SAN JUAN 1:10-47

¹⁰Ihyan min che duche ye Ndudo yahn Dendiohs ne, nda̱ ye iyehnse, ne andahre nduco ye Dendiohs dendah ye iyehnse, ate ihyan iyehnse ne, chaconda̱h veda̱me ye ihyan.

¹¹Nda̱ ye muhn iyehnse cuh che dendah ma̱n ye, ate ihyan nación yahn ye ne, chaconda̱h veda̱me ye ihyan.

¹²Me ihyan che nevahnecun ye ihyan, chitahno ye ihyan ne, numacuahn vederihquentiyon yahn ye, nda̱hco ye ihyan chahn ta̱h Dendiohs, nedin da̱ya ye ihyan.

¹³Ihyan chahn ne, chi da̱ya Dendiohs ihyan, ndiyu ca̱va nda̱ta yahn ye, nde huane yahn che tihca̱ nahn indihte yahn ye, te ma̱n Dendiohs nedin da̱ya ye ihyan.

¹⁴Ihyan min che duche ye Ndudo yahn Dendiohs ne, ndo ye nduhca̱ ihyan iyehnse, ne quechica ye neve nduyo va̱n nuhn. Ndihchero nuhn che a̱ma yudo vederihquentiyon quenan cuma ye, ne tumacadino nuhn che Da̱ya Dendiohs Chida ihyan. Metah nde a̱ma ihyan nduhca̱ ye. A̱ma chahte vedeyahino quenan cuma ye ma̱n, dema̱n ndudo cua̱co chicuahn ye ma̱n.

¹⁵A̱ma yune ne, ra̱hn Jua̱n yahn ihyan min tuhca̱: ―A ihyan tih che renté yahn ye ro mena̱n me cuahn che rá̱hn rí nchuhn che cochi a̱ma ihyan che tahque chahte vederihquentiyon quenan cuma ye che co u, te a va ye nde ro che metah cuhnde iyehnse.

¹⁶Ihyan min ne, numacuahn vederihquentiyon chahte yahn ye, redin yahino ye nducoya̱co vo.

¹⁷Ihyan min ne, Dihvo vo Jesucristo, che dechuh Dendiohs ihyan, chicuahn ye Ndudo yahn ye ma̱n, yahn vedeyahino yahn ye ma̱n, ne chemin ne, tahque yudo che co vederihquentiyon che dirun Moisés.

¹⁸Nde a̱ma ihyan, hua ndihche ye Dendiohs Chida. Ate Dihvo vo Jesucristo, ihyan min che Da̱ya ma̱n ye, che a̱ma yahino ye ne, a ihyan min che chicuahn ye uvo ta̱ca̱ ye.

¹⁹A̱ma yune ne, sa̱hn ndina̱n yahn nación yahn Israel che vate se ya̱n Jerusalén ne, dechuh se a̱ma o chidocuya̱n ndina̱n ma̱n, sa̱hn levita che redin se cuda̱do na̱n ta ma̱n, che chahn se tumerune se Jua̱n deh vederihquentiyon quenan cuma ye.

²⁰Jua̱n ne, ra̱hn cua̱co ye ri ye sa̱hn chahn: ―U ne, ndiyu ihyan min che a va ca̱de che chi ye ndedevahn ye ihyan iyehnse.

²¹Tumerune se ihyan: ―¿Duh ndih tuhme ne? ¿A ndih che profeta Elías ne? Ndahconan Jua̱n yahn se: ―Ndiyu u. Tumerune tun se ihyan: ―Tuhme, ¿a ndih ihyan profeta che a va ca̱de che chi ye ne? Ndahconan Jua̱n yahn se: ―Ndiyu u.

²²Ndaconan tumerune se ihyan: ―¿Deh vederihquentiyon quenan cuma ne ne?, te va che neca̱h cuande nuhn ihyan ndina̱n yahn nuhn che tahve ye nuhn. ¿A hua co ca̱hma ne co ne nuhn deh ntiyon quechica ne ne?

²³Ndahconan Jua̱n yahn se: ―Ntiyon che quechicá ne, che rahndudó ya̱hn na̱n che metah duhva nduhca̱ che dirun ihyan profeta Isaías tuhca̱: “Cuihcoya̱n nchuhn chedave yahn ne ca̱va che nevahnecun ne Dihvo vo cuahn che nda̱ ye.”

²⁴Sa̱hn ndina̱n che dechuh se sa̱hn chahn ne, fariseo se.

²⁵Ra̱hn se ri se Jua̱n: ―Nducote ndiyu ndih ihyan min che a va ca̱de che chi ye ndedevahn ye ihyan iyehnse, nde huane Elías, nde huane profeta min ne, ¿deh cuande che rehdenune ne ihyan tuhme?

²⁶Ndahconan Jua̱n, ne ra̱hn ye ri ye sa̱hn: ―Ntiyon che quechicá ne, che rihcoyá̱n chedave yahn ihyan ca̱va che nevahnecun ye Dihvo vo, ne chemin che rehdenuné ihyan. Ihyan min ne, quechica ye nación yuhn vo, ne nde hua rendihche nchuhn ihyan.

²⁷A va ye nde ro che metah cuhnde iyehnse, ne a va ca̱de che chi ye tah cuahn adive che co u. U ne, nde hua rigonun chihvé ca̱va che có mare a̱ma sa̱hn deca̱hya yahn ye.

²⁸Ro min ne, quenan Jua̱n rehdenune ye a̱ma cua̱n na̱n che duche Betábara, chihto ico Jordán, la̱do cua̱hn na̱n che riquenda̱h ya̱hn. Min che chahn sa̱hn chahn tumerune se ihyan.

²⁹Ta̱ma ro me ne, nda̱ nino Dihvo vo, ne cuahn che ndihchero Jua̱n ihyan ne, ra̱hn ye ri ye ihyan che chenun ye min: ―Condihche nchuhn. A ihyan tih che dechuh Dendiohs ihyan. Nduhca̱ a̱ma itecuche lihn che co te vedino ca̱va nunde yahn ihyan ne, tihca̱ ye, ca̱hco menda̱hn ye ihyan coh ye, nedihve ye nunde yahn ihyan iyehnse.

³⁰A ihyan tih che renté yahn ye ro min cuahn che tuhca̱ rá̱hn: “Cochi a̱ma ihyan che tahque chahte vederihquentiyon quenan cuma ye che co u, te a va ye nde ro che metah cuhnde iyehnse.”

³¹Ro mena̱n me ne, nde hua devanó che a ihyan tih, ihyan che a va ca̱de che chi ye ndedevahn ye ihyan iyehnse. Ate nducote a devanó che va che chi ye ne, chemin che rehdenuné ihyan nación yuhn vo Israel, ca̱va che cuahteya̱n ye, ne nevahnecun ye ihyan.

³²Namin ra̱hn Jua̱n ri ye ihyan chahn: ―Ndihcheró Vaco Ndah yahn Dendiohs, nduhca̱ a̱ma icui, chiya, ne quenun ihyan tih.

³³Ro mena̱n me ne, nde hua devanó duh ihyan che a va ca̱de che chi ye ndedevahn ye ihyan iyehnse, ate Dendiohs, ihyan min che dechuh ye u ca̱va che cuehdenuné ihyan ya̱n ne, ra̱hn ye ri ye u: “Ihyan che ndihchero che co Vaco Ndah yáhn, conun ihyan ne, a ihyan min che din ye che conun Vaco Ndah yáhn ihyan yáhn.”

³⁴Ma̱n ne, a ndihché ihyan, ne rá̱hn rí nchuhn te Da̱ya Dendiohs ihyan.

³⁵Ta̱ma ro me ne, a min tun quenan Jua̱n nduco o ihyan che rinduco ye ihyan.

³⁶Ura min ne, ndihchero ye che chuh Dihvo vo, ne ra̱hn Jua̱n ri ye ihyan chahn: ―A ihyan tih che dechuh Dendiohs. Nduhca̱ a̱ma itecuche lihn che co te vedino ca̱va nunde yahn ihyan ne, tihca̱ ye, te ca̱hco menda̱hn ye ihyan coh ye, nedihve ye nunde yahn ihyan iyehnse.

³⁷Chihnevan ihyan che o chahn che tihca̱ ra̱hn ye, ne cuahn ye cua̱hn na̱n cuahn Dihvo vo ca̱va che conduco ye ihyan.

³⁸Ndaconan Dihvo vo, ndihchero ye ihyan chahn, ne tumerune ye: ―¿Deh renuhn nchuhn? Ndahconan ihyan chahn yahn ye: ―Ihyan Ricuahn, nuhn ne, cochi nuhn, te nahn ndihchero nuhn ti va̱co ne.

³⁹Ra̱hn Dihvo vo ri ye ihyan chahn: ―Cuhn vo nduco nchuhn, ndihchero ne. Tuhme cuahn ihyan chahn nduco ye na̱n che quenan ye, ne nducote a ri tenduh na̱n rahco cun a chino ura min ne, chahtenan ye nduco vih.

⁴⁰A̱ma cha ihyan chahn ne, duche ye Andrés, dihno Simón Pedro.

⁴¹Ihyan min ne, cuahn che nda̱ca ye min ne, dinoca chahn ye chinuhn ye dihno ye Simón, ne cuahn che nta̱ca vih ye ne, ra̱hn ye ri ye ihyan: ―Nta̱ca nuhn ihyan min che Mesías. Ihyan nación yahn Israel ne, ra̱hn ye “Mesías” yahn ihyan min che a va ca̱de che chi ye ndedevahn ye ihyan iyehnse.

⁴²Ndeta̱hno quenda ye dihno ye na̱n quenan Dihvo vo, ne cuahn che nda̱ ye ne, ra̱hn Dihvo vo ri ye ihyan: ―Di ne, doche Simón, da̱ya Jonás, ate ma̱n ne, nda̱hcó che doche Cefas ―che nahn ca̱hma Pedro.

⁴³Cuahn che a chi cun ro min ne, ta̱hn nun Dihvo vo a̱ma ihyan che duche ye Felipe, ne ra̱hn ye ri ye ihyan: ―Cuhn vo, condoque u. Tuhme cuahn Dihvo vo nduco ihyan che rinduco ye ihyan esta̱do yahn Galilea.

⁴⁴Felipe ne, ya̱n Betsaida ya̱n va̱co ye. Da̱ma ya̱n va̱co ye nduco Andrés ma̱n, Pedro ma̱n.

⁴⁵Ura che cuahn Felipe ne, chinuhn ye a̱ma amigo yahn ye che duche ye Natanael, ne ra̱hn ye ri ye ihyan: ―Nta̱ca nuhn ihyan min che dirun Moisés ma̱n, ihyan profeta ma̱n, yahn ye. Ihyan min ne, duche ye Jesús da̱ya José. Nazaret ya̱n va̱co ye.

⁴⁶Ra̱hn Natanael ri ye Felipe: ―¿Ta̱ca̱ che ya̱n min quenda̱h a̱ma ihyan che cochihve ye? Ndahconan Felipe yahn ye: ―Cuhn vo ndoque, ne ndihchero man.

⁴⁷Cuahn che nda̱ ihyan chahn min ne, nte Dihvo vo yahn Natanael, ne ra̱hn ye: ―Ihyan cuh che cua̱co ne, redin yahn che ca̱hmo vo yahn ye che ihyan nación yahn Israel ihyan, te hua o na̱n o chende ye.