John 1:10-47

¹⁰Re Thin nem e ke yib nga fayleng. Nu pa’ e ir e sunumiy Got e fayleng ngay, machane girdi’ nu fayleng e dar manged ko ir mini’.

¹¹I yib ko nam rok, machane pi girdi’en e ra dabuyed nike yib ngorad.

¹²Machane boch i yad e ra adaged nike yib ngorad me mich u wun’rad ko ir mini’; ma aram me pi’ mat’awrad ni kar manged pifak Got.

¹³Dar manged pifak Got ni bod rogon nra sumgad ko girdi’, nni gargelegrad nib girdi’ e chitamangirad; machane Got e ir e en ni Chitamangirad.

¹⁴Re Thin nem e yib i ngal’ nib girdi’ nge yib i par ngodad. Kad guyed fel’ngin nge feni gol nge feni yul’yul’. Ireray fel’ngin ni pi’ e Chitamngin ngak, ya kari maagirag rok.

¹⁵John e weliy murung’agen ni yog ni ba ga’ laman ni ga’ar, “Ireray fa’anem ni ug weliy murung’agen ni fa’ani lungug i ir e bay yib u tomureg, machane ir e ba ga’ ngog, ya ir e immoy ko ngiyal’ ndawor ni gargel nigeg riy.”

¹⁶U fithik’ e fel’ laniyan’ rok nrib ga’ e ir e ke fal’eg waathdad riy ni gadad gubin ni be tow’ath nagdad nra chuw reb me taw reb.

¹⁷I Got e pi’ fare Motochiyel rok ngodad u daken Moses; machane t’ufeg nge yul’yul’ e pi’ ngodad u daken Jesus Kristus.

¹⁸Dariy be’ ni ka’a guy owchen Got. Machane kemus ni fa’anem ni ir e bod rogon Got me ir e bay u to’oben e en ni Chitamangiy, e ir e ke weliy murung’agen Got kan nang.

¹⁹Ba’aray e n’en ni yog John ko ngiyal’ ni ba’aram ni l’oeg piyu Israel ni yad bay u lan yu Jerusalem e pi prist nge pi Levite ni ngar fithed John ni nge lungurad, “I gur mini’?”

²⁰Ma de th’ab John gulungan nde fulweg, machane me weliy u fithik’ e girdi’ nrib tamilang ni ga’ar, “Gathi gag fare Messiah.”

²¹Miyad fith ni lungurad, “Ere gur mini’? I gur Elijah?” Me fulweg John ngorad ni ga’ar, “Danga’, gathi gag.” Miyad fith ni lungurad ngak, “Ere mog, i gur fare profet?” Me fulweg ni ga’ar, “Danga’.”

²²Miyad yog ngak ni lungurad, “Ere mog ngomad ko gur mini’. Ya dabisiy e fulweg ko re de’er ney ni nggu feked i yan ngak e pi’in kar l’oeged gamad. Ere ga be yognem ni gur mini’?”

²³Me fulweg John ni yog ni ireram fare n’en ni fa’ani yog fare profet i Isaiah ni ga’ar: “I gag laman be’ ni be tolul u daken e ted ni be ga’ar: Mu yal’uweged e kanawo’ ni ngeb Somol riy!”

²⁴Ma fa pi’in nnol’oegrad e aram e pi Farise e l’oegrad.

²⁵Miyad fith John ni lungurad, “Fa’anra gathi gur fare Messiah, ara Elijah, ara fare profet, me ere mang ni ga be tawfenag e girdi’?”

²⁶Me fulweg John ni ga’ar, “I gag e gu be tawfe ko ran; mu fithik’med e ba sak’iy be’ riy nda mu nanged owchen.

²⁷Ni ir e be yib u tomureg, machane ri gub sobut’ ndab gu bung ni nggu pithig togfan e sus rok.”

²⁸Urngin e pin’ey e nrin’ u lan e binaw nu Bethany, ni bay u ba’nem e lul’ ni Jordan, ni ir e i tawfenag John e girdi’ riy.

²⁹Me reb e rran riy me guy John Jesus ni be yib i yib ngak me ga’ar John, “Ba’aram fare Fak e Saf rok Got ni ir e nge chuweg e denen rok e girdi’ nu fayleng!

³⁰Ireram fa’anem ni fa’an ug weliy murung’agen ni fa’ani lungug, ‘Be’ nib mo’on e be yib u tomureg, machane ir e ba tolang ngog, ni bochan e ki immoy u m’on ko ngiyal’ ndawor ni gargel nigeg riy.’

³¹Machane da ug nang ko ir mini’, ya ku gub ni gu be tawfenag e girdi’ ko ran, ni bochan e nggu weliy murung’agen ngak e girdi’ nu Israel ngar nanged.”

³²Ba’aray e thin ni yog John ngak e girdi’ ni ga’ar, “Gguy fare Kan ni Thothup ni yib ni gowa ba dove u lanelang nga but’ nge yib i par nga daken.

³³I mada’ ko re ngiyal’nem ma ka dawor gu nang ko ir mini’, machane Got, ni ir e l’oegeg ni nggu tawfenag e girdi’ ko ran, e ir e ga’ar ngog, ‘Bay mu guy fare Kan Nthothup ni bay yib u lanelang nga but’ nge yib i par nga daken be’ nib mo’on; i ir fa’anem nma tawfe ko fare Kan Nthothup.’”

³⁴Me ga’ar John, “Kug guy, ere gu be yog ngomed ni ir fa’anem ni Fak Got ir.”

³⁵Me yan i reb e rran riy ni kabay John ko gin’em ni yad l’agruw ni’ ni gachalpen,

³⁶me guy Jesus ni be yan nib chugur ngorad. Me ga’ar John, “Ba’aram fare Fak e Saf rok Got!”

³⁷Me rung’ag fa gal i nem ni gachalpen e n’en ke yog miyow yan ngar unew ngak Jesus.

³⁸Me changar Jesus nga keru’, me guyrow ni yow be lek, me fithrow ni ga’ar, “Kam di’iygow?” Miyow fulweg ngak ni lungrow, “Rabbi, u uw e ga be par riy?” (Fan e re bugithin ney ni kan abweg e “Tamchib.”)

³⁹Me fulweg ngorow ni ga’ar, “Mu unew ngog mi gimew nang.” Ma aram miyow un ngak miyow nang e gin ni be par riy, miyow par rok e chirofen nem. (Ngiyal’ nem e gonap’an e ke aningeg e kolok ni mithig yal’.)

⁴⁰Ma bagayow fa gal i nem ni rung’ag e n’en ni yog John me yan nge un ngak Jesus e aram Andrew, ni walagen Simon Peter.

⁴¹Ka chingiyal’ nem me yan Andrew ni be changarnag walagen ni pumo’on, ni aram Simon miyow mada’, me yog Andrew ngak ni ga’ar, “Kug pir’egew fare Messiah.” (Ni fan e re bugithin ney e “Kristus.”)

⁴²Ma aram me fek Simon i yib ngak Jesus. Me changar Jesus ngak me ga’ar ngak, “I gur Simon, ni fak John gur. Nge par fithingam ni Kefas.” (Re ngachal ney e ta’reb rogon fan ko fare ngachal ni Peter.)

⁴³Me yan i reb e rran riy me turguy Jesus u wan’ ni nge yan nga Galile. Me pir’eg Filip me ga’ar ngak, “Mu un ngog ngdarow!” (

⁴⁴I Filip e be’ u Bethsaida, ni aram e re binaw nma par Andrew nge Peter riy.)

⁴⁵Ma aram me pir’eg Filip Nathanael me yog ngak ni ga’ar, “Kug pir’egew fa’anem ni yoloy Moses murung’agen ngalan fare ke babyor ko Motochiyel, ni ku ir fa en ni ki yoloy fapi profet murung’agen. I ir Jesus, ni fak Josef nu Nazareth.”

⁴⁶Me fith Nathanael ni ga’ar, “Rayag ni nge yib ban’en ni bfel’ u Nazareth?” Me fulweg Filip ngak ni ga’ar, “Mu un ngog ngam guy.”

⁴⁷Ma fa’ani guy Jesus Nathanael ni be yib i yib ngak, me weliy murung’agen Nathanael ni ga’ar, “Cha’ney e riyul’ ni ir be’ u Israel, ni be’ nrib yul’yul’!”