Agoago Podo 2:4-19

⁴Halahala ina hagamahi be dau hai e halahala silber be di maluagina ngala.

⁵Goe ma gaa hai nia mee aanei, gei goe ga iloo di hagalaamua Dimaadua, ga iloo di gida di kabemee o God.

⁶Ma go Dimaadua hua dela e gaamai di kabemee. Di kabemee mo di iloo mee e lloomoi i dono baahi.

⁷Mee e hagamaamaa, ge e duuli digau ala e donu gei e hai hegau donu.

⁸Mee e duuli digau ala e benebene hagahumalia nia daangada ala i golo, ge e madamada humalia i digau ala e manawa dahi ang gi de Ia.

⁹Maa goe ga hagalongo mai gi di au, gei goe ga iloo di tonu, di hai donu, mo di mee dela e humalia. Goe ga iloo labelaa au mee ala belee hai.

¹⁰Goe gaa hai tangada kabemee, do iloo ga gowadu do manawa tene.

¹¹Do kabemee mo do iloo ga duuli goe,

¹²ga duuli goe gi daha mo di haihai nia mee hai gee, ga benebene goe gi daha mo nia daangada ala e haga hinihini dangada mai nadau helehelekai,

¹³go ginaadou ala ne diiagi nadau ala mouli o di tonu, ga mouli i lodo di ala bouli o di hala,

¹⁴go ginaadou ala e manawa tene i lodo di hai nadau mee hala, mo di tenetene gi nnangahaihai huaidu.

¹⁵Digaula la nia daangada e deemee di hagadagadagagee ginai, ge e halahalau dangada.

¹⁶Goe gaa mee di haga deeai gi di ahina mouli be di manu dela e dagi goe gi ana helekai maangala,

¹⁷dela e halahalau dono lodo donu, mo di haga de langahia dana hagababa ne hai i mua o God.

¹⁸Maa goe gaa hana gi dono hale, goe e hana i hongo di ala dela e dau gi di made. Tangada ma gaa hana gi golo, le e hana gi tenua o digau mmade.

¹⁹Tangada ma gaa hana gi baahi di ahina beelaa, ga hagalee hanimoi gi muli. Mee ga deemee di hana labelaa i di ala ang gi di mouli.