1“Is etew he migkapun etawa midtamped is pid-etawan din kenà egkehimu he edtampu te upakat he para te Nengazen.
2“Is etew he ingkeǥingey zà ne kenà egkehimu he edtampu te upakat he para te Nengazen ragkes en is menge kevuwazan din taman te ikesepulù he lapis.
3Is menge Amunihanen wey is menge Moabitanhen etawa minsan hentei te menge kevuwazan dan taman te ikesepulù he lapis, ne kenà egkehimu he edtampu te upakat he para te Nengazen.
4Su wazà kew zan beǥayi te keenen etawa wahig hein midhipanew kew puun te Ehipto, ne midsuhulan dan pa si Balaam is anak ni Beor he tig-Petor ziyà te Aram Naharaim te kedrawak keniyu.
5Piru wazà pemineǥa te Nengazen he Megbevayè niw si Balaam. Kekenà, midhimu zin he tuvad sikan is rawak pezem keniyu, su mahal kew te Nengazen he Megbevayè niw.
6Mintras uuyag kew pa ne kenè niw tevangi is menge Amunihanen etawa menge Moabitanhen te minsan hengkey he paaǥi.
7“Kenè niw keepesi is menge Edomanhen, su kezuzumahi niw sikandan. Kenè niw zaan keepesi is menge Ehiptohanen, su nekeubpè kew ziyà te tanè dan hein lumelengyawè kew.
8Is menge kevuwazan dan diyà te iketelu he lapis, ne egkehimu en he edtampu ziyà te menge etew te Nengazen.
9“Emun ebpekidtebek kew te menge kuntada niw ne likayi niw is minsan hengkey he ebpekeremerik keniyu.
10Ke zuen keniyu egewasan te similya zutun te kebpekelipezeng din ke mezukilem, kinahanglan he egawas sikandin diyà te kampu ne ziyè dèpa med-ubpàubpà te ǥawas.
11Emun mahapun en, ne mebpemeziǥù sikandin, ne te kedsanlep te andew ne egkehimu en sikandin he edlikù diyà te kampu.
12“Pilì kew te lugar he edhimuwen niw he indesà diyà te gawas te kampu.
13Is kada sevaha keniyu, ne kinahanglan he zuen din himan he para te igkutkut, su para emun ed-indes kew ne egkutkut kew te ed-indesan niw ne tembuni niw haazà.
14Su is Nengazen he Megbevayè niw edliǥuyliǥuy ziyà te kampu niw te kedlibri keniyu wey ibeǥey zin diyà te keniyu is menge kuntada niw. Umbe kinahanglan he lumpiyu is kampu niw su para wazè din egkaahà he kenà meupiya, su para kenè kew zin ewai.
15“Emun duen uripen he ebpeleǥuyan din is egalen din ne ziyà edangep te kenikew, ne kenè nu sikandin teǥela te kedlikù diyà te egalen din.
16Ipeubpè niw ziyà te lugar niw ke hendei sikandin he inged egkesuat. Ne kenè niw sikandin lisliseza.
17“Kinahanglan he wazà Israilihanen he maama etawa vahi, he ebelegyà te zengeg din diyà te simbahan he paaǥi te ked-ezapa te zuma he menge ed-ezapen.
18Kenè niw uwita ziyà te valey te Nengazen he Megbevayè niw is selapì he egkekuwa niw pinaaǥi keniyan su ibayad niw te penaad niw kandin, su utew heini mezaat diyà te kandin.
19“Emun ibpesambey niw is duma niw he Israilihanen, ne kenè niw ipaanak, selapì man haazà etawa keenen etawa minsan hengkey he egkehimu he ibpaanak.
20Egkehimu mulà ke ibpaanak niw is ibpesembayan niw te kenà Israilihanen, piru kenà egkehimu emun duma niw he Israilihanen. Beeli niw heini su para tuvazi kew te Nengazen he Megbevayè niw ziyà te langun he ebeelan niw zuen te tanà he ed-engkenen niw.
21“Emun ebpenaad kew ziyà te Nengazen he Megbevayè niw, kenè kew meduwazuwa is edtuman dutun, su kenà duwazuwa he edsukuten heini te Nengazen he Megbevayè niw, wey ebpekesalè kew emun kenè niw heini edtumanen.
22Kenà heeyan salà emun wazè kew mebpenaad diyà te Nengazen.
23Piru minsan hengkey he ibpenaad niw ziyà te Nengazen he Megbevayè niw, kinahanglan he tumana niw.
24“Emun ebpekehendiyè kew te pemuleey te paras te zuma niw he Israilihanen, egkehimu ke ebpehanteyhantey kew en te paras, piru kenè kew penguwa te ed-uwiten niw.
25Emun ebpekehendiyè kew te pemuleey te trigu te zuma niw he Israilihanen, egkehimu he egketuwen niw is trigu, piru kenè niw heini ǥerava.
