1Ayy Arumgimis, ’kwani kun ’kon ki ’kus ’peni ji gi luŋu mo tani uni p̱u’dkun e mo gi mal pini mo. Uni ki shi/ gu’b gi mondheleladhelel pini mo. Uni ki shi/ Pa Urushaliim mo mmokup̱ a’di mo.
2Uni ki c̱i buŋgwar is gi c̱iŋkinam pini ki ’dii kun p̱en e momis mmota tonṯe/ gom uni ki ’ka mo, buŋgwar is gi unim pini kun dhunu mo ki she/ ki dhelel dhelel mo tani ’kakina toŋgwap̱i/ gi mony’cesh mo.
3Uni wolkina bas buni me’d yi’de/ mo mmo’kam Pa Urushaliim is mo dhali jaŋkamu/ di’d jin kan uniya?
4Ana warkina ki uni gun c̱inu gura/ ki imannyaḵ ’kom bana mo, dhali miikunu ka maḵ mo dhali p̱e’th ki p̱etha sor ki uni gwansan kun ’kamki ana is mo.
5Ayy Tap̱a, kakasja imina /e di mo mmomiiya nyor mo? Min ma nyor pini ’peni bwan ṯa’c pini diki pur me’d o’da?
6Woli /e anyor pini ap̱o/ kal gi ’kwaniny’cesh mo uni kun ’koki mish /e mo, dhali eya dhan bampa/ mo uni kun ’koki yuḵ gway pini mo.
7Haali/ uni loskina Yakuub mo, dhali shi/ mom piti is mo.
8Dhalku/ ki doḵ/e ka gwo e ap̱o/ am gom miinthus kun miikina ibabam bam kadhamo/ mo. Dhalki mo ma ’thimem pini jin hilu ki mo/en p̱u’du’d ki jahanne/ gam am ’kup̱ mo, haali/ aman dhukunu e mo jin ’the am is ki ’the ka luŋgu’b mo.
9Woṯẖi/ aman mo, ayy Arumgimis, jin ta bway mowoṯẖ bam mo, ki gway gi monycam pini mo. ’Cuḵi aman mo dhali gwami aman ’peni miinthus bam mo, gom gway gi gway pini mo.
10Ki to jin ta’da ta imina kal gi ’kwaniny’cesh i/o gwo mo ki: Mane Arumgimis buni mane? Dhalki mori’c pini goma bas gi c̱iŋkinam pini jin gac̱kunuwa ’cesh mo, dhalki a’di mishu mo e bwaman kal gi ’kwaniny’cesh e bwambori jis/em bam mo.
11Dhalki mo/ohon gi uni gun dhunuwa sijin p̱u’dkini bwambori /e mo, ki isi ki dhan mom’bi’th pini mo ki /e mini ’tash uni ’twa/ mo uni gwansan kun ’disha ’twa/ mmowu mo.
12’Tu’dki uni to me’di pesu/ ibwambor mo uni gwahan kun ta imannyaḵ ’kom bam mo, gom gura/ jin c̱ikina uni /e mo, ayy Tap̱a.
13Dhali yan’ko’d aman kun tana ’kwanim pini mo, uni gun tana ma’diny ḵa’bal pini goma shon dhii/i’d pini mo aman mina c̱i /e mo jin ’boruwa ’bor bwa i is ki sule/ sule/ mo, ’pena nyaḵum yil jin tanu mo ntaga nyaḵum yil jiŋ ’ko’d mo, aman mina p̱e’d momaŋ pini mo be.
