1Aha/ ona gwo mo ki: Aha/ mina ji bway pem ki e mo, ki aha/ mina diki mii miinthus ka le’d pem mo. Aha/ mina ’kali’th ’twam pem mo, wakan me’d jin mina ’kwanin thusi ’kowa bori aha/ mo.
2Aha/ usha ’twa/ wal mo dhali c̱a’bki shwamm mo, aha/ bu’thkina moŋḵu’th is pem mo tani toŋ kamu/ gamkaa/? mo ma c̱is pem thissi’di ca mo ’teki shi/ shi/ mo.
3Adum pem c̱a’bki ’ba’th ’ba’th e aha/ mo. Me’d jin tashu aha/ ki gwo kun kulumkaa/ e bwa mo tani o’d jin ’batha’ba’th shwaki’d mo, dhali yan’ko’d aha/ ki o gwo ka le’d pem mo ki:
4Tap̱a, dhalki aha/ misha ’pemen pem jin midi di ’kup̱ mo dhali ateem bar pem wakata mo? Dhalki aha/ misha mo mo, ma mondiki/em pem midi gus kata mo?
5Hili /e ki kara teem pem mmokuṯa/ kuṯ me’d bwam me’d ki daḵa/ mo dhali mondiki/em pem jin dika/ ki e mo tani ta toŋ kamu/ ibwambori jis/em pini yisa. Ka jiŋ gana/ aris ’kwani ’baar mo ’kokin ’twa/i ’kup̱ ’te/ mo. Doshi ma dhali ’cunycuri yan mo.
6Ka jiŋ gana/ ’kwani iikin ki jasa ḵashira/ ma la ’te/ mo. Ka jiŋ gana/ uni ’koshki jis mo ki dar gi mii kun ḵala uni mii ’kup̱ pa ka pije/ mo. ’Kwani sugki to mo dhali mol mo mo a’di jin midi tul a’di is mo.
7Dhali shwane/ Tap̱a, ki to jin ta’da ta ic̱orkika/ mo? Mo ma ’teŋ kap̱em pem di’d e /e mo.
8’Cuḵi aha/ mo ’pena ris gwom pem kun dhaŋka/ mo. Dhalku/ ki kar aha/ jin mina imanmii miim p̱us iwaḵ aha/ mo.
9Aha/ usha ’twa/ wal mo, aha/ dinaki ḵa’d ’twam pem mo, haali/ a’di ta /e jin miiki a’di mo.
10Joc̱ki mondor pini ’peni aha/ mo. Aha/ ’baarkina mo ki mondor ki me’d pini mo.
11Ki /e ki dor wathi/ dhali ḵucur a’di gom miinthus mo tani /e ki ’cum to jin ena a’di me’da dhurany jin shwa to jin ’ka’d a’di ’twa/ ki ’ka’da bor mo. Ka jiŋ gana/ aris ’kwani ’baar mo ’ko ki e ’twa/i ’kup̱ ’te/ mo. Doshi ma dhali ’cunycuri yan mo.
12Ciḵi mon’thom pem mo ma, ayy Tap̱a, dhali ḵa’di ’cem pini gom moŋkom pem mo. Dhalku/ ki bu’th moŋḵu’th is pini ’peni jabu’th em pem mo. Haali/ aha/ takina yilkinam pini jin yaki’d ki yam pe mo, a’di jin tani pa mo, mmowa e ki ibabam pemi ’baar kadhamo/ mo.
13Hilki /e mo ka c̱iŋ’ko’d mo ’peni aha/ mo, ki aha/ mina gam bwaŋ ’kunyu’d mo nṯwa/a/ ki aha/ mina ya mo dhali diki di doḵ/e mo.
