1Benaini, Iehova, emui Dirava, erena boma kamonai, bona ena haheḡani iboudiai hari dina ai na haḡanilaimui na boma badinadia namonamo bona karadia boma kara, Iehova, emui Dirava, ese baine abimui isi, tanobada besedia iboudiai daediai.
2Oibe, Iehova, emui Dirava, erena boma kamonai, ini hahenamo iboudiai na latamui ai bae diho bona dekemui ai bae kau.
3Hanua lalonai vada ba namo, bona taruha ai ba namo.
4Taumui anidia bae namo, bona emui tano anidia bae namo. Emui mauri ḡaudia anidia bae namo, bona emui seri bae hutuma; emui mamoe natudia bae mauri.
5Emui bosea bae namo, bona emui dihu bae namo.
6Emui raka vareai baine namo, bona emui raka lasi baine namo.
7Inaimui bae tuari henimui negadia ai Iehova ese baine hadareredia; dala tamona ai bae mai henimui, a dala hitu amo vairamui ai bae heau.
8Iehova ese emui roge baine hanamodia, bona imamui ḡaukaradia iboudiai baine hanamodia. Iehova, emui Dirava, baine henimui tanona ai ia ese baine hanamomui.
9Iehova, emui Dirava, ena haheḡani boma badinadia, bona ena dala ai boma raka, Iehova ese baine hahelaḡamui, iena bese ai baine halaomui, vada e gwau henimui hamata heḡereḡerena.
10Bena tanobada taudia iboudiai ese bae itaia, Iehova ese ia ladana e hanemailaimui; bena idia na garimui bae gari.
11Iehova ese baine hataḡamui, ḡau namodia iboudiai: taumui anidia, bona emui seri anidia, bona emui tano anidia; Iehova ese senemui e gwau henidia hamata baine henimui eto tanona ai.
12Iehova ese ena guba kohuna namona baine keho henimui, medu na emui tano ai baine hadihoa, ena nega korikori ai, bona imamui ḡaukaradia iboudiai baine hanamodia. Bese momo ba henidia torehai, a ediai basio abi torehai.
13Iehova ese kwara ai baine halaomui, iu ai basiola. Atai ai mo baola; henu amo basiola. Iehova, emui Dirava, ena haheḡani hari dina ai na henimuimu na boma badinadia namonamo bona karadia boma kara,
14hari dina ai na henimuimu haheḡanidia amo basio raka siri, idiba kahana amo eiava lauri kahana amo bona dirava idaudia basio lao henidia bona isiaidia basio lao heni, bona ia ese unu baine karamui toma.
15A Iehova, emui Dirava, erena basioma kamonai, bona ena haheḡani bona ena taravatu iboudiai hari dina ai na haḡanilaimuimu na basioma badinadia namonamo bona karadia basioma kara, ini uduguirai anidia iboudiai na latamui ai bae diho, bona dekemui ai bae kau.
16Hanua lalonai vada ba dika, bona taruha ai ba dika.
17Emui bosea bae dika, bona emui dihu bae dika.
18Taumui anidia bae dika, bona emui tano anidia bae dika; emui seri basie hutuma, bona emui mamoe natudia basie mauri.
19Emui raka vareai bona emui raka Iasi do bae dika.
20Iehova ese heuduguirai bona daradara bona lalo-hesiku latamui aibaine siaia, emui ḡaukara iboudiai lalodiai, ela bona ba dika vaitani bona ba mase haraḡa; badina be emui kara havara ai vada o rakatanigu.
21Iehova ese gorere metaudia amo baine hahisimui, ela bona o lao heniamu emui tano ai ba halaoa tanona ai ba mase ore.
22Iehova ese tau-varoda, bonakeru, bona ḡoudae-ḡoudae, bona siahu, bona doe, bona gesegese, bonavalavala, amo baine hahisimui; bae hahisimui ela bona ba mase.
23Guba na kwaramui daediai auri labora-labora heḡereḡerena ai bainela; tanobadana aemui henudiai auri heḡereḡerena ai bainela.
24Ḡahu na emui tano ai baine diho medu na heto; guba amo baine diho latamui ai, ela bona ba mase ore.
25Iehova ese baine hadareremui, inaimui vairadiai. Dala tamona ai ba raka lasi, ba tuari henidia; dala hitu amo vairadiai ba heau. Tanobada basileiadia iboudiai ese bae dadaraimui.
26Masemui ai atai manudia iboudiai bona tanobada boromadia ese hidiomui bae ani; tau ta basine luludia oho.
27Iehova ese Aigupto iohururudia bona toto dikadia amo baine hahisihisimui. Udumui bae totototo, bona kopimui bae kuhikuhi; basio namo diba.
28Iehova ese baine hakavamui, bona matamui baine hakepuludia, bona lalomui baine hadaradaradia.
29Dina tubua ai ba hedarahu, matakepulu tauna ese dibura ai e hedarahumu na heto. Emui ḡaukara ta anina basine vara. Taunimanima ese bae daḡedaḡe henimui, bona emui amo bae dadidadi, dina iboudiai tau ta ese basine hamaurimui.
30Hahine ta bavadavaia, to idau tauna ese baine eno henia. Ruma auta ba haginia, to basio noholaia. Vine imeana ba hadoa, to anina basio abia.
31Emu boromakau na vairamu ai bae alaia, to oi na hidiona taina basio ania. Emu doniki na vairamu ai bae dadia, basie henimu lou. Emu mamoe na inaimu bae henidia, tau ta basine durumu.
32Natumu mamaruanedia bona natumu hahinedia na idau bese taudia bae henidia; matamu amo ba raraidia, bona iruru-matamu bae diho, to irudia na imamu basie goada.
33Do asi dibamu besena ese emu tano anina bona imamu amo ba kara ḡaudia, iboudiai bae dadihai; bae daḡedaḡe henimu bona bae hahisimu dina iboudiai lalodiai,
34ela bona matamu bae ita ḡaudia ese do bae hakavamu.
35Iehova ese iohururu amo baine hahisimu, tuimu ai bona aemu ai, bona aemu palapaladia amo ela bona kwaramu tubuana; muramura ta ese baine.basine hamaurimu, diba.
36Umui, bona ikwaramui; ai ba halaoa pavapavana, na Iehova ese baine kahumui nege, umui asi dibamui bona senemui asi dibadia besena bogaraginai ba noho; unuseni ai dirava idaudia, au amo bona nadi amo e karadiamu diravadia, isiaidia ba lao heni.
37Umui na hahegari ḡauna ai bona hereva lada-isina ai bona udu gwaurai-gwaurai herevana ai baola, Iehova ese bogaragidiai bae kahumui nege besena taudia ediai.
38Uhe momo ba hado, a anidia ba gogo bae maraḡi: badina be kwadi ese bae ha-ore.
39Vine audia bahado bona ba reḡu, a vine basio gogo bona vine ranuna basio inua; gaigai-gaigai ese bae ani ore.
40Olive audia na bae vara emui tano idoinai, a olive dehorona basio hedahulai; badina be emui olive huahuadia bae ruru nege.
41Natumui mamaruanedia bona natumui hahinedia bae vara, to dekemui ai basie noho; mai iḡuidia bae hakaudia lao.
42Emui au iboudiai bona emui uma anidia na kwadi ese bae ani.
43Bogaragimui ai e noho hedoamu tauna na atai ai bainela; umui be henu amo baola.
44Ia ese baine henimui torehai; emui ai basine abi torehai. Ia na kwara ai bainela; umui na iu ai baola.
45Ini hahedika iboudiai na latamui ai bae diho; bae ḡavamui bona emui ai do bae kau, ela bona ba mase ore. Badina be Iehova, emui Dirava, erena asio kamonai, bona ena haheḡani bona ena taravatu asio badinadia.
46Idia na toa ai bona hoa ḡaudia ai baela, umui emui ai bona garamui ediai, ela bona hanaihanai.
47Iehova emui Dirava isiaina ilao-henina asio moalelaia bona ḡau momoemui ai mimia daidiai asio moale henia;
48una dainai inaimui na Iehova ese baine siaidia, bae tuari henimui totona. Isiaidia do ba lao heni, mai hitolomui bona mai ranu-masemui ida; dabua ai ba dabu, ḡau iboudiai badabu; auri gadeadia na aiomui ai bae ato; ela bona bae alamui ore.
49Iehova ese bese ta dauha amo baine mailaia, tanobada dokona amo. Ugava e rohomu heḡereḡerena baema, umui bae tuari henimui. Una bese na edia gado asi dibamui;
50vaira-hua taudia, iahu basie matauraidia bona memero basie bogadia hisi.
51Idia ese emui boromakau natudia bona emui tano anidia bae ani ore, ela bona umui na ba mase ore; emui uit bona emui vine ranuna bona emui dehoro sisina taina basie rakatania; emui boromakau natudia bona emui mamoe natudia danu ta basie rakatania, ela bona umui na ba mase ore.
52Emui hanua na edia tuari oreadia ese bae koudia ahu, ela bona emui maḡu badadia, o abidadama henidiamu ḡaudia, na bae heḡiḡi dobi, emui tano idiodia. Edia tuari oreadia ese emui hanua bae koudia hegege, Iehova, emui Dirava, ese vada e henimui tanona idoinai.
53Taumui anidia amo e vara hidiodia, natumui mamaruanedia bona natumui hahinedia Iehova, emui Dirava, ese vada e henimui hidiodia, bavani, inaimui bae koumui ahu bona bae hadabumui dainai.
54Bogaragimui ai readia tau ta tau-anina manada-manada bona aniani inonoḡadia mo e animu; to ena karabaine auka bona baine daḡedaḡe, tadikakana enai bona adavana enai bona natuna hahidaosi dounu mauridia ediai.
55Bena natuna vada e mase hidiodia e animu na taidia basine henidia, badina be ena hitolo baine bada herea, emui hanua iboudiai lalodiai inaimui ese baine koumui ahu bona baine hadabumui dainai.
56Eiava bogaragimui ai readia hahine ta tau-anina manada-manada bona aniani inonoḡadia mo e animu, aena danu taina se hamareremu, badina be ia na aboni-noho hahinena; to ena kara baine auka, adavana enai bona natuna maruanena enai bona natuna hahinena enai.
57Bena momo aena padadia amo e lasimu bona natuna bogana amo e varamu na baine anidia hehuni, badina be ena hitolo baine bada herea, emui hanua lalodiai inaimui ese baine koumui ahu bona baine hadabumui dainai.
58Ina buka ai e tore taravatudia iboudiai basioma badinadia bona karadia basioma kara, bona Iehova, emui Dirava, ladana ḡoeva-daena bona herea-daena basioma matauraia,
59Iehova, emui Dirava, ese baine hahisimui bona garamui baine hahisidia, hisihisi metaudia, bae hesiriu daudau hisihisidia, bona gorere metaudia, bae hesiriu daudau goreredia, amo baine hahisimui.
60Ia ese Aigupto goreredia iboudiai, o garilaidiamu ḡaudia, latamui ai baine hadihodia, bae gugubamui.
61Bona ina taravatu bukana ai asie tore goreredia bona hisihisidia iboudiai Iehova ese baine hadihodia latamui ai, ela bona ba mase ore.
62Vada o hutuma, guba hisiudia na heheto, a do ba gadoi; badina be Iehova, emui Dirava, gadona asio kamonai.
63Iehova na ihanamomui bona ihahutumamui vada e moalelai; to ia na ihadikamui bona ihamasemui do baine moalelai; ba raka vareai emui tano ai ba halaoa tanona amo baine butumui tao.
64Iehova ese baine hakarohomui rohoroho, bese idau-idauiboudiai bogaragidiai, tanobada dokona amo ela bona tanobada dokona. Unuseni ai dirava idaudia, umui asi dibamui bona senemui asi dibadia diravadia, au bona nadi amo e karadia diravadia, isiaidia ba lao heni.
65Unu bese bogaragidiai basio noho namonamo, bona aemui basie laḡa ani. Iehova ese kudoumui baine hahetahadia, bona matamui baine hakepuludia, bona laumamui baine hadauredia.
66Emui mauri dainai ba daradara: dina ai bona hanuaboi ai kudoumui bae hetaha, ba mauri eiava lasi.
67Daba ai baoto “Hanua bema boi”. Hanuaboi ai baoto “Daba bema rere”. Lalomui bae garilai ḡaudia bona matamui bae ita ḡaudia daidiai unu ba hereva toma.
68Iehova ese lagatoi ai baine laohaimui, Aigupto ba lou henia; na hamaorolaimui nato “Basio itaia lou” dalana amo ma ba lou. Unuseni ai sibomui ba hehoi toho, inaimui edia hesiai taudia bona edia hesiai hahinedia ai baola totona; a tau ta ese basine hoimui.
