Muqâqiŋ Dâŋ 30:13-33

¹³Ŋic gâcne jaŋe jaŋacnere manapie fefene eha ŋic âgofâc‐jeŋic jaŋere ine manapie wawahane eekac.

¹⁴Ŋic gâcne jaŋe hapetac â qarâ suriŋne kisuec‐jopahuc wiac‐jeŋic jowac roeŋgopieŋ, jaŋe iŋuc ehuc jaŋacne juju dopeckeeŋgopieŋ.

¹⁵Hurameŋ e otâ jahec‐ticne jajahec jukopirec jahere ʒâŋe mocjaha ʒiŋuc fokac: “Narec, Narec.” Wiac jahec â jahec kecʒiŋuc jaŋe nâ gapec moc mi eeŋgopieŋ:

¹⁶Hâmoc hae, ŋokac hufiŋne, mâreŋ kereŋne â ʒocbâruŋ.

¹⁷Ŋic moc e neŋgoc mamac jahec‐ticne jahe ŋic ŋokac qizec ehapire gâwie‐jactehuc qaisoc‐jofaocmu e kâec kâec wipezi ʒâŋe‐ticne ripozejec â tucwipezi sahac biuc‐ticne nâzejec.

¹⁸Wiac jahec â jahec kecʒiŋuc jaŋere fuŋne qame hukicne fokacte mi mana taraekopac:

¹⁹Moc i tucwipezi sawao rac warec eekac, â moc i homazi haroŋaŋ faio foforâ raekac, â moc i wokezi hata‐ticne bâfuarâ hâwec fotâcneekac, erâ moc ine ŋic ŋokac jajahec jahe maŋ rârâec eekopirec.

²⁰Boe sau ŋokaczi wiac ʒiŋuc eekac: E sasec gie barâ opâ ruahuc ʒiŋuc muekac: “No bahac moc mi bâfuapac i.”

²¹Wiac jahec â jahec kecʒiŋuc jaŋere manapene mi eene eekac:

²²Kiŋaŋ qaqazi ŋicwofuŋ erâ juju, ŋic sindaŋnezi nânâ mâriri sâkohec juju;

²³ŋokac qaisockekicnezi ŋic roro, erâ kiŋaŋ naruzi ŋokac bomboŋ‐ticne ââkehocke.

²⁴Qowi jahec â jahec kecʒiŋuc juŋgopieŋ jaŋe piticne jâmbâŋ erâ sifu mamana tarahec:

²⁵Qoʒazaŋ jaŋe tâpiri tâmiric erâ sifu ʒoaŋ dameŋko nânâ wiac‐jeŋic ro qâzuc efâreeŋgopieŋ.

²⁶Mandaŋ jaŋe tâpiri tâmiric jaha erâ sifu mâreŋ gufurâ fic hae eeŋgopieŋ.

²⁷Hâpic jaŋe ŋicwofuŋ tâmiric juhuc sifu birihec raeŋgopieŋ.

²⁸Ʒereac jaŋe mezi roroc‐jopane, erâ sifu ŋicwofuŋte ficko jueŋgopieŋ.

²⁹Wiac jahec â jahec kecʒiŋuc jaŋe hata rahapie honec‐jopahuc aŋac‐nâpoekac:

³⁰Moc i laioŋ; e tâpiri‐ticnezi qowi gâcne jaŋere tâpiri sirickeha wiac irec me irec moc mi hâwickeekac.

³¹Â moc i noniŋ â qâqâc ŋicne, erâ moc i ŋicwofuŋ jaŋe momorifâc‐jeŋic micne bajareeŋgopieŋ.

³²Go mutuc erâ pepec penaroŋ ehuc wiac hehesicne manasu biric moc emeŋko ine beherâ mocwâc mamana gie bazemec.

³³Susu kiruŋko itiriŋkekupene wokemaŋ fuaekac. Ŋic moc e sâkenao hepene soc ruaekac, â ŋic maŋbâiŋ ejarepene ʒika fuaekac.