Juan 1:10-47

¹⁰Lee Wdizh Naban myaad lo yizhyo ne, nu nixa leeka Wdizh Naban nak xaa mdexkwaa yizhyo ne, per lee re xaa yizhyo ne namlebeyyt Wdizh Naban.

¹¹Myaad Wdizh Naban lo xkyizhyo xaa, per namkayaat re xmyet xaa xaa.

¹²Per lee rese xaa mkayaa Wdizh Naban nu mwii lo xaa, mzaa xaa yalnabeyy lo xaa gak xaa xinn Dios.

¹³Nu lee re xaa ne ngol stub welt zee gak xaa xinn Dios, per nanakta nel nzhekla myeta o nel nzhekla xuz xaa o xnaa xaa, kwaane naka nel sbaa nzhekla Dios.

¹⁴Lee Wdizh Naban ngok myet, nu mban xaa nu ngu xaa lo re be, nu ngune nu yalnkela cheen xaa, nu ngune nu wli nak xaa. Noka ngune nu lo xni cheen xaa, nu kwaane mlu nebse lee xaa nak Xgann Dios.

¹⁵Juan mzaa kwent cheen xaa nu nzhé: —Kwent cheen xaa mza na, leezha ngunii na, lee xaa nze ngwluzh lo na per mas nonra xaa lo na, nel lee xaa nzhola axta yilo gorna zeeraka gal na.

¹⁶Nel nadoo doo nak xaa, mlu xaa yalnkela cheen xaa lo nu, nu tubka nlu xaaya.

¹⁷Yilo mzaa Dios ley lo Ches; per leezha myaad Jesucrist, Dios mlu yalnkela cheen xaa nu mod wli nak xaa.

¹⁸Nik tub xaa zer ne lo Dios; nebse Xgann xaa ngune lo xaa, xaa techosa lo xaa, nu lee xaa nak xaa mlu xomod nak Dios.

¹⁹Lee re xaa nabeyy nu, xaa Israel, xaa nzho yezh Jerusalén, mxaal xaa re ngwleyy nu re xaa nle yudar xaa zee yanabdizh xaa lo Juan zee ne xaa cho nak Juan.

²⁰Nu klar doo nzhé Juan lo re xaa: —Nanakt na Crist, Xaa Mxaal Dios Nabeyy.

²¹Zee mbare re xaa mnabdizh: —¿Cho nak lu zeey? ¿Che lu nak Li, xaa mzaa kwent kwaan nzhé Dios lo lee xaa yilo? Juan mkeb nzhé: —Nanakt na Li. Zee lee re xaa mbare nzhé: —¿Che lu nak stub xaa mzaa kwent kwaan nzhé Dios lo lee xaa yilo, xaa nak kwent yaad? Lee xaa mkeb nzhé: —Nanakt na xaa ba.

²²Zee lee re xaa nzhé: —¿Cho nak lu zeey? Nkin yé nu tub kwaan lo re xaa mxaal nu. ¿Che nzho mod né lu lo nu, cho nak lu?

²³Juan mkeb modxa nzhé Chay, xaa mzaa kwent kwaan nzhé Dios lo lee xaa yilo: —Na nak kwenta tub bos kwaan nii paro nanzhot myet: “Bxal gu tub naz nali ze Xaa Nabeyy”. Is. 40:3

²⁴Zee lee re xaa mxaal re xaa fariseo mnabdizh lo Juan,

²⁵nu nzhé xaa: —Chelee lu nanakt lu Xaa Mxaal Dios Nabeyy, nixa nanakt lu Li, nixa nanakt lu tub xaa mkayaa wdizh lo Dios yilo, ¿chozhiin nchubnis lu?

²⁶Juan mkeb nzhé: —Na nchubnis kwaan nis, per lo re gu nzho stub xaa nanlabeyyt gu.

²⁷Xaa ne nze gwluzh lo na, nu nonra xaa lo na zee nixa tich xkyelyed xaa nanzhaalt xek na.

²⁸Re kwaane ngok tub pa le Betania, stub lad roo yuu Jordán, pa mchubnis Juan.

²⁹Stub mbizh, Juan ngune lo Jesús mzebii gax lo Juan, zee nzhé Juan: —¡Wii re gu, xaa ne nak Xmbakxiil Dios, xaa kiib jwalt cheen rese myet yizhyo ne!

³⁰Xaa ne nak xaa mza na kwent leezha ngunii na lo gu: “Gwluzh lo na nze stub xaa mas nonra lo na, nel lee xaa nzho axta yilo leezha zeeraka gal na”.

³¹Nu nixa nanlabeyyt na xaa, per na nchubnis zee lee re xaa Israel labeyy xaa.

³²Nu noka mzaa Juan kwent, nzhé xaa: —Ngune na lee Mbi Naban nyaad naz yiba mod tub palom, nu mlaya cho xaa.

³³Nu na seetaka nanet na cho nak xaa, per xaa mxaal na zee chubnis na kwaan nis, nguné lo na: “Loka xaa kwaan ne lu la Mbi Naban cho, nu kwaz Mbi Naban kwaan lee xaa, xaa zee nak xaa chubnis kwaan Mbi Naban”.

³⁴Nu na nguneya, kwaanzee nza na kwent lee xaa nak Xgann Dios.

³⁵Nu stub mbizh, Juan nzo leeka zee, kwaan chop xaa kwaan mseed lo xaa.

³⁶Gorna ngune Juan lee Jesús nzhaded, zee nzhé xaa: —¡Wii gu, xaa ba nak Xmbakxiil Dios!

³⁷Gorzee lee rop xaa mseed lo Juan, mbin nzhé Juan kwaane, zee mreke xaa tich Jesús.

³⁸Jesús mzere yenn; nu gorna ngune xaa lee rop xaa ne nzeke tich xaa, zee mnabdizh xaa lo xaa: —¿Chozhiin nzeke gu tich na? Lee rop xaa nzhé: —Dix Maestr, ¿pa nzho lu?

³⁹Jesús mkeb nzhé: —Te gu zee ne gu. Zee ngwa rop xaa ne, zee ngune xaa pa nzho xaa, nu mlaz xaa kwaan lee xaa las cuatro axta mkaw yizhyo.

⁴⁰Lee rop xaa mbin kwaan nzhé Juan nu mreke xaa tich Jesús, tub xaa le Ndres, wech Simón Pér.

⁴¹Nu leeka gorzee nguchezh Ndres wech xaa Pér, nu nzhé xaa lo xaa: —Ngune nu lo Xaa Mxaal Dios Nabeyy, xaa nak Crist.

⁴²Zeera mbe Ndres Pér pa nzo Jesús, gorna ngune Jesús lo xaa nu nzhé xaa lo xaa: —Lu nak Simón, xgann Juan, per nal role lu Cefas. (Wdizh ne nak “Pér”.)

⁴³Stub mbizh, Jesús mroo nzha naz yizhyo Galilea, zee ngune xaa lo Lip nu nzhé xaa lo xaa: —Reke tich na.

⁴⁴Lip nak tub xaa yezh Betsaida, lazh Ndres rop Pér.

⁴⁵Lip ngwakwaan Nat, nu nzhé lo xaa: —Ngune nu lo xaa kwaan mzaa Ches kwent cheen lo re yech cheen ley, nu leeka lee xaa mzaa re xaa yilo kwent kwaan nzhé Dios lo lee xaa. Xaa zee nak Jesús, xinn Che, xaa yezh Nazaret.

⁴⁶Nat nzhé: —¡Nyent mod yo tub xaa wen yezh Nazaret! Lip nzhé: —Chaa, zee ne lu.

⁴⁷Gorna ngune Jesús lee Nat mzhin gax lo xaa, nzhé xaa: —Nee nze tub xaa wlipa nak tub xaa sawlazh be, xaa Israel, xaa nankadet.