabí —non kijtosneki tlamachti—, ¿kan tichanti?

³⁹Jesús okinnankili: —Xiwikih iwa xikitakah. Ijkuakó yejwah oyajkeh iwan Jesús iwa okitakeh kan chanti. Yokatka kemi las kuatro de tiotlak. Ompa omokajkeh iwan Jesús non tonati.

⁴⁰Andrés ikni n Simón Pedro, ye seme de nonteh ome non okikakeh tlan okijto n Juan, oyajkeh iwan Jesús.

⁴¹Andrés achto okajsik ikni Simón, iwa okili: —Yotikajsikeh n Mesías —noni kijtosneki n Cristo noso non Dios okipéjpenki.

⁴²Andrés okiwík ikni Simón inawak Jesús, iwa ijkuak Jesús okitak okili: —Te ti Simón ipiltsi n Jonás, axa yetos motoka Cefas —kijtosneki Pedro.

⁴³Owalmostlatik Jesús okisentlali yas kan tlali de Galilea. Ompa okitak n Felipe, iwa okili: —Xiwiki nowa.

⁴⁴Felipe owalewatoka itech altepetl de Betsaida. Andrés iwa n Pedro noiwa de ompa.

⁴⁵Felipe okitemoto n Natanael iwa okili: —Yotikajsikeh n tlakatl non okitene Moisés iwa n profetas itech intlajkuilolwah. Ye n Jesús ipiltsi n José non walewatok de Nazaret.

⁴⁶Natanael okili: —¿Weletis kisas itla kuali de Nazaret? Felipe okinankili: —Xiwiki, iwa xikitaki.

⁴⁷Ijkuak Jesús okitak Natanael okualajsia, okijto: —Nika wits se tlakatl non milák Israelita, non amo kimati tlakajkayawa.