John 1:10-47

¹⁰Sei yaku mina Ago dudu kono riyo, ye mina Ago bi konori, idu amiye yaku bi de vei mama reyadi.

¹¹Iniye di gaganiri deyo, idu iniye di vene yaku faiva de niyadi.

¹²Idu amiye tau gade kaere faiva nisi ini roka fafau mokena vari gira aeyadi, bi Sei di mida mida nigi di vava maro.

¹³Sei di mida mida niyadi, una vata nisifa kana de, ma baba ura redo vata nigedi kana de, idu Sei iniye rofu vata niyadi.

¹⁴Ma mina Ago bi amiye iniye nisi uni fogori amegamo. Ini vabara bi veyafa; mina vabara bi Baba rofu ini Mida yokoi maka fafau deyo kana, ma ini Baba bi buni tora gade ma rama iniye yaku vata baeyo.

¹⁵John Baptist yaku niokugasa raka niyo, “Na yaku nigamaka amiye bi mini, resi niyaka, ‘Kaere na usi baedo, bi na kana de; bi isivaga iniye, na vata nina koderi ina bi amegamo dada.’”

¹⁶Kamini una tau vakoi Ini vabara tora gutuna uni buni tora gade moi tanu resi moiyafa.

¹⁷Sei yaku ini ago gira bi Moses dudu maro; idu buni tora gade ma rama bi Iesu Keriso dudu deyo.

¹⁸Yokoi yaku Sei vena de, de iniye, idu ini Baba di eta rofu amedo amiye yaku una fafau Sei yokoi maka moi ogau riyo.

¹⁹Ye Jew vene di ourefeidena vene yaku Sei ma amiye utari naivo vene ma Levi di rubu vene be Jerusalem gutuna nifeideyadi, ma John Baptist nikaiteyadi, “Ya bi kaere?”

²⁰Ma John bi nisui de resi niogau regasa niyo: “Na bi Keriso de.”

²¹Ye nikaiteyadi, “Makai ye ya bi kaere? Ya bi Elijah ba?” Ma nikabai reyo, “Ide.” Ma nikaiteyadi, “Ya bi mina Sei di ago nido amiye ba?” Kamini nikabai reyo, “Ide.”

²²Ye dudusa niyadi, “Makai ye ya bi kaere? Ya yaku beika una nigiya, mina moi dairi bogifa una nifeideyadi vene rofu: Ye ya kaya rofu bi beika nigiya?”

²³Kamini niyo: “Sei di ago niyo amiye roka Isaiah niyo kana, na bi ‘amiye yokoi di goroka gagani autu sanari raka nida: Varika amiye di ida moi rorobo rifa!’”

²⁴Pharisee di nifeidena vene yaku

²⁵nikaiteyadi, “Ya bi Keriso, ba Elijah, ba mina Sei di ago nido amiye de vonisi, ye beika resi babatiso reisa?”

²⁶Ma nikabai reyo, “Na yaku koru dudu babatiso reida, idu yi fogori are redo amiye yokoi bi ya ya toto.

²⁷Ina bi na usi baego, idu na bi rorobo de ini yuka ro di maena younegida.”

²⁸Mina vegu tau gade bi Jordan koru di meda dadido eta rofu Bethany ri vata niyadi; mina sanari John yaku babatiso regamo.

²⁹Ari uveyori John yaku Iesu ina rofu baedo ma vesi niyo, “Sei di Mamoe mida mini, kaere yaku kono tora noibanu vene di vegu no erufudo!

³⁰Na yaku nigamaka amiye bi mini, resi niyaka, ‘Amiye yokoi na usi baedo, bi na kana de; bi isivaga iniye, na vata nina koderi ina bi amegamo dada.’

³¹Ye na kaya na toto ina, idu na baeyaka bi koru dudu babatiso regamaka bi Israel vene rofu ina niokugika.”

³²Ma John bi ini beika veyo mina niokuyo: “Vima bi pune erena kana oma gutuna desi ina fafau rou riyo mina veyaka.

³³Na kaya na toto ina, idu Sei, kaere yaku koru dudu babatiso regi na nifeideyo, bi na rofu niyo, ‘Vima vegiya ma desi amiye yokoi fafau amego; mina bi kaere Vima kikifa dudu babatiso rego.’

³⁴Ma na bi vesi niokuyaka ina bi Sei di mida.”

³⁵Ari uveyori John bi mironari ini usi dina amiye remanusa dudusa are regamadiri,

³⁶Iesu nana rei bae boyo ma vesi niyo, “Sei di Mamoe mida bi mini!”

³⁷Kamini ini usi dina vene remanu mina neidesi Iesu usi boyadi.

³⁸Iesu kero resi ina usi baededi mina vesi nikaiteyo, “Ya bi beika maina rededi?” Ma nikabai reyadi, “Rabbi (ini adina bi ‘Oteimana amiye’), ya bi goinari ameisa?”

³⁹Nikabai reyo, “Baesi ma ya kaya vegedi.” Ye inasa bosi ini amedo sana vesi mina medari ameyadi, meda nemoko bi 4 kana uriyenau niyo dada.

⁴⁰Ina vene kaere John ago niyo mina neidesi Iesu usi boyadi yokoi bi Andrew, Simon Peter di dubuini.

⁴¹Kamini ini dubuini Simon siko baku resi niyo, “Una bi Keriso (ini adina bi ‘Auba reyo amiye’) baku reyafa.”

⁴²Resi Iesu rofu afei boyo. Ma vesi niyo, “Ye ya bi Simon, John di mida, idu bi yi roka Cephas (ini adina bi Peter o ‘fore’) nigedi.”

⁴³Ari uveyori Iesu Galilee bogika mokeyo. Philip baku resi niyo, “Na usi bae!”

⁴⁴(Philip bi Bethsaida taoni amiye, Peter ma Andrew yaku amededi taoni.)

⁴⁵Philip yaku Nathanael baku resi niyo, “Una bi Moses yaku ago girari ma Sei di ago niyadi vene ka bura reyadi di amiye baku reyafa. Ina bi Iesu Nazareth amiye, Joseph di mida.”

⁴⁶Ye Nathanael yaku niyo, “Beika buni Nazareth gutuna baego?” Ma nikabai reyo, “Baesi ve.”

⁴⁷Nathanael baeyori, Iesu yaku vesi niyo, “Mina bi rama iniye Israel amiye; ini ideri bi ofa sina yokoi de!”