Te Israel me Juda Hani Sigo Tuni Bidigo Po Elalubo Buku Deli 18:36-46

³⁶Tama te pio mu ebode te ofa ebo sogo, te Godigo po pusali bidi profet Elaija te alta pąba pelama, te gedu haluasa po te tama wali, “God, te Abraham, me Aisak, me Israel, te augwaligo Genuai Bidi, eno homugo nago te tiwai nago te we bidi dabeba megi ola momainu homu ebao, nage naga te Israelgo God dao. Tama me nago augwaliba te tiwai ola momainu ebao, ena nago sę bidi eno nago po naga wali pelama, eno te tigidali sę yai dao.

³⁷Genuai Bidi, eno buba hwi wabo po odama, te eno nagebolo hanalubo tiwai gilama yao, tama te we bidi dabe augwaligo konemainao, nage naga, naga te God mu, tama te nago augwali homu begelama, te nageba ma asomainu ebo dao,” tama wali.

³⁸Tialima, Genuai Bidigo isi aiyaba tagala palai. Tama isigo te ofa me, te isi me, te alta nigali masigi dabe me, te alta sesede elaluali tǫ me isigo dela silali. Tama te ąį gamiade elaluali ąį me tigidali sula selama, wa pai dao.

³⁹Te we bidi augwaligo te sulama da, teda augwa digi te tǫba pinilaluama, tama augwaligo te tiwai i hai wali, “Genuai Bidi naga aga God mu dao. Genuai Bidi naga aga God mu dao,” te po wai dao.

⁴⁰Tama Elaijago augwaliba te tama po wali, “Te god Balgo profet bidi dabe tigidali pageabi yao. Te me deli wi pomainu me sula tagaligio,” wali. Tama tialima, augwaligo te profet dabe pageabi elala pelama, tama Elaijago te profet dabe selama, te ąį Kison sesegeba dulama, te augwali ela muai dao.

⁴¹Augwali te badu bidibadi, te Elaijago Ahapbolo te tama po wali, “Nage polo asesa pelama, nai tugi pao. Eno odali, te genuai tulubage u ola asida obao po walio,” wali.

⁴²Tialima, Ahap pelama, nai tugi pali. Te Elaija aga sę bidi dali te bulu du Karmelba ugwaba holali. Tama Elaija basi gulama, te aga tobolu te sągą kidu si tomoba pǫgulali.

⁴³Tama agai aga sę bidibolo te tiwai po wai, “Nage u badu pelama, te tamu ąįba tonaludugi pao,” wali. Tialima, te sę bidi pelama, tonaludugi pelama, ma asu, te tama po wali, “Eno magi nai deli me subeo.” Tama Elaijago te sę bidibolo te tama po wai, “Nage ma pelama, tonaludugi pao.” Te sę bidigo tama tiwai yalio. Elaijago te deli po naga udubadi, te a naga olama, me si sogo usu nani.

⁴⁴Te a naga olama, si wabo side, te sę bidi ma begasa asu, te tiwai po wali, “Eno suali, te dagalu pǫ me deli tamu ąįde pedelali. Te dwasianu naga, te bidigo nogo tiwai usu.” Tialima, Elaijago aga sę bidibolo te tiwai po wali, “Nage polo pelama, te king Ahapbolo walama, te aga karis sisi elama, te asesa polo aiyaba dulao. Tiyu, tulubagego aga pabo sina sabuo,” te po wai dao.

⁴⁵Te polo tama te haowa pedelama, te dagalu polo sesela sai. Te wali po tiwai pedelama, te genuai tulubage tulubo gagalali. Te Ahap aga karisba duagulama, te hanu Jesril sunumidu wali palio.

⁴⁶Tama Genuai Bidigo bomo Elaijaba pedelai. Te Elaija aga name ugwa bugagia dąų olama, te Ahapgo karis pabodu aga polasa uda yali. Aga te tiwai udada pidubadi, augwali si te Jesrilba sabolali.