San Juan 1:10-47

¹⁰Laaman guzu loj guidxliuj, abiꞌ majsi laaman been guidxliuj, per ree bénguidxliuj ad bayagbeet reeman laaman.

¹¹Biꞌtaman loj ree bén Israel, abiꞌ majsi gojcaman bén Israel, per ad bidxgaꞌt reeman laaman.

¹²Per, gra ree bén bidxgaꞌ laaman bililadx tëë reeman laaman, beenman laa reeman xiꞌn Dios.

¹³Abiꞌ na̱j reeman xiꞌn Dios, ad ziꞌc rut xiꞌn bejn loj guidxliuj por xixgab bejn o guial rën bejn chuꞌ xiꞌnman, por guial rliladx reeman ma na̱j reeman xiꞌn Dios.

¹⁴Jesús, bén na̱j xtiidx Dios, laaman goc bejn abiꞌ gubajnman loj guidxliuj con dunuj ree, abiꞌ dád guyënman bejn ree gunee tëëman ganax diidxli. Dunujn baguiaa xguialrniabeeman, guialrniabee ni caꞌman guial tijbzi laaman na̱j Xiꞌn Dios.

¹⁵Chi be Waj xtiidxaman loj ree bejn, guneeman rejs, rëbaman: ―Jesús guie na̱j bén ruzatan, chi rnin guial bén zëëd xichan mazri lasajcaman guial lon, din diizd gocli mal yuꞌman guial lon.

¹⁶Dád rënman dunuj ree, gra dxejczi racaꞌ dugra ree xguialnazaꞌcaman.

¹⁷Por Moisejs banee Dios xleyaman duloj ree, per por Jesucrist bayagbee ree xhienaag rën Dios dunuj ree xhie tëë naag na̱j xtiidxliman.

¹⁸Ad yuꞌt dxej waguiaa bejn Dios. Bén na̱j tijbzi xiꞌnman. Bén nabannë laaman balüü duloj ree xhienaag na̱j Dios.

¹⁹Diizd Jerusalén guxhaal ree xguxtis ree bén Israel bixhioz ree con ree bén na̱j ree levitas persi bignabdiidx reeman loj Waj chu najman.

²⁰Dxel be Waj diidxli loj reeman, rëbaman: ―Ad najtan na̱j Cristo.

²¹Abiꞌ gunabdiidx reeman lojman stijb rëb reeman: ―¿Chuza najl? ¿Lüjn na̱j Elías ya, bén badëë xtiidx Dios loj ree bejn? Badxiꞌ Wajn rëbaman: ―Ad najtan. Dxel gunabdiidx reeman stijb rëb reeman: ―O, ¿lüjn na̱j bén na̱j diidx guiꞌt ya, bén gudëë xtiidx Dios loj ree bejn? Badxiꞌman laan rëbaman: ―Ad najtan.

²²Abiꞌ rëb reeman: ―¿Chuza najl? Din rayal yugnëꞌn ruson loj ree bén guxhaal dunujn. Guna chu najl.

²³Dxel rëb Waj loj reeman: ―Naj na̱j tijb bén rbidxaꞌ loj yujbidx: “Gol guxhal tijb nejz nali par bén caꞌ guialrniabee” ―ziꞌc rëb Isaías bén badëë xtiidx Dios loj ree bejn.

²⁴Abiꞌ ree bén guxhaal ree bénfarisew din guinieenë reeman Waj,

²⁵gunabdiidx reeman lojman, rëb reeman: ―Bal id lüjn na̱j Cristo, niꞌqui Elías, niꞌqui bén na̱j diidx guiꞌt, bén gudëë xtiidx Dios loj ree bejn, ¿chexquiza zeel ruroobnijsil bejn?

²⁶Badxiꞌ Waj laan rëbaman: ―Naj rurobnijs con nijs, per lojdi noꞌch tijb bén ad wayünbeetidi.

²⁷Laaman na̱j bén zëëd xichan, niꞌqui xgurëchaman ad rayalt gaxhiecan guial najman bén mazri lasajc guial lon.

²⁸Gra niguie gojc lod la Betábara, ni na̱j stiblad roꞌ guiiw Jordán, lod baroobnijs Waj bejn ree.

²⁹Chi bareguiaal, baguiaa Waj zibig Jesús lod zaꞌman, dxel rëbaman: ―Gol baguiaa, bén guin na̱j bén bacaabee Dios din guiëtaman ziꞌc xiildoo por xtol ree bénguidxliuj.

³⁰Laaman bazatan lojdi chi rnin: “Xichan zidnal bén mazri lasajc guial lon, din laaman mal yuꞌ diizd gocli guial lon.”

³¹Niꞌqui naj ad gogbeetan guial laaman na̱j bén guiꞌt, per naj zialan din gurobnijsan bejn ree con nijs din chileꞌ güünbee ree bén Israel laaman.

³²Rëb tëë Waj loj reeman: ―Naj baguia biguiajt xSprijt Dios diizd xanyabaa ziꞌc tijb palom xt guijcaman.

³³Majsi ad nünbeetan laaman, per bén guxhaal naj barobnijsan con nijs, laaman na lon: “Chi guguiaal guiat xSprijt Dios xt guijc tijb bejn, laaman na̱j bén runee xSprijt Dios.”

³⁴Naj ma baguia laaman, abiꞌ ragbeechaawan guial laaman na̱j Xiꞌn Dios.

³⁵Chi bareguiaal, zaꞌ Waj yagaj stijb, zaꞌnë tioꞌp ree xbejnman.

³⁶Abiꞌ chi baguiaaman cadëd Jesús, dxel rëbaman loj reeman: ―Gol baguiaa, bén guinan na̱j ziꞌc xi xiildoo Dios din guiëtaman por xtol bénguidxliuj.

³⁷Chi biguiejn reeman rëb Waj zian, dxel binal reeman Jesús.

³⁸Chi badxiꞌ lojman, baguiaaman zinal reeman laaman, abiꞌ rëbaman loj reeman: ―¿Xhie rguiilidi? Badxiꞌ reeman laan rëb reeman: ―Mextr, ¿ban zojbil?

³⁹Dxel rëb Jesús loj reeman: ―Gol guda din guguiaadi. Dxel wej reeman biquiaa reeman lod zojbaman, abiꞌ bayaꞌnnë reeman laaman dxej guin, guial ma gojl cost raca tajp wadxe.

⁴⁰Tijb ree xbejn Waj bén binal Jesús, bén bacaagdiajg ni rëb Waj, laaman brii laj Andrejs, bijch Simón Bëd.

⁴¹Andrejs guin, yalojxgaj bijchaman Simón bigdiilaman, abiꞌ rëbaman lojman: ―Ma badxaaglojn bén na̱j Mesías ―rën guiëban Cristo.

⁴²Dxel binë Andrejs Simón lod zaꞌ Jesús, chi baguiaa Jesús laaman, rëbaman: ―Lüj na̱j Simón, xiꞌn Jonás, per yan grii lajl Cefas ―rën guiëban Bëd.

⁴³Chi bareguiaal been Jesús xgab cheman niz Galilea, abiꞌ badxaagaman Felip, zianz rëbaman: ―Tanal naj.

⁴⁴Ladx Felip guin na̱j guiedx Betsaida, ni gajc na̱j ladx Andrejs con Bëd.

⁴⁵Dxel bigdiil Felip Natanael, abiꞌ rëbaman lojman: ―Ma badxaaglojn bén ruzaꞌt Moisejs loj xlibr xleyaman, bén ruzaꞌt ree bén badëë xtiidx Dios loj ree bejn loj ni bacaa reeman. Laaman na̱j Jesús, xiꞌn Xiëb, bén Nazaret.

⁴⁶Dxel rëb Natanael lojman: ―¿Wen yuꞌ benzaꞌc Nazaret ya? Badxiꞌ Felipan rëbaman: ―Yoꞌ din guguiaal.

⁴⁷Chi baguiaa Jesús zëëd Natanael, rëbaman: ―Guie zëëd tijb bén na̱j quijb bén Israel, abiꞌ ad rusquieetaman.