Juan 1:10-47

¹⁰Utz atin tu u vatz amlika txꞌavaꞌ tzaꞌ. Utz tiꞌ kuꞌen kꞌuxh veet u vatz amlika txꞌavaꞌ. Pek aatz qꞌu aanima tu u vatz amlika txꞌavaꞌ, yeꞌt tootzaji aas aꞌ vaꞌl uli.

¹¹Tiꞌ qꞌu tetz ulka. Pek yeꞌt koꞌn kꞌulax tu vitenam.

¹²Pek taqꞌ tijleꞌm kajay qꞌuꞌl kꞌulun, qꞌuꞌl motx niman vibꞌii. Bꞌens kꞌaol imeꞌal Tioxh taqꞌo.

¹³Utz yitꞌ tiqꞌaqꞌal koj kajal aanima vibꞌen qꞌu aanima kꞌaol imeꞌal Tioxh tziꞌ. Yitꞌ titxumbꞌal koj chiꞌl kꞌuxh itzꞌpi utz, yitꞌ titxumbꞌal koj aanima. Pek itxumbꞌal Tioxh.

¹⁴Bꞌen koꞌn aanima u aqꞌol tiichajil. Atin tu kuxoꞌl. Utz qil u mam itechalil, echaꞌ tijleꞌm maꞌl kꞌaola aas taꞌxh maꞌl kꞌatz itat. Techal qꞌu mam bꞌaꞌnil tzixeꞌ tuchꞌ vinujul.

¹⁵Uncheeꞌ yolon u Xhan tiꞌ u Jesuus ech tzaꞌ: —Aꞌ vaꞌl val sete atziꞌ aas val ech tzaꞌ: «Aatz vaꞌl tul viꞌ, bꞌaxaich sunvatz. Atichnale aas cheeꞌin.» Texhin.— Texh u Xhan.

¹⁶Utz kajay oꞌ niqetzan kꞌatza tiꞌ u mam bꞌaꞌnil vaꞌl ech koꞌxh ibꞌenaꞌ.

¹⁷Tan aatz u Moisees, aꞌ taqꞌ u oꞌtla mantaar qe. Pek ech koj u bꞌaꞌnil tuchꞌ vinujul, aꞌ vetiqꞌon ul quxeꞌ u Jesucristo.

¹⁸Paat yeꞌxhabꞌil ilonnaj tetz u Tioxh. Pek u Kꞌaola nialon inujul kam bꞌanel tu u Tioxh. Tan taꞌxh u Jesuus vaꞌl meero atil kꞌatza. Utz aꞌ ootzajin tetz viTat.

¹⁹Uncheeꞌ aatz iꞌan qꞌu qꞌesal uqꞌaybꞌal xoꞌl qꞌu Israeel, ichaj unjolol oksan yol vatz Tioxh tuchꞌ unjolol qꞌu levita. Motx kꞌasuꞌl tu Jerusaleen tiꞌ en ichꞌotil tu u Xhan ech tzaꞌ: —¿Abꞌil axh?— Texh te.

²⁰Utz tzaqꞌbꞌel tu u Xhan, jik chit tala. Yeꞌt txubꞌaꞌli. Tal ech tzaꞌ: —Yitꞌ in koj viTxaaom u Tioxh.— Texhtuꞌ.

²¹Utz abꞌil paj te ech tzaꞌ: —¿Abꞌil axh uncheeꞌ? ¿Axh tzik u Elias?— Texh teꞌleꞌ. Tzaqꞌbꞌu u Xhan utz, tala: —Yitꞌ in koj.— Texhtuꞌ. Utz alax paj te: —¿Axh tzik u alol tetz u yolbꞌal Tioxh vaꞌl saꞌchitꞌuli?— Texh teꞌleꞌ. —Yitꞌ iꞌ.— Texhtuꞌ.

²²Utz alax paj te ech tzaꞌ: —¿Abꞌil axh uncheeꞌ? Ech seꞌnqal tu qꞌuꞌl vetchajonoꞌ. ¿Abꞌil axh saaleꞌ?— Texh te.

²³Utz tal u Xhan ech tzaꞌ: —In vaꞌl tal u Isaias, u alol tetz u yolbꞌal Tioxh, aas tal ech tzaꞌ: «Sajeꞌ iviꞌ tiꞌ talax u yolbꞌal Tioxh tu u tzꞌinlich tzaji txꞌavaꞌ. Utz sataleꞌ: Jikomtixsataj etxumbꞌal vatz u kuBꞌaal Tioxh, echaꞌ ijikomtixsal bꞌey siatz sebꞌaneꞌ. Chaj.» Texhtuꞌ.— Texh u Xhan.

²⁴Aatz qꞌu chaj oponi tziꞌ, ichaj qꞌuꞌl fariseo u tuqꞌaybꞌal.

²⁵Utz ichꞌoti paj tu u Xhan ech tzaꞌ: —Untzꞌoj yitꞌ axh koj viTxaaom u Tioxh, ¿kam tokeꞌ naꞌan vautisaar aanima tu aꞌ uncheeꞌ? Tan nikoꞌxh axh koj u Elias utz; nikoꞌxh axh koj u alol tetz u yolbꞌal Tioxh vaꞌl sauli.— Texh te.

²⁶Tzaqꞌbꞌel tu u Xhan ech tzaꞌ: —Tu koꞌn aꞌ nunbꞌanvu vautisaar aanima. Pek atil maꞌl texoꞌl aas yeꞌ etootzaj.

²⁷Ayaꞌ vaꞌl tul viꞌ. Loqꞌ bꞌaxal sunvatz tan, atilnale. Utz sibꞌ tijleꞌm sunvatz. Aal yeꞌ nikꞌuloꞌk viꞌ aas in chitol el ixaabꞌ tu tajan.— Texhtuꞌ.

²⁸Aatz qꞌu kam tziꞌ aꞌ uchku tu Betaabara, sala bꞌen u nimaꞌ Jordaan tu vaꞌl nichiꞌanvu vautisaar aanima u Xhan.

²⁹Uncheeꞌ tu tek vaꞌt qꞌii tuul, ilax u Jesuus tu u Xhan. Aalich tul kꞌatza. Utz tal tiꞌ ech tzaꞌ: —¡Atil viTxaaom u Tioxh tzuta! vaꞌl aꞌ nikꞌam tiꞌ maꞌl chelem karneꞌl tan, sakam tiꞌ teesal vipaav qꞌu aanima tu u vatz amlika txꞌavaꞌ.

³⁰Aꞌ vaꞌl val sete atziꞌ aas val ech tzaꞌ: «Tul vaꞌt u vinaj viꞌ vaꞌl atil nal sunvatz. Tan atichnale aas cheeꞌin.» Texhin.

³¹Utz yeꞌich vootzaj iatz. Pek vetꞌulin tiꞌ ibꞌanax vautisaar aanima tu aꞌ tiꞌ. Ech satootzaji qꞌu Israeel.— Texhtuꞌ.

³²Utz tal paj u Xhan tiꞌ ech tzaꞌ: —Vil ikuꞌl u Tioxhla Espiiritu tu Amlika. Echaꞌ paroomaxh tiloneꞌ. Utz atin tibꞌa u Jesuus.

³³Utz yeꞌich vootzaj. Pek aatz vaꞌl chajonkꞌasuꞌlin tiꞌ ibꞌanax vautisaar aanima, tal ve: «Abꞌil iꞌ liilv ikuꞌ vunTioxhla Espiiritu utz, laꞌatin tibꞌa, aꞌ vaꞌl saoksan u Tioxhla Espiiritu kꞌatz qꞌu aanima.» Texhtuꞌ.

³⁴Ech vila. Utz ech tok nivaleꞌ aas aꞌ viKꞌaol u Tioxh.— Texhtuꞌ.

³⁵Uncheeꞌ tu tek vaꞌt qꞌii tuul, atich paj u Xhan tziꞌ. Aꞌich imol kaꞌvaꞌl qꞌul ichusulibꞌ.

³⁶Utz isaji bꞌen u Jesuus nichipaaleꞌ. Utz tal ech tzaꞌ: —¡Atil viTxaaom u Tioxh tzuta, vaꞌl aꞌ nikꞌam tiꞌ maꞌl chelem karneꞌl!— Texhtuꞌ.

³⁷Ech taꞌxh tabꞌi viyol u Xhan kaꞌvaꞌl qꞌu chusulibꞌ, xambꞌu tek tiꞌ u Jesuus.

³⁸Ech sajinka u Jesuus tiꞌ iqul utz, tila aas xamich tiꞌ. Tal tek te ech tzaꞌ: —¿Kam nechokeꞌ?— Texh te. Motx tal ech tzaꞌ: —Rabii ¿til atilkꞌaxh?— Texh te. Aatz u yol “Rabii” tu u yolbꞌal hebreo, “chusul” chu u tokebꞌal.

³⁹Utz tal u Jesuus ech tzaꞌ: —Niꞌextaj, uloj etileꞌ.— Texh te. Ech ibꞌen tiꞌ utz, tila til atichka. Utz motx atinka tzixeꞌ tu u qꞌii tziꞌ. Tan maꞌtich tek ikuꞌ qꞌii; alas 4 ich tekuꞌen.

⁴⁰Aatz maꞌl tu qꞌuꞌl abꞌin iyolon u Xhan, xambꞌu tiꞌ u Jesuus; aꞌich aꞌ u Lixh. Ayaꞌ vitzaꞌqꞌ u Xhim vaꞌl Luꞌ ibꞌii majte.

⁴¹Ech aatz u Lixh, aꞌ bꞌaxal ex til u Xhim, u tatzik. Utz tal te ech tzaꞌ: —¡Atil tek viTxaaom u Tioxh vaꞌl alaꞌtziꞌimal kꞌasuꞌl! ¡Vetqillaꞌ! Ayaꞌ u Cristo.— Texh te.

⁴²Ech tiqꞌot ul u Xhim vatz u Jesuus. Sajil tu u Jesuus utz, tal te ech tzaꞌ: —Aatz axh, axh Xhim, ikꞌaol Jonaas. Cefas tek abꞌii siꞌaneꞌ. Ankoꞌxhtuꞌ u bꞌii Luꞌ majte.— Texhtuꞌ.

⁴³Uncheeꞌ aatz tu vaꞌt u qꞌii, titzꞌa bꞌenchil u Jesuus tu Galilea. Utz bꞌeni. Til u Felipe. Utz tal te ech tzaꞌ: —Xambꞌen viꞌ.— Texh te.

⁴⁴Aatz u Felipe tziꞌ, aa Betsaidaich, vitenam u Lixh tuchꞌ u Luꞌ.

⁴⁵Ech aatz u Felipe, ex til u Natanaeel utz, tal te ech tzaꞌ: —¡Ulyu vaꞌl yolon u Moisees tiꞌ tu u oꞌtla mantaar, vaꞌl yolon qꞌu alol tetz u yolbꞌal Tioxh tiꞌ majte! ¡Vetqillaꞌ! Ayaꞌ u Jesuus vikꞌaol u Xhep tu Nazareet.— Texh te.

⁴⁶Utz tal u Natanaeel tu u Felipe ech tzaꞌ: —Oj tzik salakpu maꞌj mam vinaj tu Nazareet.— Texh te. Tzaqꞌbꞌu u Felipe utz, tal ech tzaꞌ: —¡Niꞌaxh tul ila iileꞌ!— Texhtuꞌ.

⁴⁷Uncheeꞌ aatz ilax topon u Natanaeel tu u Jesuus, tal tiꞌ ech tzaꞌ: —Aatz cheel, tul maꞌl u Israeel tzuta aas nojchit yeꞌk subꞌuꞌm kꞌatza.— Texhtuꞌ.