Agoago Podo 30:13-33

¹³Nia daangada i golo e hagamaanadu bolo ginaadou e humalia huoloo, uaa, e humalia behee go di nadau hagamaanadu bolo ginaadou e humalia!

¹⁴Hunu daangada e hai hagahuaidu digau hagaloale mo digau nadau mee ai. Deelaa di nadau hai e mouli ai.

¹⁵Tangada madamadau mee ana dama ahina dogolua, meemaa huogodoo e haga ingoo boloo, “Gaamai! Gaamai!” Nia mee e haa aanei le e deemee di hagahonu:

¹⁶- Tenua digau mmade. - Di ahina ana dama ai. - Tenua maangoo e hiihai gi di uwa. - Di ahi ulaula deemee di diinai.

¹⁷Maa goe e haga balumee do damana be e hagauwwou do dinana i di nau mmaadua, goe e humalia e wanga gi nia manu gi geina, be e wanga gi nia manu mamaangi lodo geinga gi kabe ina o golomada.

¹⁸Nia mee e haa aanei le e de modongoohia eau di iloo:

¹⁹- Di manu ‘eagle’ dela e maangi i di ahiaalangi. - Di gihaa lodo geinga dela e tolo i hongo di hadu. - Di wagabaalii dela e dele i di moana gi tenua. - Di hai o taane mo di ahina e aaloho i nau mehanga.

²⁰Deenei di mouli hai be di manu o di ahina hai lodo dela e mouli hua i dono hiihai: Mee gaa hai di huaidu, ga gaugau, ga helekai boloo, “Au digi hai dagu mee hala!”

²¹Nia mee e haa aanei le e hai henuailala gi bolebole:

²²- Di hege e hai di king. - Tangada dadaulia e hai mee gi nia meegai huogodoo ala e hiihai e gai.

²³- Di ahina hai lodo hagalee aloho ai dono lodo. - Di hege ahina e kae di lohongo o dono dagi ahina.

²⁴Nia manu e haa aanei i hongo henuailala ala e lligi gei e koia e kabemee:

²⁵- Nia loada: digaula e paagege gei digaula e benebene nadau meegai i di madagoaa mahanahana.

²⁶- Nia manu lodo hadu: digaula e paagege labelaa, gei digaula e hau nadau hale i lodo nia hadugalaa.

²⁷- Nia manu geinga tolo ‘locust’: digaula nadau king ai, gei digaula e mmaanege haga madatau.

²⁸- Nia manu mogo: goe e mee di daahi dau mogo e dahi i lodo doo lima, gei goe e gidee digaula i lodo nia hale king.

²⁹Nia mee e haa aanei le e hagagoboina di mmada ginai i di nadau haele:

³⁰- Nia laion, nia manu kaedahi maaloo gei hagalee mmaadagu i dahi manu.

³¹- Nia kuudi. - Nia deduu daane madamada. - Nia king i mua nadau daangada.

³²Maa goe e tau gi tadaulia e bida hagalaamua goe mo di haganohonoho nia mee huaidu, dugu ina nia maa, gei goe gi hagabaubaulia!

³³Maa goe ga ununugi nia milugu, nia paadaa ga gila mai. Maa goe ga hagamaawa di uhi tangada, di uhi tangada le e dotodo. Maa goe gaa haga gila aga di hagawelewele, gei di hagahuaidu ga gila aga.