1 KING TAUDIA 18:36-46

³⁶Adorahi boubou henia negana ia ginidae neganai, peroveta tauna Elia be boubou patana badinai ia gini, ia guriguri, ia gwau, “Lohiabada e, Aberahamo bona Isako bona Iakobo edia Dirava e, hari dina do oi hedinaraia momokani oi be Israela ena Dirava, bona lau, oiemu hesiai tauna, ese inai kara oiemu oda dekenai lau karaia noho.

³⁷Lohiabada e, lau dekenai do oi haere, mani oi haere, vadaeni inai bese taudia do idia diba, oi Lohiabada sibona be Dirava momokani. Bona oi ese idia edia lalona do oi hagiroa lou oi dekenai.”

³⁸Vadaeni Lohiabada ese lahi ia siaia diho, unai boubou gauna ia gabua ore, bona au, bona nadi, bona dadaira ena tano danu, ranu ibounai danu be ia kaukau momokani.

³⁹Taunimanima ibounai ese idia itaia, vadaeni tano dekenai idia moru diho, idia gwau, “Lohiabada, ia be Dirava, Lohiabada, ia be Dirava.”

⁴⁰Vadaeni Elia ia oda henidia, ia gwau, “Bala peroveta taudia do umui dogoatao, ta do ia heau mauri lasi.” Idia ibounai idia dogoatao, vadaeni Elia ese idia ia hakaua lao, sinavai maragi ladana Kisona dekenai. Unuseni Elia ese ia aladia mase.

⁴¹Vadaeni Elia ese Ahaba ia hamaoroa, ia gwau, “Oi lao, oi aniani, oi inua danu, badina lau kamonai, medu ia mai noho.”

⁴²Unai dainai Ahaba ia lao, do ia aniani totona. Unai neganai Elia be Karamele Ororo ena ataiai ia daekau lao. Unuseni ia tui diho tano dekenai, bona iena kwarana be iena tuina edia huanai ia atoa.

⁴³Elia ese iena hesiai tauna ia hamaoroa, ia gwau, “Oi lao, davara kahanai do oi itaia noho.” Ia lao, iena matana ia negea, vadaeni ia giroa, ia gwau, “Gau ta lau itaia lasi.” Elia ese nega 7 iena hesiai tauna ia hamaoroa do ia giroa lou, davara kahana do ia itaia totona.

⁴⁴Nega namba 7 hesiai tauna ia giroa mai, ia gwau, “Ori maragina ta lau itaia, iena bada be tau ta ena imana bamona, davara dekena amo ia daekau noho.” Vadaeni Elia ese ia hamaoroa, ia gwau, “Oi lao, Ahaba do oi hamaoroa, iena kariota dekenai do ia guia, iena ruma dekenai do ia lao, medu ese do ia koua garina.”

⁴⁵Nega sisina ia lao, vadaeni guba be ori koremakorema ese ia koua, lai danu ia toa matamaia, bona medu bada ia diho hamatamaia. Ahaba be kariota dekenai ia guia, Ieserele dekenai ia heau gwauraia.

⁴⁶Vadaeni Lohiabada ena siahu be Elia dekenai ia vareai. Iena rami ia kwatua, bona aena dekenai Ahaba ena vairana dekenai ia heau, ela bona Ieserele hanua ena raka vareai gabuna.