Yohanes 1:10-47

¹⁰A ben de na grontapu èn nanga En Gado ben meki grontapu, ma grontapu no ben sabi En.

¹¹A ben kon na den sma fu En, ma den sma fu En no ben wani En.

¹²Ma ala sma di teki En èn di bribi ini En, A gi den dati a leti fu tron pikin fu Gado.

¹³Disi no e psa te yu m'ma e meki yu. A no e psa tu fu di a mansma wani en, noso fu di libisma wani en, ma na fu di Gado srefi e meki yu tron En pikin.

¹⁴A Wortu tron libisma èn A ben libi na wi mindri. Wi si a glori fu En, di a P'pa ben gi En leki En enkri pikin. A glori fu En ben furu nanga bun-ati èn A e sori unu san na tru.

¹⁵Yohanes ben ferteri fu En. A ben bari taki: “Disi na a Man di mi ben taki o kon na mi baka. A prenspari moro mi, bika A ben de fosi mi.”

¹⁶Fu di En bun-ati bigi psa marki, meki wi alamala kisi a wan blesi baka a trawan.

¹⁷Moses ben gi wi a wèt, ma Yesus Kristus sori wi san na bun-ati nanga san na tru.

¹⁸Noiti wan sma si Gado. Ma a wan enkri Manpikin di de nanga a P'pa, meki wi kon sabi En.

¹⁹Disi na san Yohanes taki di den fesiman fu den Dyu ini Yerusalem ben seni domri nanga Lefitiman kon na en fu aksi taki: “Suma na yu?”

²⁰Ne Yohanes no drai, ma a taigi den krin taki: “Mi a no a Mesias.”

²¹Dan den aksi en taki: “Suma na yu dan? Yu na Elia?” A piki den taki: “No, a no mi.” Den aksi en baka taki: “Yu na a Profeiti?” A taki: “No.”

²²Dan den aksi en taki: “Suma na yu dan? Un mus abi wan sani fu piki den sma di seni un kon. San yu e taki fu yusrefi?”

²³Yohanes piki den taki: “Mi na a sten di e bari wroko ini a dreisabana fu puru ala boktuboktu na pasi gi Masra, leki fa a profeiti Yesaya ben taki.”

²⁴Sonwan fu den man di den seni kon ben de Fariseiman.

²⁵Den aksi en taki: “Efu yu a no a Mesias, efu yu a no Elia noso a Profeiti, fu sanede yu e dopu sma dan?”

²⁶Yohanes piki den taki: “Mi e dopu sma nanga watra. Ma let' na un mindri wan sma e tnapu di un no sabi.

²⁷Na En e kon na mi baka. Mi no warti srefi fu puru En susu na En futu.”

²⁸A sani disi psa na Betania na a tra sei fu a Yordanliba pe Yohanes ben e dopu sma.

²⁹A tra dei Yohanes si tak' Yesus e kon na en, dan a taki: “Luku, a Lam fu Gado di e puru a sondu fu grontapu!

³⁰Na a man disi mi ben taki e kon na mi baka. A prenspari moro mi, bika A ben de fosi mi.

³¹Mi srefi no ben sabi En. Ma mi kon dopu sma nanga watra fu meki den sma fu Israel kon sabi En.”

³²Dan Yohanes ferteri den sma taki: “Mi si fa a Yeye fu Gado saka kmoto na heimel leki wan doifi, kon sidon na En tapu.

³³Mi no ben sabi suma na En. Ma a Wan di seni mi kon fu dopu sma nanga watra, ben taigi mi taki: ‘A man tapu san yu o si a Yeye saka kon sidon, na a man dati o dopu sma nanga a Santa Yeye.’

³⁴Mi si tak' a sani dati psa èn fu dat'ede mi e taigi unu: Disi na a Manpikin fu Gado.”

³⁵A tra dei Yohanes ben tnapu drape baka nanga tu fu den man fu en.

³⁶Di a si Yesus e psa, a taigi den taki: “Luku, disi na a Lam fu Gado!”

³⁷Di den tu man yere san Yohanes taki, den waka go na Yesus baka.

³⁸Yesus drai luku dan A si tak' den e waka na En baka. Ne A aksi den taki: “San un wani?” Den aksi En taki: “Rabi, pe Yu e tan?” (A wortu Rabi wani taki: Meister.)

³⁹Yesus piki den taki: “Kon nanga Mi, dan un sa si.” So den waka go nanga Yesus. Di den si pe A e tan, den psa a dei moro fara nanga En. A sani disi psa wan sani fu fo yuru bakadina.

⁴⁰Wan fu den tu man di yere san Yohanes taki èn di bigin waka na Yesus baka, ben de Andreas, a brada fu Simon Petrus.

⁴¹A fosi sani san Andreas du, a go suku en brada Simon, dan a taigi en taki: “Un feni a Mesias.” (Mesias wani taki: Kristus.)

⁴²Dan a tyari Simon go na Yesus. Yesus luku Simon dan A taki: “Yu na Simon, a manpikin fu Yohanes. Bigin fu now yu nen o de Kefas.” (A nen Kefas na a srefi leki Petrus.)

⁴³A tra dei Yesus ben wani go na Galilea. Dan A miti Filipus. Yesus taigi en taki: “Kon nanga Mi.”

⁴⁴Filipus ben de fu Betsaida, a srefi foto leki Andreas nanga Petrus.

⁴⁵Dan Filipus miti Natanael èn a taigi en taki: “Un feni a man. Na fu En Moses ben skrifi ini a wèt, èn den profeiti ben skrifi fu En ini den buku fu den. Na Yesus, a manpikin fu Yosef fu a foto Nasaret.”

⁴⁶Natanael aksi en taki: “Sortu bun sani kan kmoto fu Nasaret?” Filipus piki en taki: “Kon, dan yu sa si.”

⁴⁷Di Yesus si Natanael e kon na En, A taki: “Disi na wan trutru sma fu Israel. A no abi no wan bedrigi fasi.”