1 Hadì 18:36-46

³⁶Hein timpu en te kebpemuhat, mid-uvey si Elias he ebpeneuven duen te pemuhatà ne nengemuyù sikandin. Ke sikandin te, “Nengazen he Megbevayà ni Abraham, ni Isaac, wey ni Jacob, ipeehè nu is puriba ǥuntaan he andew he iyan ka Megbevayà te Israel ne suluǥuen a kenikew, ne mibeelan ku heini is langun he vaal su iyan insuǥù nu.

³⁷Iveǥey nu is hangyù ku, Nengazen su para metueni kayi te menge etew he iyan ka Nengazen Megbevayà, ne ibpelikù nu sikandan diyà te kenikew.”

³⁸Ne segugunà nekeuma is hapuy he ebpuun diyà te Nengazen, ne midtutung dutun te hapuy sikan is pemuhat, sikan is tavun, sikan is menge vatu, wey is tanà, wey mibpemezahan din is wahig duen te kanal.

³⁹Ne hein naahà haazà te langun he menge etew zutun, midlangkeb dan is egkaǥi te, “Is Nengazen, iyan Megbevayà! Is Nengazen iyan Megbevayà!”

⁴⁰Ne segugunà midsuǥù ni Elias is menge etew te, “Dekepa niw is menge ebpeneuven ni Baal. Kinahanglan he wazà ebpekepelaǥuy kandan!” Umbe midakep dan ne mid-uwit sikandan ni Elias diyà te zal-ug he Kishon ne zutun din penhimetayi.

⁴¹Migkeǥiyan ni Elias si Ahab te, “Genat kad ne kaan ke en su ebpekeume en is mereǥes he uzan.”

⁴²Umbe, migenat si Ahab su egkaan, ne si Elias mulà, midtekezeg diyà te puntur te Carmel is mid-ampù he eduzungul ziyà te tanà.

⁴³Ne migkeǥiyan din is suluǥuen din te, “Tekezeg ka ne pentawa nu is daǥat.” Ne midtuman haazà duen te suluǥuen. Ne kedlikù din diyà te ki Elias ke sikandin te, “Wazè ku naahà.” Kepipitu sikandin ipelikù ni Elias te kebpantew.

⁴⁴Ne hein ikepitu en te kedlikù din, ke sikandin diyà te ki Elias te, “Zuen ku naahà he kivel he iring dà keluag te palad te etew he mibpezivavew he ebpuun te lawed.” Ne migkaǥi si Elias te, “Genat ka, ne keǥiyi nu si Ahab he med-untud en te kerwahi zin ne megenat en mintras kenè pa sikandin egkesaut te uzan.”

⁴⁵Ne netegteǥaad mibmerusirem en is hewhewanan tenged te menge kivel. Nengeramag wey mid-uzan te mereǥes, ne mid-untud te kerwahi zin si Ahab ne midhendiyà te Jezreel.

⁴⁶Ne zutun, mid-ulinan si Elias te Nengazen! Midlislis din is pendivavew he visti zin ne mibekesan din ne mibpelelaǥuy su edhuna sikandin ki Ahab diyà te Jezreel.