1Ḵa’di ’cem pini mo, ayy Tap̱a, dhali ciḵ aha/ gwo mo, haali/ aha/ hatha’ko’d mo dhali mina mii ta gi to mo.
2’Tashi mondiki/em pem ’twa/ mo, haali/ aha/ tana wathiŋ gayiin mo. Tayi c̱iŋkinam pini is ki me’d mo, a’di jin gami gwo is e /e mo.
3/E tana Arumgimis pem mo. Miiyi mii ka ’the gom aha/ mo, ayy Tap̱a, haali/ e /e mo tani aha/ gwokina ’twa/ i /e iyula tente/ mo.
4’Kunyi aḵashira/ gi c̱iŋkinam pini mo, haali/ e /e, ayy Tap̱a, aḵashiram pem ’de’kka/ ’kup̱ ’kup̱ ki mis mo.
5Haali/ /e, ayy Tap̱a, ta a’di jin ’boro’d mo dhali jin gwamki’da gwam mo, ki mo/en pini jin ṯelu sho’k mo jin ishki’d ka enthus mo gom uni ’baar mo kun mini yuḵ /e mo be.
6C̱iyi ’cem pini, ayy Tap̱a, ka ’thom pem mo. Ciḵi gwo gom ko jin gwoka/ ka di’b me’di is mo.
7Ka tee jin ṯocu aha/ bwa mo tani aha/ yuḵkina /e mo, haali/ /e thoḵki aha/ ’twa/ mo.
8Jaŋkamu/ yisa di’da e bwam ma rum thus gwahan jin waki /e, ayy Tap̱a, walla jaŋ kamu/ yisa di’da jin mii to me’d /e mo.
9Aris kal ma ris ’kwaniny’ceshi ’baar mo kun uḵa /e mo tani mini p̱u’du/ mo dhali luŋ ki jiŋ ’kup̱a’dup̱uni bwambori /e mo, ayy Tap̱a, dhali kar gway pini ki ca mo.
10Haali/ /e caaca mo dhali miina dhan to gi momer mo, dhali /e ’de/ itana Arumgimis mo.
11Ṯori aha/ gwo gom bway pini mo, ayy Tap̱a, ki aha/ mina ya e bway ganam pini mo. Kara dum pem mmoṯal ’de/ mo ki aha/ mina ḵo/ gway pini mo.
12Aha/ c̱ina mo jin ’boruwa ’bor bwa i is ki /e mo, ayy Tap̱a Arumgimis pem mo, ka dum pemi ’baar mo, dhali aha/ mina kar gway pini ki ca ki sule/ sule/ mo.
13Haali/ mo/en jin ṯelu sho’k mo tani a’di caaca ’kup̱ ki aha/ mo. /E ’cuḵkina ḵashiram pem ’peni moŋ’kulga/ ma Haawiya mo.
14Ayy Arumgimis, ’kwani kun ushi ’kwani ga/ uni cukin ap̱o/ aha/ mo, dhana tul ’kup̱ ’kwani kun maṯẖamaṯẖ mo tani simmki mondiki/em pem e mo, dhali uni ’koki kar /e ibwambori jis/em buni mo.
15Hili /e, ayy Tap̱a, /e tana Arumgimis jin miimii mo dhali mii mii ka ’the mo, /e maŋgala she/ ki maŋgal goma nyor mo, dhali mo/en pini jin ṯelu sho’k mo tani ishki’d mo dhali mii ma isiŋ gana/ si’da/ mo.
16Ṯuku/ mo e aha/ mo dhali bu’th mo jin hiluwa hil ka ’thime/ ki mo/en ap̱o/ aha/ mo. C̱iyu/ mo jin ’bidhu/ e is pini ki c̱iŋkinam pini mo, dhali tayi ya/ gi nyaranyc̱iŋkinam pini is ki me’d mo.
17Ṯori aha/ jamas mii ma ’them pini mo, ki uni gwansan kun shi/ki aha/ i e mo mini p̱ar mii e mo tani dhali minu dhu ki mo ma ’the is mo haali/ /e, Tap̱a, woṯẖki aha/ mo dhali malas aha/ mo be.
